Փաստ ինֆո

«Քաղաքացիական պայամանագիր» կուսակցության համակիրների կողմից «ԱԺԲ»-ի աջակիցների վրա հարձակման դեպքի առթիվ նախաձեռնվել է քրեական վարույթ՝ ֆիզիկական ներգործության և խուլիգանության հատկանիշներով։

Հիշեցնենք, որ «ԱԺԲ»- ն սեպտեմբերի 4-ին տեսանյութ է տարածել՝ ահազանգելով, որ Մալաթիա-Սեբաստիա վարչական շրջանում ՝ Քաղաքացիական պայմանագիր կուսակցության նախընտրական շտաբի մոտ, շտաբի անդամները և ՔՊ-ի համակիրները հարձակվել են Նիկոլ Փաշինյանի հեռացման շարժման անդամների վրա, ովքեր իրականացնում էին սեպտեմբերի 7-ին սպասվող հանրահավաքի իրազեկում։

«Տևական ժամանակ միջադեպի վայրում չեն եղել ոստիկաններ կամ այլ իրավապահներ, և ՔՊ-ականներին և նրանց համակիրներին հաջողվել է ֆիզիկական ու հոգեբանական բռնություն գործադրել Փաշինյանի հեռացման շարժման անդամների նկատմամբ։
Գործի են դրվել ձեռնամարտի հնարքներ՝ հարվածներ ոտքերով, քաշքշոցներ, հարձակվել են կանանց վրա, հայհոյել իրազեկման մասնակիցներին, դրսևորել խուլիգանական վարքագիծ։

Հանցավոր գործողությունները կատարվել են տեսախցիկների առաջ՝ ուղիղ եթերում և ցուցադրաբար, որով հանցավոր անձինք ի ցույց են դրել իրենց անպաժելիությունն ու արհամարանքը հանրության նկատմամբ»,- նշված է հաղորդագրությունում։
Դեպքի առնչությամբ «ԱԺԲ»-ն նաև հանցագործության մասին հաղորդում է ներկայացրել, ինչի հիման վրա նախաձեռնվել է քրեական վարույթ։

«Ստացվել է հաղորդում Երևան քաղաքի Կուրղինյան փողոցում «Ազգային ժողովրդավարական բևեռ» քաղաքական կազմակերպության անդամների կողմից իրականացվող քարոզարշավի ընթացքում վերջինիս մասնակիցների և նրանց մոտեցած մի խումբ անձանց միջև առաջացած վիճաբանության մասին, որի ժամանակ տեղի է ուենցել քաշքշուկ, մասնակիցները հարվածել են միմյանց, հնչեցրել սեռական բնույթի հայհոյանքներ»,- «Փաստինֆո»-ի հետ զրույցում ասաց ՀՀ ՔԿ նախագահի մամուլի քարտուղար Գոռ Աբրահամյանը՝ հավելելով, որ նշված հասցեից ոստիկանության Մալաթիայի բաժին են բերվել միջադեպի մասնակից՝ մեկ տասնյակից ավելի անձինք, որոնք ավելի ուշ ազատ են արձակվել։

Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 195-րդ հոդվածի 1-ին մասով (ֆիզիկական ներգործություն), 297-րդ հոդվածի 2-րդ մասի 1-ին կետով (Մի խումբ անձանց կողմից կատարված խուլիգանությունը), կատարվում է նախաքննություն։

Ի. Ս.

Աղբյուր` Փաստինֆո