Փաստ ինֆո

Հենց հիմա էլ՝ ձեր զանգից րոպեներ առաջ տեղեկացա, որ Վարդենիսի և Սոթքի ուղղությամբ թեժ մարտերը շարունակվում են։ Թշնամին ԱԹՍ-ներ, մեծ կալիբրի մինամյոտներ է կիրառում, հիանալի պատրաստված և զինված է։ Վարդենիսի մոտակայքում շատ կարևոր բարձունք ունենք, թշնամու թիրախում հիմա այդ բարձունքն է, որը եթե նրանց հաջողվի գրավել, ապա պետք է մոռանանք Վարդենիսի և Սոթքի մասին ընդհանրապես։ Մեր տղաները դեռևս շարունակում են դիմադրել,- «Փաստինֆո» լրատվականի հետ զրույցում ասում է արցախյան գոյամարտերի մասնակից, ազատամարտիկ չարեքթարցի Աշոտ Սևյանը։

Հիշեցնենք՝ ՊՆ-ն հայտնել էր, որ սեպտեմբերի 1-ին՝ ժամը 07:50-ից սկսած, թշնամին ինտենսիվ կրակ է բացել Սոթքի, ապա նաեւ Նորաբակի հատվածում տեղակայված հայկական դիրքերի ուղղությամբ: Ադրբեջանի ԶՈՒ-ն, տարբեր տրամաչափի հրաձգային զենքերից զատ, կիրառում է նաև ականանետ, ԱԹՍ։ Պաշտոնապես հայտարարվել է,որ Ադրբեջանը զրացուցիչ զինուժ է կուտակում՝ Սոթքի ուղղությամբ։ Այս պահին հայկական կողմն ունի 4 զոհ։

Եթե ՀՀ ԶՈՒ-ն լուրջ կերպով իր ուժերն ու ռազմավարությունը չմոբիլիզացնի և փորձի դիմադրել, ապա մենք կկորցնենք Գեղարքունիքի մարզում գտնվող կարևորագույն ռազմական նշանակության բարձունքը ու վերջ, ասում է ազատամարտիկն ու հավելում.«Մենք բազմաթիվ զոհեր ու վիրավորներ ունենք, բայց մեր տղաները, համենայն դեպս, դեռ փորձում են դիմադրել։ Թշնամու պլանների մեջ է մտնում Սևանի արևելյան ափին գերիշխող դիրքեր գրավելը։ Նրանք այս մասին դեռևս 44 օրյա պատերազմի ժամանակ են հայտարարել՝ գալու են իրենց «պատմական» տարածք՝ Գյոգչա, որը մեր Սևանն է։ Թշնամու տեխնիական 700 – 800 մ հեռավարության վրա է գտնվում մեր դիրքերից։ Զինտեխնիկայի ահռելի կուտակումներ կան»։

Իրավիճակն այս պահին լայնամասշտաբ ռազմական բախման է տանում, ասում է ազատամարտիկն ու հավելում. «Արայիկ Հարությունյանի հրաժարականի և այսօր վերսկսված ռազմական բախումների միջև հստակ կապեր պետք է փնտրել, եթե չասեմ՝ նախնական պայմանավորվածություն։ Հիմա նորից կփորձեն ճնշումներ գործադրել ժողովրդի վրա, որպեսզի նրանք լռեն։ Կարևորը Երևանի քաղաքապետն իշխանությունների սրտի թեկնածուն անցնի, էլ դարդ չունեն։ Երևանից 60 կմ հեռավորության վրա հենց հիմա մեր երեխաների արյունն է թափվում, սրանք քաղաքապետ են ճռռացնում, աղբ ու ասֆալտից խոսում։ Ինչ վերաբերում է մեր ընդդիմությանը, ապա այստեղ ևս ասելիք վաղուց արդեն չունեմ։ Եթե մի ընդդիմություն, այսքանից հետո, անգամ պատրաստ չէ ռադիկալ քայլերի դիմել, ապա դրանցից ի՞նչ ընդդիմություն, հենա ասա՝ Նիկոլ են էլի, ի՞նչ տարբերություն…»,- ամփոփելով զրույցն, ասում է Աշոտ Սևյանը։

Աղբյուր` Փաստինֆո