Փաստ ինֆո

Զինծառայող Մուրադ Գրիգորյանի սպանության գործով կալանավորված ծառայակից՝ Արմեն Հովհաննիսյանի փաստաբանը պնդում է, որ իր պաշտպանյալն անմեղությունը հաստատող ապացույցներ ունի։

«Փաստինֆո»-ի հետ զրույցում փաստաբան Վահան Քեշիշյանը պատմեց, որ Արմեն Հովհաննիսյանը դեպքի պահին հեռախոսով զրուցելիս է եղել հարազատների հետ և չէր կարող այդ պահին ոչ վիճաբանել սպանված ծառայակցի հետ, ոչ էլ կրակել նրա վրա։ «Արմանի և նրա ծնողի հեռախոսահամարները գրանցված են ծնողի անունով, վերջինը ներկայացրել է հեռահաղորդակցության օպերատորից վերցված զանգերի վերծանումների քաղվածքը։ Երբ համեմատում ենք հեռախոսազրույցների ժամերը քրեական գործում առկա նյութերի հետ, ակնհայտ է դառնում, որ դեպքը տեղի է ունեցել այն ժամանակահատվածում, երբ Արմանը խոսել է հարազատների հետ։ Հարազատները նաև պատմել են, որ զրույցի ընթացքում բարձրախոս է միացված եղել և զրույցին ներկա են եղել նաև հարևանները։ Նրանք նույնպես կարող են վկայել, որ զրույցի ընթացքում կրակոցի ձայն են լսել, որից հետո Արմենն ասել է, որ ավելի ուշ կզանգի ու վազել է կրակոցի ուղղությամբ, որտեղ էլ տեսել է ևս մի սպայի»։

Փաստաբանը նաև նշեց, որ մյուս ապացույցներն էլ կարող է լինել հարևան դիրքում տեղադրված է տեսախցիկի ձայնագրությունները։ «Այդ տեսախցիկը 360 աստիճան տեսանելիությամբ նկարահանում է իրականացնում, դրա տեսանելիության դաշտում է նաև այն դիրքը, որտեղ տեղի է ունեցել դեպքը։ «Իմ պաշտպանյալն իր ձերբակալման առաջին օրը խնդրել է ռազմական ոստիկանության աշխատակիցներին ուսումնասիրել այդ տեսախցիկի ձայնագրությունները, դրանք կարող են փաստել, որ իմ պաշտպանյալը կապ չունի դեպքի հետ, և եթե դա այդպես է՝ ուրեմն մենք ունենք անմեղ կալանավոր»։

Քննչական կոմիտեի նախագահի մամուլի խոսնակ Գոռ Աբրահամյանը «Փաստինֆո»-ի հարցին, թե արդյո՞ք նախաքննական մարմինն այս փաստերն ուսումնասիրել է՝ պատասխանեց, որ վարույթային, ապացուցողական գործողությունների վերաբերյալ տվյալներն այս պահին հրապարակման ենթակա չեն։ Անդրադառնալով դիրքում գտնվող սպայի նկատմամբ իրականացված քննչական գործողություններին՝ նա նշեց, որ Մուրադ Գրիգորյանի մահվան դեպքի առթիվ նախաձեռնված քրեական վարույթով հանրային քրեական հետապնդում է հարուցվել երկու անձի նկատմամբ։ «Մասնավորապես՝ համածառյակից, պարտադիր ժամկետային զինծառայող Հովհաննիսյանին մեղադրանք է ներկայացվել ՀՀ քրեական օրենսգրքի 155-րդ հոդվածի 1-ին մասով, իսկ դիրքի ավագ Տ․Ս․-ին՝ ՀՀ քրեական օրենսգրքի 474-րդ հոդվածի 2-րդ մասի 3-րդ կետով։ Երկուսի նկատմամբ էլ որպես խափանման միջոց է ընտրված եղել կալանքը։ Սակայն դատարանը չի բավարարել Տ․Ս․-ի նկատմամբ կիրառված խափանման միջոց կալանքի ժամկետը երկարաձգելու վերաբերյալ վարույթն իրականացնող մարմնի միջնորդությունը, և նա ազատվել է արգելանքից, վերջինիս նկատմամբ որպես խափանման միջոց է ընտրվել բացակայելու արգելքը։ Մյուս մեղադրյալը կալանավորված է»։
Նա նաև հայտնեց, որ նախաքննությունը շարունակվում է։

Հիշեցնենք, որ 2023 թվականի հուլիսի 26-ին ՀՀ ՊՆ N զորամասի մարտական դիրքում` գետնատնակի հարակից տարածքում, հայտնաբերվել էր նույն զորամասի զինծառայող Մուրադ Սերյոժայի Գրիգորյանի դին՝ գլխի շրջանում ստացած հրազենային մահացու վիրավորումով։ Վերջինիս կողքին` գետնին ընկած վիճակում, գտնվել էր իրեն ամրակցված գնդացիրը: Դեպքի առթիվ նախաձեռնվել էր քրեական վարույթ՝ ՀՀ քրեական օրենսգրքի 523-րդ հոդվածի 2-րդ մասի 3-րդ կետի հատկանիշներով ։ Նախաքննության վարկածով՝ նույն մարտական դիրքում ծառայություն իրականացնող Մուրադ Գրիգորյանի և նրա համածառյակից, պարտադիր ժամկետային զինծառայող Արմեն Հովհաննիսյանի միջեւ անձնական հարցի շուրջ ծագած խոսակցության ընթացքում հնչած վիրավորանքի պատճառով զինծառայող Մուրադ Գրիգորյանին, վերջինիս ամրակցված ՊԿ տեսակի գնդացիրից արձակված կրակոցով, մահացու հրազենային վնասվածքը հասցրել է Հովհաննիսյանը։ Վերջինիս նկատմամբ հարուցվել է հանրային քրեական հետապնդում, և նրան մեղադրանք է ներկայացվել ՀՀ քրեական օրենսգրքի 155-րդ հոդվածի 1-ին մասով եւ գտնվում է կալանքի տակ։

Աղբյուր` Փաստինֆո