Փաստ ինֆո

Ես այս պահին տեղեկություն չունեմ, թե ինչ փուլում են Լաչինի միջանցքը բացելու շուրջ բանակցությունները, բայց տրամաբանական է, որ դրանք պետք է ընթանան, քանի որ ի սկզբանե պայմանավորվածություններն այնպիսին են եղել, որ Լաչինի միջանցքով երթևեկությունը պետք է վերականգնվի։ Հուսանք Ադրբեջանը տեր կլինի իր խոստմանը։ Այս մասին «Փաստինֆոյի» հետ զրույցում ասաց Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը։

«Մենք բազմիցս ասել ենք, որ կողմ ենք կոմունիկացիաների բացմանը, բայց անթույլատրելի է դիտարկել Աղդամի ճանապարհը և Լաչինի միջանցքը մեկ հարթակում։ Այս առումով, ես հույս ունեմ, որ Լաչինի միջանցքի բացումը պետք է տեղի ունենա ժամերի ընթացքում»,- ընդգծել է արցախցի պատգամավորը եւ ավելացրել. «Իրականությունն այն է, որ Արցախը՝ ի դեմս Արցախի իշխանությունների և նախագահի՝ կարողացավ որոշում ընդունել՝ հիմքում ունենալով այն հանգամանքը, որ մենք պետություն ենք, ընդ որում՝ քաղաքակիրթ, և մենք Արցախը չենք դիտարկում, որպես վանդակ, որտեղ 120 հազար մարդ է տեղաշարժվում»։

Պատգամավորն ընդգծել է, որ Արցախը  կողմ է և չի էլ կարող  հակառակվել կոմունիկացիաների բացմանը։ «Մենք ինչպե՞ս կարող ենք չընդունել Ստեփանակերտ-Հադրութ, Ստեփանակերտ- Քաշաթաղ, Ստեփանակերտ-Քարվաճառ ուղղություններով կոմունիկացիաների, ճանապարհների բացումը։ Բայց մենք, միաժամանակ, խոսել ենք այն մասին, որ եթե շարժ պետք է տեղի ունենա, ապա դա պետք է մեր պայմաններով տեղի ունենա։ Մի բան, որ տեղի ունեցավ նաև այս անգամ»,- նշել է Մ.Հակոբյանը եւ հատուկ ընդգծել, որ  Արցախի իշխանությունների որոշմամբ կայացվել է կոմպրոմիսային որոշում, որով Արցախ մտավ մեկ բեռնատար»։

Նրա արձանագրմամբ՝  մեկ բեռնատարը չնչին բան է և կարող է բավարարել միայն 100-ից քիչ ավելի ընտանիքների կարիքները։

«Հետևաբար, մենք չենք կարող նաև խոսել 120 հազար մարդու խնդիրները լուծելու մասին։ Սա ցուցադրություն է այն բանի, որ ոչ թե Արցախը պետք է հումանիտար բեռներով սովից փրկվի, այլ Քաշաթաղի միջանցքը պետք է ապաշրջափակվի ու վերականգնվի դրանով երթևեկությունը, որի արդյունքում հումանիտար բեռների կարիք Արցախը չի էլ ունենա։ Այստեղ հիմնական մեսիջը ոչ թե սոված մարդկանց խնդրի լուծումն է, այլև այն, որ սա քաղաքական որոշում էր, որի տրամաբանական շարունակությունը պետք է լինի Լաչինի միջանցքի ապաշրջափակումը»։

Պատգամավորի խոսքերով՝  Արցախում հիմա բոլորն են սպասում Լաչինի միջանցքի վերաբացման լուրին։  «Իհարկե, հայկական կողմի համար շատ կարևոր է, որ պայմանավորվածությունները պահվեն։ Իրականում, ես վստահ եմ, որ տեղի կունենա այն, ինչի համար մենք գնացինք այս որոշմանը»,- նշել է Մ. Հակոբյանը։

Հիշեցնենք, որ ռուսական Կարմիր խաչի միջոցով մեկ բեռնատար այսօր Ակնայի ճանապարհով հասել է Ստեփանակերտ: Ավելի վաղ ԱԺ «Պատիվ ունեմ» խմբակցության քարտուղար Տիգրան Աբրահամյանը լրագրողների հետ զրույցում հայտնել էր, որ բանակցություններն ընթանում են Արցախի ու Ռուսաստանի, Ռուսաստանի ու Ադրբեջանի միջև:

Աղբյուր` Փաստինֆո