Փաստ ինֆո

ԱԺ-ն առաջին ընթերցմամբ ընդունել է «ԱԺ կանոնակարգ» սահմանադրական օրենքում փոփոխություններ կատարելու մասին «ՔՊ» խմբակցության ներկայացրած նախագիծը, որով առաջարկվում է պատգամավորների և ՄԻՊ-ի անձեռնմխելիության հաղթահարման հարցը քննարկել նաև արտահերթ նիստում։

Մասնավորապես, ԱԺ «Քաղաքացիական պայմանագիր» խմբակցության պատգամավորներ Արփի Դավոյանը և Հասմիկ Հակոբյանը նախագիծ են ներկայացրել՝ առաջարկելով փոփոխություններ կատարել «ԱԺ կանոնակարգ» սահմանադրական օրենքում։ Գործող օրենքով Գլխավոր դատախազը պատգամավորի եւ Մարդու իրավունքների պաշտպանի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին միջնորդագիրը կարող է ներկայացնել միայն Ազգային ժողովի առաջիկա հերթական նիստերում: Այժմ, «ՔՊ»-ական պատգամավորներն առաջարկում են հնարավորություն ընձեռնել՝ հարցը նաև արտահերթ նիստում քննարկելու համար։

«Այսինքն՝ եթե, օրինակ, դեպքը տեղի ունենա գարնանային նստաշրջանի վերջում, այսինքն՝ հունիսին, իրավապահ մարմինները հնարավորություն չեն ունենա սահմանված ժամկետներում կատարել իրենց պարտականությունները, քանի որ միջնորդագիրն Ազգային ժողովը կարող է քննարկել միայն սեպտեմբեր ամսին, այսինքն՝ երեք ամիս անց: Առաջարկվող լրացմամբ պատգամավորի եւ Մարդու իրավունքների պաշտպանի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին միջնորդագիրը քննարկվում է Ազգային ժողովի առաջիկա հերթական նիստում կամ կարող է քննարկվել ԱԺ արտահերթ նստաշրջանում կամ նիստում»,- հայտարարել էր պատգամավոր Հասմիկ Հակոբյանը՝ հավելելով, որ նախագծի ընդունմամբ միջնորդագրի քննարկման գործընթացը չի ձգձգվի՝ պայմանավորված միայն կարգավորումներով:

Արփի Դավոյանն էլ վստահեցրել էր, թե իբրև փոփոխությունները քաղաքական ենթատեքստ չունեն։ Օրենքի նախագիծը քննադատության է արժանացել ընդդիմադիր պատգամավորների կողմից, որոնք իրենց մտահոգություններն են հայտնել։
Այդուհանդերձ, ԱԺ-ն առաջին ընթերցմամբ հավանություն տվեց նախագծին։

Աղբյուր` Փաստինֆո