Փաստ ինֆո

Էջմիածնի «Քիմիկների» զորամասի ծնողները գոհ չեն ՀՀ պաշտպանության նախարար Սուրեն Պապիկյանի հետ հանդիպումից։ Ասում են՝ երկու ժամ տևած հանդիպման ընթացքում մի շարք կարևորագույն հարցեր են բարձրացրել, որոնցից գրեթե որևէ մեկի մասով հստակ պատասխան չեն ստացել։ Խնդիրների մեծամասնությունից նախարարը տեղյակ չի եղել։

«Ճիշտ է, երկու ժամից ավելի նստեցինք, բայց, որ ասեմ կոնկրետ ինչ-որ մի բան իմացանք, լսեցինք՝ ոչ։ Մենք չէինք էլ ակնկալում, որ ինքը կոնկրետ ինչ-որ բան կասեր։ Ինքը չէր էլ կարող պատասխանել։ Ես, ոնց հասկանում եմ, ինքը շատ բանից է անտեղյակ։ Բայց, Փառք Աստծո, գոնե ընդունեց այսքանից հետո, խոստացավ անհրաժեշտության դեպքում առանձին հանդիպումներ ունենալ ծնողների հետ, օգտակար լինել։ Թե այդ խոստումը որքանով է ճիշտ՝ ժամանակը ցույց կտա»,- «Փաստինֆո»-ի հետ զրույցում այս մասին ասաց անհետ կորած զինծառայողի մայր Կարինե Մանավազյանը։

Նրա փոխանցմամբ՝ հանդիպման ընթացքում բարձրացրել են երեխաների վերադարձից մինչև նրանց ԴՆԹ-ներին վերաբերող հարցեր։ Պահանջել են տրամադրել իրենց որդիների անհետանալու օրն արված տեսագրությունները։ Պապիկյանը ծնողներին վստահեցրել է, որ պահանջն ապահովելու ուղղությամբ համապատասխան քայլեր կձեռնարկի։

«Դե մենք հասկանում ենք, որ դա 1-2 օրվա բան չէ, մեկ շաբաթվա բան էլ չէ, բայց չենք էլ պատրաստվում երկարատև սպասումներով ամիսներ շարունակ անգործ նստել։ Չէ, այդպիսի բան չի լինելու։ Մենք անընդհատ հիշեցնելու ենք մեր մասին, որ հանկարծ չմոռանան, որ մենք կանք ու պետք է պատասխան տան մեզ։ Ուզում ենք հասկանալ, թե իմ երեխան ոնց է անհետացել, ոնց է ստացվել, որ ինքը դարձել է անհետ կորած։ Ոնց է մահացել։ Այդ նյութերը փաստեր են, որոնք կարող են օգնել »,- ասաց ծնողը։

Մեր զրուցակցի խոսքով՝ պաշտպանության նախարարը չի կարողացել հստակ պատասխանել նաեւ, թե անցած 3 տարիների ընթացքում ինչ արդյունք են գրանցել՝ իրենց որդիների հետ կապված իրադարձությունների հանգամանքները պարզելու ուղղությամբ։ Միայն հայտարարել է, որ հանձնաժողով է ստեղծվել։

Ինչ վերաբերում է արդեն ավելի քան 2 տարի շարունակ ձգձգվող դատավարությանն ու հրամանատարին պատասխանատվության ենթարկելու իրենց պահանջին՝ մեր զրուցակիցն ասաց, որ անձամբ է հետաքրքրվել, թե ինչպես է ստացվել, որ «իրենց որդիների գլուծը կերած հրամանատարը նախարարությունում պաշտոն է ստացել։

«Արսեն Աբգարյանը դավաճանի մեկն է։ Նա տարավ ու 63 երեխայի գլուխ կերավ։ Հենց էրեխեքին տարել է, զանգել ասել է՝ «Ապրանքը տեղ հասավ»։ Դավաճանն էլ ո՞նց է լինում։ Դավաճան չէ, ավելի բեթար է։ Այն 3 օրն էլ, որ մենք նախարարության դիմաց էինք, տեսնում էինք, որ նա գալիս էր աշխատանքի։ Այդ հարցում էլ էր նախարարը բացարձակ անտեղյակ։ Ես զարմանում եմ էլի, թե ոնց է հնարավոր, որ պաշտպանական գերատեսչության ղեկավարն անտեղյակ լինի այդպիսի կարևորագույն բաներից։ Հրաման է ստորագրում՝ չիմանալո՞վ՝ ինչ է գրված թղթի վրա»,- ասաց նա։

Կարինե Մանավազյանը վստահեցրեց, որ իրենց գործողություններն այսքանով չեն ավարտվելու։ Հաջորդ քայլը լինելու է Փաշինյանի բնակավայրի մուտքի մոտ նստացույց իրականացնելը։
«Անցած օրերից մի փոքր հանգստանալուց հետո օր ու գիշեր անցկացնելու ենք Փաշինյանի կեցավայրի մուտքի տարածքում։ Որ արթնանա՝ մեզ տեսնի, քնի՝ մեզ տեսնի։ Որ մղձավանջ դառնանք իր համար»,- ասաց նա։

Աղբյուր` Փաստինֆո