Փաստ ինֆո

Մի քանի օրից կմեկնարկի «Մաթեմիկն Արցախում» ծրագրի չորրորդ փուլը։ Արցախի տարբեր դպրոցներում սովորող շուրջ 500 աշակերտ կկարողանա դպրոցական առարկաների շրջանակում լրացուցիչ գիտելիք ձեռք բերել, տարբեր ոլորտների վերաբերյալ  մասնագիտական խորհրդատվություն ստանալ աշխարհի տարբեր կետերում ապրող հայ մասնագետների օգնությամբ։

«Ներկա դրությամբ մոտավորապես 250 ուսուցիչ է կամավորագրվել ու միացել ծրագրին։ Նրանց 60-70 տոկոսը ներկա պահին աշխատում են տարբեր դպրոցներում։ Այսինքն՝ այդ մարդիկ պատրաստակամություն են հայտնել շաբաթական մի քանի ժամ տրամադրել Արցախում ապրող դպրոցականներին՝ կոնկրետ ընտրված առարկայի վերաբերյալ գիտելիք փոխանցելով։ Ծրագրի մասնակցության հայտը 390 աշակերտ արդեն լրացրել է, մինչև օրվա ավարտը կհասնի 400-ի։ Առավելագույն թիվը, որ կարող ենք, այսպես ասած, սպասարկել, 500 աշակերտն է։ Քանի որ Արցախում հիմա կապի որակը շատ վատ է, հաճախակի խափանումներ են լինում, խմբակային պարապմունքներ, ցավոք, արդեն հնարավոր չի անցկացնել․ ստիպված յուրաքանչյուր ուսուցիչ մեկ կամ երկու աշակերտի հետ է աշխատում»,-«Փաստինֆո»-ի հետ զրույցում ասում է «Մաթեմիկ» ՀԿ հիմնադիր տնօրեն, մաթեմատիկայի ուսուցիչ Տիգրան Առուշանյանը։

«Մաթեմիկն Արցախում» ծրագիրը, որն իրականացվում է 2021թ․ հոկտեմբերից, արդեն շուրջ 450 շրջանավարտ ունի։ 6-ամիս տևողությամբ ծրագրի նախորդ երեք փուլերի համեմատ՝ այս տարի աննախադեպ շատ են դիմորդները։

Առուշանյանը նշում է՝ երրորդ փուլով նախատեսում էին ավարտել ծրագիրը, բայց իրավիճակն ու ՝ «Մաթեմիկն Արցախում» նախորդ ծրագրերին մասնակցած Արցախի դպրոցականների ծնողներից ստացված բազմաթիվ նամակ-խնդրանքները՝ շարունակելու այն, կազմակերպիչներին ստիպել է չորրորդը ևս մեկնարկել։

«Հայտը դեռ բաց է ու, ինչպես նշեցի, մինչև 500 աշակերտ կընդունենք։ Ծնողների խնդրանքով այս անգամ դիմորդներ ենք ընդունել 3-րդ դասարանից սկսած, նախորդները 5-րդից էինք ընդունում։ Կարևոր այն է, որ դպրոցում դասավանդվող առարկաներից զատ, նաև ծրագրավորում, մեդիագրագիտություն ու այլ կարևոր ոլորտների վերաբերյալ են երեխաները գիտելիքներ ստանում։ Մեր բազմաթիվ շրջանավարտներ այս ծրագրով ձեռ բերված գիտելիքների շնորհիվ՝ այսօր արդեն աշխատում են։ Մի քանի սկզբունքներ կան, որոնք պարտադիր պահպանվում են․ օրինակ՝ քաղաքական զրույցներ, թեմայի հետ կապ չունեցող քնարկումներ չեն ակրող լինել դասերին։ Դա չի նշանակում, թե վերլուծական մտքի զարգացումը թերագնահատում ենք։ Ամենևին․ շեշտը դրված է նաև երեխաների մոտ վերլուծական կարողությունների զարգացման վրա։ Ուսուցիչը մոտիվացիայի աղբոյւր պետք է լինի աշակերտի համար ու նպաստի նրա արժեհամակարգի ձևավորմանը»,-ասում է Առուշանյանը։

Արցախում պաշարման պայմաններում ապրող երեխաների կրթության իրավունքը ոտնահարված է շուրջ տաս ամիս։ Թեև սեպտեմբերի 1-ին բոլոր ուսումնական հաստատությունները բացվել են, բայց հավանականությունը մեծ է, որ տրանսպորտի բացակայության, սննդի խիստ սղության, գրենական պարագաների բացակայության պատճառով դպրոցները նորից կփակվեն․․․ Այդ դեպքում «Մաթեմիկն Արցախում»-ի պես ծրագրերի կարիքն օդ ու ջրի պես է լինելու։ Առուշանյանը նկատում է՝ սիրով է՛լ ավելի շատ աշակերտների կներգրավեր ծրագրում, բայց կամավորագրված մասնագետների թիվը թույլ չի տալիս ավելի շատ երեխաների ընդգրկել՝ որքան էլ որ ցանկությունը մեծ լինի։ Շեշտում է՝ այդ դեպքում կրթության որակը կտուժի։  Համենայնդեպս, կարևոր խնդիր լուծող ծրագրին միանալու հնարավորություն դեռ կա, ու այն մասնագետները, որոնք այս կամ այն ոլորտի գիտակ են ու ցանկանում են մաս կազմել այդ կարևոր գործին, կարող են միանալ։

Աղբյուր` Փաստինֆո