Փաստ ինֆո

Ուժեղ ու դուխով տղա էր։ Ոչ մի բանից վախ չուներ։ Ադրբեջանական ԶՈւ հարձակման ու սադրիչ գործողությունների հետևանքով զոհված Անդրանիկ Անտոնյանին այսպես բնութագրեց նրա բնակավայրի՝ Արարատի մարզի Նորաբաց գյուղի ղեկավար Մարգար Մարգարյանը՝ «Փաստինֆո»-ի հետ զրույցում։

«Հետ գնալու սովորություն չուներ, մենակ առաջ։ Մի խոսքով՝ աշխատող մարդ, լավ մարդ, լավ տղա, ամբողջ գյուղի կողմից էլ հարգված մարդ էր»,- ասաց մեր զրուցակիցը։

Նորաբացի համայնքապետի խոսքով՝ Անդրանիկը 36 տարեկան էր։ Մի քանի օր անց ծնունդն էր նշելու։
«Ընտանիքի միակ որդին էր։ Իրենցի մեծ երկու քույր ուներ։ Քույրերն ամուսնացած են, ինքը դեռ չէր ամուսնացել։ Հողագործությամբ էր զբաղվում։ Դաշտեր ու տարածքներ ուներ, մշակում էր։ Ինքը նաև գյուղտեխնիկա ուներ, դրանք էր օգտագործում»,- պատմեց համայնքապետը։

Մարգար Մարգարյանի խոսքով՝ Անդրանիկը ծանուցագիր էր ստացել՝ սահմանին զորավարժությունների մասնակցելու։ Ծանուցագիրը վերցրել էու մոտ 2 շաբաթ առաջ, առանց երկար մտածելու, մեկնել էր սահման։

«Ինքը սոցիալական ցանցում չէր գրանցվել։ Իրենից շատ քիչ նկար կա, իր մոտ ընկերներն են ուղարկել, հասցրել են նկարել։ Մեծ ընկերական շրջապատ ուներ, բայց որևէ մեկի մոտ նկար չկար։ Նկարվել չէր սիրում։ Հեռախոս չէր պահում։ Եթե իր հետ որևէ մեկն ուզում էր կապ հաստատել, պետք է ընկերներին զանգեր, հարազատների հետ կապ հաստատեր կամ գնար իր սիրած տեղերը՝ իրեն հանդիպելու համար»,- պատմեց մեր զրուցակիցը։

Հիշեցնենք, որ այսօր՝ վաղ առավոտից, ադրբեջանական ԶՈւ-երն ծանր զրահատեխնիկայով ինտենսիվ կրակ է բացել սահմանային Սոթքի և Նորաբակ գյուղերի սահմանային դիրքերի ուղղությամբ։ Կիրառվել են նաեւ ականանետեր, ԱԹՍ։ Պաշտոնական տվյալներով՝ հայկական կողմն ունի 4 զոհ և 1 վիրավոր։

Սոթքում զոհված Արսենը Ռանչպար գյուղից էր, վարժական հավաքի մասնակից. երրորդ երեխայի ծնվելուն էին սպասում

Աղբյուր` Փաստինֆո