Փաստ ինֆո

«Վերականգնե՛ք կրթության իրավունքն Արցախի երեխաների համար» պահանջով բողոքի ակցիա տեղի ունեցավ ՄԱԿ երևանյան գրասենյակի մոտ։ Ակցիայի մասնակիցներն իրենց ելույթներում, շեշտելով Արցախում ադրբեջանական պաշարման հետևանքով 120 000 բնիկ հայերի սովի մատնված լինելու ու տարրական իրավունքներից արդեն 9 ամիս զրկված լինելու հանգամանքը, պահանջեցին անհապաղ քայլեր ձեռնարկել, որ Ադրբեջանը կյանքի կոչի ՄԱԿ ԱԽ որոշումները։

Ակցիայի մասնակիցները նամակ են հանձնել ՄԱԿ երևանյան գրասենյակին ու ՅՈՒՆԻՍԵՖ-ին, որում, մասնավորապես, ասված է․

«Ողջունելի, որ օգոստոսի 16-ին ՄԱԿ ԱԽ նիստում շեշտվեց, որ Լաչինի միջանցքը պետք է բացվի, բայց առանց դրան հաջորդող կոնկրետ գործողությունների, պատասխանատվության մեխանիզմների ադրբեջանական իշխանությունն արհամարհում է դա ու շարունակում ցեղասպանությունը ԼՂ-ում։ ՄԱԿ ԱԽ-ից խնդրում և պահանջում ենք՝ 2023թ․ օգոսոտի 16-ին ՄԱԿ ԱԽ նիստում հնչած դիրքորոշումների հիման վրա ընդունել բանաձև, որով Ադրբեջանի իշխանություններից կպահանջվի ապահովել ՄԱԿ արդարադատության միջազգային դատարանի ու 2023թ․ փետրվարի 22-ի որոշման հիման վրա Լաչինի միջանցքով տեղաշարժի անհապաղ ու անխոչընդոտ վերականգնումը։ Դա չկատարելու դեպքում, ՄԱԿ-ի կանոնադրության համաձայն, պահանջել,որ ՄԱԿ անդամներն Ադրբեջանի նկատմամբ կիրառեն պատժամիջոցներ։ ՅՈՒՆԻՍԵՖ-ին խնդրում եւ պահանջում ենք մինչև Լաչինի միջանցքով անխոչընդոտ երթևեկության ապահովումը ՄԱԿ հովանու ներքո կազմակերպել հումանիտար բեռների անհապաղ տեղափոխում լաչինի միջանցքով՝ հակառակ դեպքում տեղի կունենա անդառնալին»։

Ակցիայի վերջում մասնակիցները որպես «հումանիտար» քայլ ՄԱԿ երևանյան գրասենյակին են փոխանցել ժենգյալով հաց և ապա կարճ ժամանակով փակել գրասենյակի մուտքը, որպեսզի մի քանի րոպեով գոնե ներսում գտնվողները զգան, թե ինչ է նշանակում պատանդառված լինել՝ այն էլ՝ ավելի քան 9 ամիս։

Աղբյուր` Փաստինֆո