Փաստ ինֆո

Իսրայելի Ուրդա օդանավակայանից, վերջին չվերթներով Գյանջա (հայկական Գանձակ – խմբ) տեղափոխված զինամթերքն, ըստ ամենայնի, տեղակայվելու է Վարդենիսի ուղղությամբ։ Ադրբեջանը դրանով նպատակ ունի հնարավոր մարտերի դեպքում դրանք ունենալ մոտ տարածությունում։ «Փաստինֆո»-ի հետ զրույցում նման կարծիք է հայտնել Մերձավորարեւելյան տարածաշրջանի հարցերով փորձագետ, պատմաբան Սերգեյ Մելքոնյանը՝ նշելով, որ  իրենց կողմից իրականացվող մոնիթորինգի արդյունքներով  այս դեպքում զենքի նոր տեսակների վերաբերյալ որևէ տեղեկություն չկա։

Նրա խոսքով՝  Ադրբեջանն, ըստ ամենայնի, շարունակելու է կիրառել արցախյան վերջին պատերազմի  ժամանակ համեմատաբար արդյունավետ  կիրառություն ունեցած HAROP ԱԹՍ-ները, որոնք շատ ավելի էֆեկտիվ էին այդքան քննարկված բայրաքթարներից։ Միևնույն ժամանակ,  մասնագետն ուշադրություն հրավիրեց Ադրբեջանի կողմից հենց Իսրայելում ծավալվող քարոզչական քաղաքականության վրա, որը միտված է բացառելու տեղի  հայկական համայնքի ու փորձագետների հնարավոր ազեցությունը ։

«Ադրբեջանը կարող է նաև իր օդը պաշտպանելու համար ընդլայնել Բարաք ՀՕՊ համակարգը, որն ինքը գնել էր ու որը բավականին էֆեկտիվ է։ Իսրայելական աղբյուրների հաղորդմամբ, Ադրբեջանն այն օգտագործել է նաև վերջին պատերազմի ժամանակ, երբ մենք իսկանդեր էինք փորձում կիրառել»,- ասաց նա։

Հաշվի առնելով նաև զինամթերքի տեղակայման վայրը՝ Մելքոնյանը տեսակետ հայտնեց, որ Արցախն անզեն հայաթափելու ծրագիրը իրագործել չկարողանալու դեպքում Ադրբեջանը կարող է դիմել ռազմական  գործողությունների։

«Որքանով մենք տեղեկացված էինք՝  ուկրաինական հակագրոհի ժամանակ իրենք պատրաստվում էին, այսպես կոչված, «հակաահաբեկչական գործողություն» իրականացնել՝ ուղղված Արցախի Հանրապետության Պաշտպանության բանակի, ոստիկանության և այլ ուժային կառույցների դեմ։ Բայց, հաշվի առնելով, որ այդ հակագրոհը մեծ հաշվով դեռ որևէ հաջողություն չի արձանագրել, Ադրբեջանն այդ միջոցը դեռ չի կիրառել»,- ասաց նա։

Փորձագետի տեղեկություններով՝  ՀՀ դեմ կիրառվող ռազմամթերքի արսենալն Ադրբեջանը կուտակում է նաև Արցախի՝ օկուպացրած տարածքներում բացված առնվազն 5 զորամասերում։

«Եթե համեմատենք մինչև այժմ այնտեղ տեղակայված զինվորականների ու Արցախի օկուպացրած տարածքներում բնակեցված քաղաքացիական անձանց քանակը՝ կտեսնենք, որ զինվորականները գերակշռում են։ Սա հերթական ապացույցն է, որ այդ տարածքն իրենց համար պարզապես պլացդարմ է, ոչ թե բնակավայր»,- ասաց նա։

Սերգեյ Մելքոնյանի գնահատմամբ՝ Արցախի ուղղությամբ ադրբեջանական հնարավոր հարձակման դեպքում, հաշվի առնելով ՀՀ իշխանությունների կողմից անվտանգության երաշխավորի պարտավորությունից հրաժարվելու փաստը, այդ երկրի իշխանություններին ընդամենը 4 օր պետք կլինի Արցախի կոմունիկացիաներն ու գլխավոր բնակավայրերը գրավելու համար։

«Ինչ վերաբերում է ՀՀ-ին՝ այո, այս դեպքում հաջողության կարող է հասնել այն պետությունը, որը կլինի հարված նախաձեռնողը։ Հաշվի առնելով, որ Ադրբեջանն օկուպացրել է ՀՀ տարածքի 220 քկմ ՀՀ տարածքից, և եթե Հայաստանն ունի տեղեկություններ, որ Ադրբեջանը պլանավորում է նոր հարձակում,ակնհայտ է, որ նրանց հարձակվելու դեպքում հաջողությունը կլինի նրանց կողմը։ Բայց այսօր, Հայաստանը, հաշվի առնռլով նաև նախկին փորձը, ունի բարոյական բոլոր իրավունքները՝ կանխելու այդպիսի հարձակումը՝ հաշվի առնելով, որ չկանխելու դեպքում շատ ավելի վատ արդյունք է ունենալու։ Բայց Հայաստանն այսօր դա չի անի, որովհետև, ըստ այսօրվա իշխանության, դա չի նպաստելու խաղաղության օրակարգին»,- ասաց նա։

Մյուս կողմից, ըստ «Փաստինֆո»- ի զրուցակցի, կան նաև կիսառազմական քայլեր, որոնք կարող են կիրառվել հայկական կողմից՝ իրավիճակը կառավարելու նպատակով։ Օրինակ՝ Հայաստանը կարող է սահմանին մոտ համատեղ զորավարժություններ սկսել Իրանի, Ռուսաստանի, ինչպես նաև Հունաստանի հետ։ Սա, ըստ մասնագետի, կարող է որոշակի ժամանակով կանխել թշնամական կողմի հնարավոր հարձակումը, իսկ այդ ընթացքում  Հայաստանը հնարավորություն կունենա վերականգնել իր ԶՈՒ-ն ու զինտեխնիկան։

Աղբյուր` Փաստինֆո