Փաստ ինֆո

Թուրքիայից ամեն պահ կարելի է ակնկալել ագրեսիայի տարբեր դրսևորումներ ու պատերազմական գործողություններ և այդ գործում սատարում Ադրբեջանին։ «Փաստինֆո»-ի հետ զրույցում այս մասին ասաց թուրքագետ Ռուբեն Մելքոնյանը՝ անդրադառնալով Էրդողանի հայտարարությանը, թե «Հայաստանը Կովկասում սադրիչ գործողություններ է իրականացնում»։

«Նմանատիպ տերմիններ Թուրքիան հաճախ կիրառել է տարատեսակ հարձակումներից և ագրեսիաներ իրականացնելու առաջ՝ թե՛ Հայաստանի ու Սիրիայի պարագայում, թե՛ այլ պետությունների դեպքում»,- ասաց նա։
Ըստ թուրքագետի՝ արտաքին ճակատում Թուրքիան ակնհայտ թշնամական պետություն է, և Հայաստանի հետ խաղաղություն ու առանց նախապայմանների հարաբերություններ հաստատելու մասին հայտարարությունները, որևէ կապ չունեն իրականության հետ։

Նա Թուրքիայի ղեկավարի այս պահվածքը դիտարկում է նաև օրերս Ռուսաստանի հետ բանակցությունների ձախողման համատեքստում։ Մելքոնյանի խոսքով՝ իր համար ցանկալի արդյունքին չհասնելով՝ Էրդողանը փորձելու է մեկ այլ հարթությունում խնդիրներ ստեղծել Ռուսաստանի համար։ Այս առումով չի բացառվում Թուրքիայի կողմից Հարավային Կովկասում լարվածություն հրահրելու հավանականությունը՝ հաշվի առնելով նաև Հայաստանի նկատմամբ Թուրքիայի թշնամական տրամադրվածությունը։

Հիշեցնենք, որ սեպտեմբերի 4-ին Սոչիում կայացած հանդիպման ընթացքում երկու երկրների ղեկավարները չէին կարողացել համաձայնության գալ «Հացահատիկային գործարքի» շուրջ ընթացող բանակցություններում։ Պուտինը հայտարարել էր, որ ՌԴ-ն չի վերադառնալու այդ գործարքին, քանի որ ռուսական գյուղատնտեսական արտադրանքի իրացման խոչընդոտները վերացված չեն։

«Ինչ վերաբերում է ներքին ճակատին, ապա իշխող վարչախմբի կողմից ռուս- հայկական հարաբերություններում տեղի ունեցող հայտարարությունները, ինչպես նաև Ուկրաինայի հանդեպ բավականին անհասկանալի դրական մոտեցումները՝ հատկապես այս իրավիճակում, կարող եմ ուղղակի անվանել արկածախնդրություն։ Սա լի է նոր ու անկանխատեսելի վտանգներով։ Այս պարագայում ՌԴ-ի հետ հարաբերություններն այսքան վատացնել և թուրքական սպառնալիքի պարագայում հույս ունենալ, որ մենք կարող ենք ինչ-որ աջակցության՝ Ռուսաստանից կամ ՀԱՊԿ-ից՝ պարզապես անիրատեսական է»,- ասաց նա՝ հավելելով, որ Հայաստանն այս պահին գտնվում է արտաքին ու ներքին շարունակական վտանգների ներքո, և որքան արտաքին, այնքան էլ ներքին վտանգներն են Հայաստանի համար կենսական։ Նրա խոսքով՝ ամենամեծ վտանգը, որին ՀՀ-ն բախվել է երկրի իշխող ուժն ու նրան սատարող քաղաքական ուժերն ու հասարակության մի հատվածը։

«Այս իրավիճակից դուրս գալու առաջին քայլը պետք է լինի ներկա իշխող վարչախմբից ազատվելը, որովհետև այս իշխանության պարագայում Հայաստանը զրկված է մանևրելու հնարավորությունից։ Բայց, փորձելով մի փոքր ավելի օպտիմիստ լինել, կարծում եմ, որ աշխարհաքաղաքական իրավիճակն ինչպես մեզ համար սպառնալիքներ է ստեղծում, այնպես էլ կարող են լինել հնարավորության փոքր պատուհաններ՝ կապված տարբեր երկրների շահերի բախումների հետ, որոնք Հայաստանը կարող է ծառայեցնել իր շահերին։ Բայց, դրա համար պետք են հմուտ քաղաքական գործիչներ, դիվանագետներ, որոնց բացակայությունն այս պահին ակնհայտ է Հայաստանի կառավարության մեջ»,- ասաց նա։

Աղբյուր` Փաստինֆո