Փաստ ինֆո

«Գլորիա» կարի ֆաբրիկայի տնօրեն Բագրատիոն Դարբինյանի դստեր՝ Դիանա Դարբինյանի սպանության և նրա ամուսնու նկատմամբ իրականացված սպանության փորձի գործով մեղադրյալ Լևոն Ավետիսյանը կշարունակի մնալ կալանավորված։ Վերաքննիչ քրեական դատարանը մերժել է նրա նկատմամբ ընտրված խափանման միջոց կալանավորումն անփոփոխ թողնելու դատարանի որոշման դեմ բողոքը։

Հիշեցնենք, որ դեպքը տեղի է ունեցել 2021 թվականի սեպտեմբերի 28-ին` ժամը 01։30-ի սահմաններում. Երևանի «Հաղթանակ» զբոսայգու դիմաց կրակոցներ են հնչել, ինչի հետևանքով մահացել է «Գլորիա» կարի ֆաբրիկայի գլխավոր տնօրեն Բագրատիոն Դարբինյանի դուստրը՝ 27-ամյա Դիանա Դարբինյանը, իսկ նրա ամուսինը՝ ստացել հրազենային վնասվածք։ Կրակահերթն արձակվել է ինքնաձիգից, ինչն արձանագրվել էր նաև դեպքի վայրին հարակից հատվածներում գտնվող անվտանգության տեսախցիկներով։ Տևական ժամանակ իրավապահները փնտրում էին ենթադրյալ հանցանքը կատարած անձանց։ Արդյունքում, դեպքից միայն 9 ամիս անց՝ մայիսի 9-ին, ՀՀ ոստիկանությունը պաշտոնապես հաղորդագրություն տարածեց՝ հայտնելով, որ Բելառուսի Հանրապետությունում հայտնաբերվել և մայիսի 7-ին Հայաստան է տեղափոխվել 24-ամյա Լևոն Ավետիսյանը, որը 2021 թ. օգոստոսի 3-ից հետախուզվում էր ՀՀ քրեական օրենսգրքի (2003թ) 34-104-րդ (Սպանության փորձը), 104-րդ (Սպանությունը) և մի շարք այլ հոդվածների մեղադրանքով:

Սպանության մեջ հիմնական մեղադրյալ Լևոն Ավետիսյանը Դիանա Դարբինյանի ամուսնու հետ բարեկամական կապ ունի։ Քրեական վարույթի շրջանակներում մեղադրյալի կարգավիճակում է նաև Լևոն Սահակյանը, որը , ըստ մեղադրանքի Լևոն Ավետիսյանի հանցակիցն է։

Քրեական գործն այժմ Երևանի ընդհանուր իրավասության դատարանի դատավոր Վարդան Գրիգորյանի վարույթում է։

Լևոն Ավետիսյանը, որին մեղսագրվում է սպանությունը, կալանքի տակ է։ Առաջին ատյանի դատարանը, քննելով Ավետիսյանի խափանման միջոց կալանավորումը գրավով փոխարինելու միջնորդությունը, հուլիսի 6-ին որոշում էր կայացրել այն մերժելու և կալանքն անփոփոխ թողնելու մասին; Օգոստոս ամսին փաստաբանը վերաքննիչ բողոք է ներկայացրել դատարանի որոշման դեմ՝ պահանջելով բեկանել առաջին ատյանի դատարանի որոշումը և Լևոն Ավետիսյանի նկատմամբ որպես խափանման միջոց կիրառել գրավը՝ գրավի չափ սահմանելով 90 մլն դրամը։ Վերաքննիչ դատարան ներկայացված բողոքը ևս մերժվել է։ Փաստաբան Ալեքսանդր Կոչուբաևը «Փաստինֆո»-ի հետ զրույցում հայտնեց, որ դիմել են ՄԻԵԴ, քանի որ խափանման միջոցի հիմքերն արդեն սպառվել են։ Փաստաբանը հայտնեց, որ նախաքննության փուլում Ավետիսյանը վեց ամիս գտնվել է կալանքի տակ, սակայն նրա մասնակցությամբ որևէ գործողություն չի եղել, իսկ գործը դատարան ուղարկվել է միայն այն պատճառով, որ լրացել է նախաքննության և նախաքննության ընթացքում կալանքի տակ պահելու առավելագույն ժամկետը։

Հեղինակ՝ Իզաբել Սահակյան

Աղբյուր` Փաստինֆո