Փաստ ինֆո

Սահմանային Երասխ գյուղում մետալուրգիական գործարանի ճակատագիրը մշուշոտ է, արդեն մի քանի ամիս է, ինչ կառուցման աշխատանքները ընդհատվել են, իսկ ՀՀ Էկոնոմիկայի նախարարությունը հրաժարվում է քայլեր ձեռնարկել՝ իրավիճակին հանգուցալուծում տալու համար։

«Փաստինֆո»-ն հարցում էր ուղարկել ՀՀ Էկոնոմիկայի նախարարություն՝ պարզելու համար, թե արդյո՞ք կա որոշում՝ Երասխի մետալուրգիական գործարանն այլ տարածք տեղափոխելու վերաբերյալ, և, թե ինչ տարածքի մասին է խոսքը։

«Փաստինֆո»-ն նաև հետաքրքրվել էր, թե մինչև սահմանային հատվածում գործարանի կառուցումն արդյո՞ք կանխատեսվել էր թշնամու հնարավոր սադրիչ գործողությունները՝ հաշվի առնելով Քարվաճառի (Սոթք) ոսկու հանքի պատմությունը։

«ՀՀ օրենսդրության շրջանակում սեփականատերերն իրենք են որոշում գործարանի կառուցման, տեղափոխման վայրը՝ ելնելով գործունեության նպատակահարմարությունից»,- հակիրճ պատասխանել են ՀՀ Էկոնոմիկայի նախարարությունից։

Հատկանշական է, որ նախօրեին, ՀՀ փոխվարչապետ Մհեր Գրիգորյանն, անդրադառնալով Երասխի գործարանի վերաբերյալ լրագրողների հարցերին, վստահեցրեց, որ «ամեն ինչ կարվի որպեսզի ներդրողն ունենա լիարժեք կոնֆորտ ու ներդրումը չվտանգվի»։

Այս ֆոնին, այդ նույն պատկան մարմինների շրջանակը կազմող նախարարությունը ձեռքերը բացահայտ լվանում է ու մի կողմ քաշվում՝ հայտարարելով, թե իր գործը չէ։ Ըստ Քերոբյանի գլխավորած նախարարության տրամադրած պատասխանի՝ ստացվում է մեր երկրում ով որտեղ ուզի կարող է գործարան կառուցել ու պետությունը չունի որեւէ դերակատարում։

Հիշեցնենք, որ սահմանային Երասխ գյուղի տարածքում կառուցվող գործարանն անցած ամիսներին մշտապես ենթարկվում է թշնամական ԶՈՒ-երի թիրախավորմանը։ Գործարանի աշխատանքներն արդեն տևական ժամանակ պարալիզացված են։

Վերջին շրջանում լուրեր էին տարածվում գործարանն այլ՝ ավելի անվտանգ տարածք տեղափոխելու մասին։ Այդ նույն տեղեկությունների համաձայն, դիտարկվող վայրերից մեկն Արարատ քաղաքի մոտակա տարածքն է։

Այդուհանդերձ, «Փաստինֆո»-ի հետ վերջին զրույցում գործարանի ներկայացուցիչը ո՛չ հերթել, ո՛չ հաստատել էր տեղափոխման մասին լուրերը։

Աղբյուր` Փաստինֆո