Փաստ ինֆո

Արդեն երկար ժամանակ, ինչ հող է նախապատրաստվում ռուսական զինական ներկայությունն ու, ընդհանրապես, ռուսական ներկայությունը մեր երկրից, ինչպես նաև տարածաշրջանից հանելու համար, հետեւապես սա ինչ – որ կերպ հիմնավորել է պետք։ Այն, ինչ անում է այս իշխանությունն ու մասնավորապես Նիկոլ Փաշինյանը, քարոզչական ճանապարհով իրավիճակը հասունացնելն ու այդ նպատակին հասնելն է։ Սակայն, այդպիսի հայտարարությունները ռուսական քաղաքական վերնախավի համար չեն, այլ ներքին սպառման լսարանի՝ նրանց, ովքեր քաղաքականության մասին դատում են լուսանկարների և վերնագրերի մակարդակով,-«Փաստինֆո» լրատվականի հետ զրույցում ասում է «Լույս» տեղեկտվական – վերլուծական կենտրոնի ղեկավար Հայկ Այվազյանը՝ խոսելով ՀՀ-ում վարչապետ աշխատող անձի կատարած հերթական հակառուսական հայտարարության մասին։

Հիշեցնենք՝ երեկ ՀՀ-ում վարչապետ աշխատող Նիկոլ Փաշինյանը հարցազրույց է տվել իտալական «La Repubblica» թերթին, որի ընթացքում, ի թիվս շատ այլ վիճահարուց մտքերի, խոսելով հայ – ռուսական հարաբերությունների մասին, ասել է՝ մի օր կարող ենք ուղղակի արթնանալ և տեսնել, որ Ռուսաստանն այստեղ չէ։

Հայկ Այվազյանը նկատում է՝ այսօրինակ հայտարարությունները նրա համար են, որ եթե առաջիկայում հայաստանյան օրվա իշխանությունները իրավական կամ քաղաքական այնպիսի մի որոշում կայացնեն, որի արդյունքում ռուսական կողմը ստիպված լինի լքել տարածաշրջանը, նրանք ալիբի ունենան՝ ասելու, թե տեսեք Ռուսաստանի Դաշնությունը ինքը լքեց Արցախը, Հայաստանն ու տարածաշրջանը, ինչպես մի ժամանակ հայտարարում էին՝ ոչ թե իրենք են դուրս եկել ՀԱՊԿ-ից, այլ ՀԱՊԿ-ն է դուրս եկել Հայաստանից. «Այդ ժամանակ էլ իրենց արդարացնում էին՝ եթե ՀԱՊԿ-ը հանուն Հայաստանի և Արցախի համաշխարհային պատերազմ չի սկսում, ապա իրենց ՀԱՊԿ-ը պետք չէ։ Հակառակ պարագայում, ստացվում է, որ համաշխարհային երրորդ պատերազմը պետք է սկսեր Հարավային Կովկասից, որովհետև ռուսական կողմի ոչ կշռադատված և զգուշավոր մի քայլը կամ միջամտությունը կարող էր պայթեցնել ողջ տարածաշրջանը, այն, ինչ թույլ չի տվել և կանխել է Ռուսաստանի Դաշնությունը՝ Հայաստանում և Արցախում, չնայած ադրբեջանկան կողմի տարատեսակ սադրանքներին։ Եվ, ստեղծված իրավիճակում, արդեն էական չէ, որ նա պայմանգրով ինչ – ինչ պարտավորություններ ուներ, պարզապես նա չի կարող հաշվի չառնել աշխարհաքաղաքական իրավիճակը, այնինչ ՀԱՊԿ-ն այստեղ փորձել է ստրատեգիական կայունություն ապահովել, որպեսզի իրենց այս կամ այն պարտավորությունը կատարելու արդյունքում, ասենք՝ չռմբակոծվի Երևանը»,- ասում է Այվազյանը։

Հակադարձելով հայաստանյան օրվա իշխանությունների, և նրանց սպասարկող կառույցների կողմից տարվող ընդգծված հակառուսական քարոզչությանը, ինչպես նաև՝ ռուսական ներկայության դերի թերագնահատման քաղաքականությանը՝ Հայկ Այվազյանը նկատում է՝ ինչպես բազմաթիվ անգամներ, այդպես նաև՝ անցյալ տարի Ջերմուկում սեպտեմբերյան ռազմական ագրեսիայի ողջ ընթացքում, հենց ռուսական 102 -րդ ռազմաբազայի զինծառայողական կազմն է եղել պաշտպանական գծի երկրորդ էշելենում, իսկ այդ մասին հրաշալի կերպով իմացել են նաև Ադրբեջանում։

Ամփոփելով զրույցը՝ «Լույս» տեղեկտվական – վերլուծական կենտրոնի ղեկավար Հայկ Այվազյանն ասում է՝ ռուսական կողմն, իհարկե, փաշինյանական իշխանության արտահայտած այս կամ այն մտքերից, կամ, նույնիսկ, այստեղ տարվող հակառուսական ընդգծված քարոզից չի նեղանալու և այդ պատճառով չի հեռանալու տարածաշրջանից, այլ գործելու է բացառապես և միայն սեփական շահերից ելնելով, ընդ որում՝ գործելու է բավականին պրագմատիկ կերպով.«Եթե Ռուսաստանի Դաշնությունը համարի, որ այս տարածաշրջանում մնալը բխում է սեփական շահերից, ապա նա կշարունակի մնալ այսեղ, եթե ոչ՝ կհեռանա։ Սակայն մեկ բան հստակ է՝ որքան շատ այս իշխանությունը մերժի ռուսական կողմի ներկայացրած առաջարկները, և յուրաքանչյուր կորստից հետո ավելի կոշտ կերպով մեղադրի Ռուսաստանի Դաշնությանն, այնքան հաջորդ կորուստն ավելի ցավալի է լինելու Հայաստանի համար»։

Աղբյուր` Փաստինֆո