Փաստ ինֆո

ՀՀ Էկոնոմիկայի նախարար Վահան Քերոբյանը գտնում է՝ անհավասար մրցակցային պայմաններում է գտնվում «Wildberries»-ը՝ վատ իմաստով։

Հիշեցնենք, որ այսօր առավոտից կառավարության շենքի դիմաց բողոքի ակցիա են իրականացնում առևտրականները, որոնք պահանջում են Հայաստանում փակել «Wildberries» օնլայն առևտրի ծառայությունը՝ հայտարարելով, թե մրցակցային անվահասար պայմաններ են։

Էկոնոմիկայի նախարարը, մինչդեռ, գտնում է, որ իրականում հենց «Wildberries»-ն է անհավասար պայմաններում գտնվում՝ վատ իմաստով, քան՝ տեղական փոքր և միջին ձեռնարկությունները։

«Աշխարհում առևտուրը փոխվում է, ԱՄՆ-ում խոշոր առևտրային ընկերությունները դադարեցրել են իրենց գործունեությունը օնլայն առևտրի զարգացմանը զուգընթաց»,- լրագրողների հետ զրույցում ասաց Քերոբյանը՝ անդրադառնալով առևտրականների դժգոհություններին։

Հարցին՝ ինչպես է լինում, որ ԵԱՏՄ երկրից ապրանքը մեզ մոտ է գալիս 6-7 անգամ էժան, սակայն առևտրականները հայտնում են, որ այդ հնարավորությունն իրենք չունեն, Քերոբյանը նշեց. «Նախորդ տարի մենք ստեղծել ենք այն պայմանները, որ բոլորը հավասար հարկային դաշտում լինեն: Այսինքն, երբ Wildberries-ը ապրանք է ներմուծում կամ սպառողը ապրանք է գնում Wildberries-ից, ԱԱՀ-ի պարտավորությույնը արդեն տեղափոխվում է Հայաստան: Wildberries-ը պարտավոր է վճարել արդեն ԱԱՀ վաճառքի համար: Այն, ինչ փոքր ու միջին ձեռնարկատերերը չեն մուծում: Այսինքնб կարելի է ասել, որ Wildberries-ն է գտնվում անհավասար մրցակցային պայմաններում՝ վատ իմաստով, քան տեղական փոքր ու միջին ձեռնարկությունները: Բնականաբար, գնային տարբեր առաջարկը որ կա, մենք տասնյակ տարիներ քննարկում ենք, մեծ սուպերմարկետները ապրանքն ավելի էժան են վաճառում, քան փոքր խանութները գնում են այդ ապրանքները»:

Նախարարի խոսքով՝ հիմա ուսումնասիրություն են կատարում, որպեսզի հասկանան՝ արդյոք մրցակցության խաթարում կա՞, թե՝ ոչ, միաժամանակ Քերոբյանն առաջարկեց դիմել Մրցակցային պաշտպանության հանձնաժողով և այնտեղ փորձել լուծել իրենց խնդիրները:

Աղբյուր` Փաստինֆո