Փաստ ինֆո

Մարդիկ տասնյակ հազարներով վրացական պետհամարանիշներով մեքենաներ են ներմուծել Հայաստան։ Դրա հետ կապված լուրջ անհանգստություն կա մեր հասարակության մեջ։ ԱԺ հերթական նիստին այս մասին հայտարարեց «Հայաստան» խմբակցության պատգամավոր Գառնիկ Դանիելյանը:

«Մասնավորապես, օրերս տեղեկություն ստացանք, որ ՊԵԿ-ը օրենսդրական նոր նախաձեռնություն է ուզում մտցնել, որով Հայաստանում վրացական համարանիշներով մեքենաները շահագործող մարդիկ պետք է հիմա մաքսազերծեն այդ մեքենաները։ Սկզբնական շրջանում երկու տոկոսի չափով էր, հետո դա դարձավ 4 տոկոսի չափով։ Մարդիկ լուրջ անհանգստություններ ունեն, որ այն մեքենաները, որոնք այսօր սպասարկվում են, օրենքն ընդունելու դեպքում ստիպված են լինելու դրանք տեղափոխել Վրաստանի տարածք և ստիպված, իրենց արժեքի կես գնով վաճառվեն, ինչը ֆինանսական լուրջ խնդիրներ կառաջացնի։ Մարդիկ վարկային մեծ միջոցներ են վերցրել»,-ասաց նա:
Որպես արձագանք, ՀՀ ՊԵԿ փոխնախագահ Արթուր Մանուկյանը ասաց, որ խոսքն այս դեպքում վերաբերում է թեթեւ մարդատար ավտոմեքենաներին, որոնք ժամանակավոր՝ մեկ տարի ժամկետով, ներմուծվում են Հայաստան: Նրա խոսքով՝ ժամանակավոր ներմուծման պայման է հանդիսանում նաեւ նախապես ապահովում ներկայացնելը:

«Քանի որ 365 օր անց էլ այդ մեքենաները շարունակում են մնալ ՀՀ, կառավարությունում ներկայումս քննարկվում է հարցի լուծման մի շարք տարբերակներ: Դա վերաբերելու է ոչ թե այն մեքենաներին, որոնք ներմուծվել են և պետք է պարտադիր մաքսազերծվեն, այլ ՊԵԿ-ի առաջարկն է այդ ապահովագրական ծածկույթը որպես ապահովում ներկայացնելու փոխարեն, կանխիկ գումարով դեպոզիտ ներկայացնել»,- ասաց նա։

ՊԵԿ փոխնախագահն արձագանքեց՝ հայտնելով, որ 2 և 4 տոկոս վճարումները պետական բյուջեի հետ որևէ կապ չունեն։

Ի՞նչ է իրականում տեղի ունենում։ Ներմուծվում են մեքենաներ, որոնց համար գույքահարկը ՀՀ-ում չի վճարվում, բնապահպանական հարկը ՀՀ-ում չի վճարվում, այդ մեքենաների համար ընդամենը ներկայացվում է ապահովագրական ծածկույթի տեսքով ապահովում եւ մեքենաները շարունակում են վարել Հայաստանում: Այս վիճակը կարգավորման կարիք ունի»,- եզրափակեց փոխնախարարը։

Աղբյուր` Փաստինֆո