Փաստ ինֆո

Աղդամով ադրբեջանական կողմից «հումանիտար» բեռներ տեղափոխելու ձախողված փորձերը խոսում են այն մասին, որ Արցախի ժողովուրդը շատ հստակ ներկայացրել է իր դիրքորոշումը, այն է՝ դեպի Արցախ մուտքի այլ ճանապարհ լինել չի կարող, բացի Բերձորի միջանցքից։ «Փաստինֆո»-ի հետ զրույցում այս մասին ասաց ադրբեջանագետ Արմինե Ադիբեկյանը։ Նրա խոսքով՝ Ադրբեջանի ճանապարհը ոչ թե մարդասիրական, տնտեսական զարգացման կամ մերձեցման ճանապարհ է, այլ ագրեսիայի և վտանգի ճանապարհ։

«Արցախցի մեր հայրենակիցներն իրենց անվտանգությունը շատ ավելի բարձր են դասում, քան Ադրբեջանի կեղծ «պադաչկաները»»,- ասաց նա։

Ադիբեկյանի գնահատմամբ՝ Աղդամով որևէ բեռ տեղափոխել ի զորու չլինելու իրավիճակն Ադրբեջանի համար միայն ժամանակավոր հարց է։ Թշնամական այդ երկիրը, նրա խոսքով, Արցախի տարածք կարող է մուտք գործել ցանկացած պահի։Նման քայլերից Ադրբեջանին զսպում է միայն միջազգային հարթակներում ագրեսորի համբավը մեղմելու ցանկությունը։ Միևնույն ժամանակ, փորձագետը ևս մեկ անգամ արձանագրեց, որ ագրեսորի համբավից ազատվելու փորձերն այնքան էլ արդյունավետ չեն, քանի որ այժմ Ակնայի կողմից «հումանիտար օգնություն» տեղափոխելու գործողությունները փորձում են իրականացնել այն նույն մարդիկ, որոնք անցած տարեվերջից, արգելափակելով Բերձորի միջանցքը, արցախցիներին սովահարության են մատնել։

«Ադրբեջանը ցանկացած պահի կարող է ոչ միայն բեռնատարներով գալ, այլ տանկերով։ Ըստ երևույթին, նա դեռևս պարզապես մեծ խաղացողների կողմից չունի թույլտվություն՝ դա իրականացնելու։ Երես փրկելու միջոցը «մարդասիրական» ճանապարհով իր նպատակներին հասնելու փորձերն են։ Հետևաբար, սա մի ծրագրի մաս է, որի շրջանակները բավականին նեղ են։ Իսկ փաստը, որ Ադրբեջանը պատրաստվում է ռազմական գործողությունների, որևէ մեկի համար գաղտնիք չէ, բացի ՀՀ իշխանություններից։ Նրանք համառորեն գերադասում են չնկատել այդ վտանգը»,- ասաց նա։

Թե այս իրավիճակը դեռևս որքան ժամանակ կշարունակվի ու ինչ իրադարձություններից հետո կարող է Ադրբեջանը որոշել ռազմական գործողությունների գնալ՝ Արմինե Ադիբեկյանը կանխատեսել չկարողացավ։ Դա պայմանավորեց այժմ էլ շարունակվող մի շարք գործընթացներով, որոնց մասին, ըստ նրա, բավարար տեղեկություններ առկա չեն։

«Ավելին, դրանց մասին մենք իմանում ենք, երբ դրանք արդեն տեղի են ունենում։ Դժվար է կանխատեսել, թե որքան ժամանակ դա կարող է տևել ու ինչպիսի կլինի ելքը»,- ասաց նա։

Անդրադառնալով Փաշինյան- Էրդողան բանակցություններին՝ Ադիբեկյանը տեսակետ հայտնեց, որ դրանք լինելու են նոր ազգադավ պայմանավորվածությունների մասին։

«Փաշինյանը խոսելու է Վայոց Ձորում, Սյունիքում ու Գեղարքունիքում Հայաստանի մի շարք, այդ թվում՝ նաև ադրբեջանական ԶՈՒ-երի կողմից Սյունիքում զավթած տարածքների հանձնման մասին։ Իմ տեղեկություններով, խոսքը վերաբերում է նաև Սևանի մի մասը հանձնելուն ու այսպես կոչված, «Զանգեզուրի միջանցքի» հետ կապված հարցի վերջնական իրագործմանը»,- ասաց նա։

Աղբյուր` Փաստինֆո