Փաստ ինֆո

Անհետ կորած զինծառայողների ծնողներն ակնկալում են, որ այսօր, ի վերջո, կկայանա ՀՀ պաշտպանության նախարար Սուրեն Պապիկյանի հետ հանդիպումը։

«Այսօր երեկոյան 17։30-ից 18։00-ն պետք է նախարարության դռան մոտ կանգնած լինենք, որ ուրիշ մահանա չբռնի»,- «Փաստինֆո»-ի հետ զրույցում այս մասին ասաց «Քիմիկների» զորամասի անհետ կորած համարվող զինծառայողներից մեկի մայրը՝ Կարինե Մանավազյանը։

Հանդիպումը, ինչպես ավելի վաղ հայտնել էր Կ.Մանավազյանը, խոստացվել էր կազմակերպել դեռևս այս տարվա մայիսի 2-ին, սակայն տարբեր պատճառաբանություններով դրանք անընդհատ ձգձգվել են։ Ծնողները պարբերաբար ակցիաներ են կիրառում ՀՀ ՊՆ շենքի մոտ, օգոստոսի 30-ին իրավիճակը բավականին լարված է եղել, անգամ քաշքշուկ առաջացել պաշտպանության փոխնախարար Արման Սարգսյանի և ծնողների միջև։ Իրավիճակի հանդարտվելուց հետո, նախարարության շենքում գտնվող ծնողներին խոստացվել էր նախարարի հետ հանդիպում կազմակերպել օգոստոսի 31-ին՝ ժամը 17։00-ին, սակայն այն կրկին հետաձգվել էր եւ նախատեսվում է անցկացնել այսօր՝ ժամը 18։00-ին։

«Անընդհատ հետաձգում են, որովհետև ասելու բան չունի երևի։ Այնքան են խաբել, որ էլ չգիտեն՝ ինչ խաբեն։ Կարծում եմ՝ այս անգամ պետք է ընդունիեթե այդքանից հետո չընդունի, ապա պետք է հրաժարական տա։ Ուրիշ տարբերակ ինքը չունի»,- ասաց Կարինե Մանավազյանը։
Նրա խոսքով՝ իրենց միակ պահանջը չի փոխվել՝ վերադարձնել իրենց որդիներին։

«Երեկ չէ առաջին օրը մեզ տվել են մի հատ հիմար պատասխան, թե «մենք ի՞նչ իմանանք՝ ձեր էրեխեքը որտեղ են։ Մենք չգիտենք»։ Դա փոխնախարարն է ասել (նկատի ունի փոխնախարար Արման Սարգսյանին – խմբ.)։ Արդեն իրենց նագլիությունը չափեր չունի։ Մանավանդ վիրավոր սիրտ ունեցող ծնողին պետք է մեղմացնել։ Գոնե կանչեին ներս, ասեին այս մի բաժակ ջուրը խմեք, հանգստացեք։ Ոստիկանները նախարարության ներկայացուցիչներից ավելի լավ էին վարվում»,- ասաց նա։

Անհետ կորածի ծնողն այսօրվա հանդիպման հնարավոր կայացման դեպքում էլ մեծ սպասելիքներ չունի։ Իր խոսքով՝ հանդիպումը նշանակվել է՝ պարզապես իրենց հնարավորինս հանգստացնելու համար միայն։

«Էս ամբողջի հանգուցալուծումը Փաշինյանի հեռացումն է։ Մինչև ինքը չհեռանա ու մեկ ուրիշը չգա, այս հարցը չի լուծվի։ Ամեն ինչ իր ձեռքերում է։ Մենք հիմար չենք, շատ լավ հասկանում ենք։ Մեզ սկզբից ասեց «քարտեզները տալիս ենք՝ երեխաների դիմաց», քարտեզները տվեց, երեխա չեկավ։ «Հողերը տալիս ենք երեխաների դիմաց», հողերը տվեց, երեխաներ չեկան։ «Գերիներին տալիսն ենք մեր գերիների դիմաց», գերիներին տվեց, ոչ մի գերի չբերեց։ Բա էդ չի՞ նշանակում, որ միտումնավոր է անում ամեն ինչ»,- վրդովմունքը հայտնեց անհետ կորած զինծառայողի մայրը։

Հարցին, թե նախատեսվող հանդիպումից հետո արդյունքի չհասնելու դեպքում ինչ քայլեր են նախատեսել անել՝ Կարինե Մանավազյանն ասաց, որ իրենք դեռևս երեկ էին որոշել գնալ ու նստել «Փաշինյանի դռան դեմ»։ Սակայն, հաշվի առնելով խոստացված հանդիպման հանգամանքը՝ որոշվել է դա հետաձգել։ Իր խոսքով՝ այդուհանդերձ, իրենց գործողությունները պարզ կդառնան նաև սեպտեմբերի 12-ին սպասվող դատավարությունից հետո։

«Արդեն երկու տարի է՝ դատական պրոցեսն ընթանում է, ու հետաձգում են 5 ամսով, 8 ամսով։ Վերջին նիստն ավելի քան 2 ամիս առաջ է կայացել։ Գալիս է 10 րոպե, 15 րոպե դատ է անում. «էսինչը չկա, կամ այն ինչի դատապաշտպանը նոր է, պետք է ծանոթանա նյութերին»։ Ու նորից գնում է, նորից մի 5-6 ամիս հետաձգվում է»,- ասաց նա։

Աղբյուր` Փաստինֆո