Փաստ ինֆո

Բազմիցս ասել ենք ու կրկին վերահաստատում ենք, որ Ակնայի ճանապարհը որևէ դեպքում չպետք է դիտարկվի որպես նախապայման՝ Բերձորի միջանցքը բացելու համար և չի կարող լինել այլընտրանք՝ իրավական ու քաղաքական յուրահատուկ կարգավիճակ ունեցող Բերձորի միջանցքին։ Ամեն կերպ Ադրբեջանը փորձում է այլընտրանք դարձնել Ակնայի ճանապարհը․ նրա նպատակը պարզ է՝ կարճ ժամանակով բացել ու հետո կրկին փակել Բերձորի միջանցքը և ասել՝ ուզում եք, Երևան կարող եք գնալ Ակնայով։ Մեզ համար խիստ կարևոր ու առաջնահերթ հարցը մնում է Բերձորի միջանցքի՝ առանց նախապայմանների բացումը, քանի որ 2020թ․ նոյեմբերի 9-ին կնքված եռակողմ հայտարարությամբ այդ միջանցքը չպետք է որևէ դեպքում փակվեր։ Այդ մասին «Փաստինֆո»-ի հետ զրույցում ասաց Արցախի նախագահի խորհրդական, հատուկ հանձնարարությունների գծով ներկայացուցիչ Դավիթ Բաբայանը։

«Մեզ համար անընդունելի է Ադրբեջանից ցանկացած բան։ Ինչ վերաբերում է ռուսական Կարմիր Խաչի մեքենաների մուտքի թույլտվությանը՝ Ակնայի կողմից, որոշումը կայացվել է լուրջ քննարկումների արդյունքում՝ հաշվի առնելով, որ որոշակի դրական լիցքեր կարող է դա հաղորդել։ Ինչպես տեսանք, Ադրբեջանը այս անգամ ևս պայմանավորվածությունից հետ կանգնեց, շատ հնարավոր է՝ ի սկզբանե էլ մտադիր էր թույլ չտալ, որ ռուսական Կարմիր Խաչի մեքենան մտնի Արցախ։ Կրկին անգամ շեշտեմ, որ արցախահայության տեսլականը միանշանակ է ու շատ հստակ՝ Արցախը ոչ մի դեպքում Ադրբեջանի կազմում չի կարող լինել ու որևէ ադրբեջանական ապրանք չպիտի մտնի այստեղ»,-ասաց Բաբայանը։

Անդրադառնալով Արցախի 120 հազար բնակչության նկատմամբ էթնիկ զտում իրականացնող Ադրբեջանի հանդեպ միջազգային հանրության ու կառույցների վերաբերմունքին՝ Բաբայանը նկատեց՝ քաղաքական ու տեղեկատվական դաշտում ճնշում կա, բայց գործնական դաշտում՝ ոչ։

Աղբյուր` Փաստինֆո