Փաստ ինֆո

Մեկնարկել է Դատավորների ընդհանուր ժողովի արտահերթ նիստը, որի օրակարգում Էթիկայի և կարգապահական հարցերի հանձնաժողովի անդամների ընտրության հարցն է։

Հիշեցնենք, որ դատավորներ Արման Հովհաննիսյանը, Հովիկ Շահնազարյանը, Մերի Համբարձումյանը և դատավոր չհանդիսացող անդամ Դավիթ Հակոբյանը Էթիկայի և կարգապահական հարցերի հանձնաժողովի անդամ են ընտրվել 2020թ. հուլիսի 31-ին՝ երեք տարի ժամկետով։
Վճռաբեկ դատարանի նախագահ Լիլիթ Թադևոսյանի նախաձեռնությամբ՝ սեպտեմբերի 8-ին հրավիրվել է Դատավորների արտահերթ ընդհանուր ժողովի նիստ, որի օրակարգում հանձնաժողովի անդամների ընտրության հարցն է։

Նկատենք, որ Էթիկայի և կարգապահական հարցերի հանձնաժողն օժտված է դատավորների նկատմամբ կարգապահական վարույթներ հարուցելու լիազորությամբ, ըստ այդմ, չի բացառվում, որ իշխանությունները հանձնաժողովում ևս փորձեն ներառել «յուրայինների»՝ դատավորների նկատմամբ իրականացվող ճնշումների հարցում հանձնաժողովը որպես գործիք կիրառելու նպատակով, ինչը նախկինում չէր ստացվում։

«Փաստինֆո»-ն արդեն տեղեկացրել էր, որ դատավորներ Արման Հովհաննիսյանը, Հովիկ Շահնազարյանը, և դատավոր չհանդիսացող անդամ Դավիթ Հակոբյանը պատրաստվում են նորից առաջադրվել։ Դավիթ Հակոբյանի թեկնածությունը կրկին ներկայացվել էր, սակայն նրա առաջադրման փաստաթղթերը ԲԴԽ ստեղծած մրցութային հանձնաժողովը չի ընդունել, այլ հաստատել է «Հելսինկյան քաղաքացիական ասամբլեայի Վանաձորի գրասենյակ» ՀԿ-ի կողմից առաջադրված Անի Ժիրայրի Չատինյանի թեկնածությունը։

Երևանի քրեական դատավոր Արման Հովհաննիսյանը ևս առաջադրված է, այժմ քննարկվում է նրա թեկնածությունը, սակայն մամուլում շրջանառվող լուրերի համաձայն՝ ԲԴԽ նախագահ Կարեն Անդրեասյանը նախ փորձել է առաջ մղել քրեական մասնագիտացմամբ իր թեկնածուին՝ Արմավիրի մարզի ընդհանուր իրավասության դատարանի դատավոր Մակար Կիրակոսյանին, որը հրաժարվել էր առաջադրումից։ Քրեական մասնագիտացմամբ այլ դատավորները եւս, հիմնականում, հրաժարվել են ներկայացնել իրենց թեկնածությունը՝ չցանկանալով Արման Հովհաննիսյանի դեմ առաջադրվել, համենայն դեպս՝ այս պահին առաջադրված այլ թեկնածուի անուն հայտնի չէ։ Կարեն Անդրեասյանի նախաձեռնությամբ, սակայն, շրջանառվող լուրերի համաձայն՝ փորձել են բարձրացնել դատավոր Արման Հովհաննիսյանի առաջադրման անհնարինության հարց։ Լրագրողների հետ զրույցում դատավոր Արման Հովհաննիսյանը նշեց, որ մամուլից է տեղեկացել իր թեկնածության հետ կապված խնդիր տեսնելու հետ կապված, եթե դա իսկապես այդպես է, ապա չգիտի՝ ինչով է դա պայմանավորված, դատավորը, համենայն դեպս, ընդգծում է, որ գտնում է՝ Հանձնաժողովում լավ է աշխատել։

Իսկ թե ինչու իր և ԲԴԽ-ի «ջրերը մեկ առվով չեն հոսում», Հովհաննիսյանը նշում է, որ ինքը որևէ խնդիր չունի իրենց հետ։

«Չգիտեմ՝ սիրում են, թե չեն սիրում։ Շատ ուրախ եմ, որ ինչ-որ մեկի թեկնածուն չեմ, ես օրենքով առաջադրված թեկնածու եմ և դրանով պայմանավորված, ինչպես աշխատել եմ, այդպես էլ շարունակելու եմ աշխատել»,-նշեց Արման Հովհաննիսյանը։

Նշենք, որ քաղաքացիական մասնագիտացմամբ դատավոր անդամի թեկնածուները երկուսն են՝ Հովիկ Շահնազարյանը և Վարազդատ Միքայելյանը, վարչական մասնագիտացմամբ թեկնածուները՝ ևս։ Վարչական դատարանից առաջադրվել են Ռուզաննա Ազրոյանը և Գոռ Մինասյանը։

Հեղինակ՝ Իզաբել Սահակյան

Աղբյուր` Փաստինֆո