Փաստ ինֆո

Այ հենց հիմա լսո՞ւմ եք կրակոցները։ Էնքան բարձր է ձայնը, որ ակնհայտորեն ծանր հրետանիով են կրակում։ Դժվար էլ առաջիկայում դադարեցնեն կրակը դրանք։ «Փաստինֆո»-ի հետ զրույցում իրավիճակն այսպես ներկայացրեց սահմանապահ Սոթք գյուղի բնակիչը։

«Առավոտյան ժամը 8։00-ից սկսած ինտենսիվ կրակոցներ են։ Ամբողջ կող ու կուշտն էլ սարեր են։ Չէ՞ որ գյուղն էլ սարերի մեջ է, հիմա խփում են։ Հիմա թե գյուղին էլ կկպնի կրակը՝ Աստված գիտի»,- գրեթե լացակումած պատմեց Սոթքի բնակչուհին։

Նրա փոխանցմամբ՝ ինքը գյուղից չի հեռացել։ Ասում է՝ ինքն էլ, ամուսինն էլ զինվորականներ են, երեխաներն էլ արդեն ամուսնացած են։ Ընտանիքներով հեռացել են գյուղից։

«Մեծ շարժ չկա։ Ոնց որ թե գյուղը չեն ուզում տարհանել։ Չեմ հասկանում, թե ինչու։ Շատ լարված վիճակ է։ Ամեն մեկն իր ընտանիքն, էսպես ասած, հանում է։ Ով մեքենա չունի, դեռևս չի կարողանում հեռանալ բնակավայրից։ Բայց շատ լարված ու վտանգավոր պահ է։ Կարող է ամեն պահի.... չգիտեմ...»,-ասաց նա։

Գյուղում առավոտյան՝ ուսումնական տարվա մեկնարկը տալուն պես, բոլոր երեխաներին հանել են դպրոցի շենքից։ Դասապրոցեսը չի կայացել։

«Գյուղն այնքան մոտիկ է, որ ամեն ինչ էլ երևում է։ Այ հենց հիմա էլ։ Ձայները լսո՞ւմ եք Դուք։ Չգիտեմ՝ կոնկրետ ինչ զինատեսակ են գործածում, բայց հաստատ ծանր հրետանի է կիրառվում հայկական կողմի ուղղությամբ։ Սա ապրելու տեղ չի, սա ապրելու միջավայր չէ։

Ամբողջ օրն այս վիճակն է մեզ մոտ»,- ասաց նա՝ անդրադառնալով սահմանային հատվածում թշնամական ուժերի կուտակումների վերաբերյալ պաշտոնական տեղեկությանը։

Աղբյուր` Փաստինֆո