Փաստ ինֆո

Աղդամից որևէ հումանիտար բեռ, լինի ռուսական ծագման, ադրբեջանական կամ որևէ այլ երկրից՝ չի մտելու Արցախ։ Այս մասին մասին «Փաստինֆո»-ի հետ զրույցում ասաց, Ակնա -Ստեփանակերտ ճանապարհին հսկողություն իրականացնող արցախցի Վլադ Բալայանը։

«Մենք շարունակում ենք հսկողություն իրականացնել ճանապարհին, թե իշխանությունների կողմից ինչ պայմանավորվածություն կա՝ մեզ հետաքրքիր չէ, եթե Արցախոմ կա մեկն, ով ասում է, որ Ադրբեջանից եկող հումանիտար բեռը պետք է հասնի Արցախ, ապա ես նման մարդկանց չեմ կարող ընդունել, այդ թվում՝ որպես ղեկավար։ Մեր սկզբունքային դիրքրումը նույնն է։ Եթե հումանիտար օգնություն պետք է հասնի Արցախ, ապա միայն Մայր Հայաստանից»։

Անդրադառնալով Ադրբեջանի կողմից պայմանավորվածությունը խախտելուն և ռուսական բեռի արգելափակմանը Ադրբեջանում՝ նա ասաց, որ Ալիևի այդ գործելաոճն իրեն չի զարմացնում։ «Պայմանավորվածությունների խախտումն էլ Ալիևի ձեռագիրն է, զարմանալու ոչ մի բան չկան, բայց մեզ համար դա արդեն միևնույն է։ Ուզում եմ ասել, որ եթե Ադրբեջանը չբացի Լաչինի միջանցքը, մենք ենք այն բացելու, մեր հայրանակիցներով։ Ալիևը արդեն աշխարհով մեկ խայտառակ է եղել, նա նախ հայտարարեց, որ Արցախում հումանիտար բեռների կարիք չկա ու արգելեց Ֆրանսիայի ուղարկած բեռների մուտքը, հիմա էլ ինքն է փորձում Աղդամով Արցախ հումանիտար բեռ փեղափոխել։ Այս ճանապարհը չի բացվելու, մինչև Հայաստանից ուղակված բեռները չհասնեն Արցախ, դրանից հետո միայն կմտածենք՝ հեռանալ այստեղից, թե շարունակենք հսկել»։

Նրա փոխանցմամբ` 2020 թ-ի պատերազմից հետո՝ ռուսական կողմն իր կարիքների համար այդ ճանապարհը շահագործել է։ «Օդանավակայանը սարքելու ժամանակ, վագոնչիկինեը, որոնցով կազարմա էին սարքում՝ ռուսներն այս ճանապարհով էին բերում Արցախ, բայց նույնիսկ այդ ժամանակ, որևէ ադրբեջանական բեռ չի անցել»։

Հիշեցնենք, որ նախօրեին ռուսական և ադրբեջանական լրատվամիջոցներն հայտնեցին, որ Ռուսաստանն Ակնա-Ասկերան ճանապարհով հումանիտար բեռ է ուղարկում Արցախ։ Նշվում էր, որ մեկ բեռնատար բեռը ռուս-ադրբեջանական սահմանը հատել է ժամը 14։30-ին մոտ, դրանից հետո այն շարժվում է դեպի Բաքու, այնտեղից էլ Ակնա-Ասկերան։ Ավելի ուշ Արցախի տեղեկատվական շտաբն հայտնեց, որ Արցախի Հանրապետության իշխանությունները, ելնելով Ադրբեջանի կողմից իրականացվող լիակատար շրջափակման հետևանքով առաջացած սուր հումանիտար խնդիրները մեղմելու անհրաժեշտությունից, որոշել են թույլ տալ Ասկերան քաղաքով ռուսական բեռների մուտքը մեր հանրապետություն: Միաժամանակ` ընդգծվել էր, որ ձեռք է բերվել պայմանավորվածություն, համաձայն որի՝ Լաչինի միջանցքով վերականգնվելու են հումանիտար բեռնափոխադրումները ռուս խաղաղապահների ու Կարմիր խաչի միջազգային կոմիտեի կողմից:

Սակայն Ադրբեջանը խախտել է պայմանավորվածությունն ու չի բացել Լաչինի միջանցքը, ռուսական բեռնատարն էլ Արցախ չի մտել` Ակնայից: Արցախի նախկին պետնախարար Արտակ Բեգլարյանն այսօր հայտնել էր, որ ռուսական օգնությունն արգելափակված է Ադրբեջանում։

Աղբյուր` Փաստինֆո