Փաստ ինֆո

Կրեմլը համաձայն չէ Հայաստանի վարչապետ Նիկոլ Փաշինյանի՝ Լեռնային Ղարաբաղում խաղաղապահ առաքելության ձախողման և տարածաշրջանից Ռուսաստանի դուրսբերման մասին հայտարարության հետ։ Այս մասին ասել է ՌԴ նախագահի մամուլի քարտուղար Դմիտրի Պեսկովը։

«Ռուսաստանը այս տարածաշրջանի բացարձակապես անբաժանելի մասն է, ուստի չի կարող որևէ տեղ հեռանալ, Ռուսաստանը չի կարող լքել Հայաստանը»,- ասել է պաշտոնյան։

Նա այսպես է մեկնաբանել իտալական La Repubblica թերթին տված Փաշինյանի հարցազրույցը, որում նա, մասնավորապես, հայտարարել է, թե իբր Ռուսաստանը ինքն է դուրս գալիս տարածաշրջանից։

Պեսկովը հորդորել է չմոռանալ, որ «Ռուսաստանում ավելի շատ հայեր են ապրում, քան բուն Հայաստանում», որոնց մեծ մասը հայրենասեր քաղաքացիներ են, որոնք ներդրում ունեն երկրի զարգացման գործում։

«Ռուսաստանը շարունակում է հետևողական, շատ կարևոր դեր խաղալ այս տարածաշրջանում իրավիճակի կայունացման և հակամարտությունների կարգավորման գործում: Եվ մենք կշարունակենք խաղալ այդ դերը», - հավելել է Կրեմլի խոսնակը:

Կարևոր է, որ տարածաշրջանի բոլոր պետությունները հավատարիմ մնան 2020 թվականի եռակողմ համաձայնագրերին՝ նշել է նա։

«Իհարկե, դրանից հետո տեղի ունեցան նոր իրադարձություններ, որոնք մի փոքր փոխեցին իրավիճակը, բայց դա չի նշանակում, որ Ռուսաստանը պատրաստվում է ինչ-որ կերպ սահմանափակել իր գործունեությունը»,- եզրափակել է Պեսկովը։

Աղբյուր` Փաստինֆո