Փաստ ինֆո

Ադրբեջանը դիտավորյալ է տապալել ռուսական հումանիտար օգնությունն Արցախ հասցնելու գործընթացը՝ դրանով հիմքեր նախապատրաստելով Արցախի, զուգահեռ նաև՝ ՀՀ-ի նկատմամբ ագրեսիայի համար։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը։

Արցախի շուրջ իրադարձություններին Աբրահամյանն անդրադարձավ մի քանի հարթություններում, մասնավորապես, հիշեցրեց, որ կա ռուսական կառաջարկների փաթեթ՝ ուղղված Արցախում հումանիտար իրավիճակի մեղմացմանը, որի շուրջ նախնական պայմանավորվածություն է եղել, սակայն, երբ թվում էր, թե Ադրբեջանը և Արցախի իշխանությունները համաձայնություն են տվել, ավելի ուշ Ադրբեջանը հայտարարությամբ հանդես եկավ՝ ըստ էության մերժելով ռուսական առաջարկը, ավելին, առաջ քաշեց այնպիսի մոտեցումներ, որը խախտում էր ընդհանուր առաջարկի փիլիսոփայությունը, ինչի պատճառով հնարավոր չեղավ հումանիտար բեռները մուտք գործել Արցախի տարածք։

Աբրահամյանի խոսքով՝ Արցախի իշխանություններն աշխատել էին ռուսական կողմից հետ, ենթադրաբար ռուսական կողմն էլ փորձել է կապ հաստատել Ադրբեջանի իշխանությունների հետ՝ փորձելով իրավիճակը բերել նախնական պայմանավորվածությունների դաշտ, ինչը չի հաջողվել։ Դրա հետևանքը, Աբրահամյանի դիտարկմամբ, այն է, որ այսօր Լաչինի միջանցքը, որով նախատեսված էր հումանիտար բեռների փոխադրումը Գորիսից Ստեփանակերտ փաստացի ձախողվել է։ Աբրահամյանն առանձնացրեց Արցախում հումանիտար աղետի հարցը, ինչը, նրա գնահատմամբ, ծայրահեղ փուլում է, աղետի առումով իրավիճակը մոտենում է պիկին։ Բացի այդ, վերջին 10 օրվա ընթացքում լարվում է իրավիճակը նաև առաջնագծում։

Անդրադառնալով առաջարկին, համաձայն որի՝ Ակնայի ճանապարհը բացելուց հետո կբացվեր Լաչինի միջանցքը՝ Աբրահամյանը նկատեց, որ մինչև ռուսական վերջին առաջարկը Արցախից և ՀՀ-ից որոշ պաշտոնյաներ կարծիք էին հնչեցնում, որ Ակնայով առևտուր անելը, համատեղ ձեռնարկությունների աշխատեցնելը, ինչը, բնականաբար, ընդունելի լինել չէր կարող, ըստ այդմ, ռուսական վերջին առաջարկը կոմպրոմիսային էր։

Աբրահամյանի խոսքով՝ ըստ ռուսական կողմի ներկայացրած տարբերակի` ռուսական Կարմիր Խաչի միջոցով Ակնայի ուղղությամբ մեկ սիմվոլիկ բեռնատար պետք է մուտք գործեր, ինչից հետո էլ պետք է վերականգնվեր Լաչինի միջանցքի երթևեկությունը։
«Իհարկե, այդ երթևեկության վերականգնումն այս փուլում չէր ենթադրում երկկողմանի ազատ տեղաշարժի իրականացում, որը կար մինչև ապրիլի 23-ը, երբ ադրբեջանական անցակետ տեղադրված չէր, այլ վերաբերում էր ռուսական խաղաղապահների կողմից Գորիսից Ստեփանակերտի բեռների տեղափոխությանը: Առաջարկը ներկայացվել է որպես նաև Ադրբեջանի կողմից համաձայնեցված տարբերակ, բայց ավելի ուշ Ադրբեջանը դեռևս անհայտ պատճառներով անհամաձայնություն է հայտնել այդ առաջարկի վերաբերյալ, ներկայացրել նոր պահանջներ, այն է՝ միայն Աղդամի ճանապարհի բացում և ռուսական ուղեբեռից բացի, նաև ադրբեջանական Կարմիր մահիկի բեռնատարների մուտք դեպի Արցախի Հանրապետության տարածք»,- ասաց Աբրահամյանը։
Ըստ նրա՝ Արցախի իշխանությունները պատրաստ են բանակցելու, բայց կան կոնկրետ սկզբունքներ, որոնք որևէ պայմանում չեն խախտվելու:

Ինչ վերաբերում է բեռը Արցախ հասցնելու գործընթացի տապալման պատճառներին, ապա Աբրահամյանը չբացառեց, որ սրանում կա նաև աշխարհաքաղաքական որոշակի ազդեցություն, քանի որ սա ռուսական առաջարկն է եղել, և Թուրքիան կամ այլ դերակատարներ Թուրքիայի միջոցով տապալել են այս գործընթացը։ Բացի այդ, Աբրահամյանը գտնում է, որ Ադրբեջանը տապալել է գործընթացը՝ դրանով հիմքեր նախապատրաստելով Արցախի, զուգահեռ նաև՝ ՀՀ-ի նկատմամբ ագրեսիայի համար։

Աղբյուր` Փաստինֆո