Փաստ ինֆո

Այն, որ Արցախում դժվար հաղթահարելի իրավիճակ է ստեղծվել՝ ակնհայտ է, սակայն, լիարժեք չտիրապետելով՝ ի՞նչ է այս պահին կատարվում Արցախում, զերծ կմնամ գնահատականներ տալուց, հատկապես, որ տեղի ունեցող փոփոխությունները դեռևս ընթացքի մեջ են,- «Փաստինֆո» լրատվականի հետ զրույցում ասում է ՀՀ ԱԺ ընդդիմադիր «Հայաստան» խմբակցության ղեկավար, ՀՀ նախկին պաշտպանության նախարար Սեյրան Օհանյանը։

Հիշեցնենք՝ այսօր առավոտյան Արայիկ Հարությունյանը հայտարարեց հրաժարական տալու իր մտադրության մասին, միաժամանակ հայտնելով Գուրգեն Ներսիսյանին Արցախի պետնախարարի պաշտոնից ազատելու, եւ ԱԱԾ տնօրեն Սամվել Շահրամանյանին պետնախարար նշանակելու մասին։

Այն, որ Արցախում կառավարման խնդիրներ կան և որ դրանք, ավելի քան տեսանելի են՝ ոչ միայն հայության, այլ նաև՝ միջազգային հանրության համար, ըստ Սեյրան Օհանյանի, միանշանակ է. «Այս իրավիճակն, իհարկե, խիստ բացասաբար է անդրադարձել Արցախի վրա և իր բացասական ազդեցությունը դեռևս ունենալու է, որովհետև ճգնաժամային իրավիճակներում կառավարման խնդիրներն ամենաբարձր մակարդակի վրա պետք է դրվեին։ Արցախում այսօր տիրող իրավիճակը՝ ներքին կառավարման խնդիրներն ու քաղաքական գործընթացները, խոսում են այն մասին, որ լիարժեք մարտավարություն մշակված չի եղել՝ ստեղծված իրավիճակից դուրս գալու համար։ Ժամանակին, ես իմ կողմից մշակված համապատասխան առաջարկներ եմ ուղարկել արցախյան մի շարք քաղաքական ուժերի, ինչպես նաև՝ դրանք ներկայացրել եմ Արցախի Հանրապետության նախկին պետնախարար՝ Ռուբեն Վարդանյանին, սակայն, պատասխանը եղել է այսպես՝ որպես ռազմավարական ուղղություններ՝ դրանք օգտակար առաջարկներ են և ամեն ինչ այսքանով ավարտվել է»,- ասում է Սեյրան Օհանյանը։

Քաջ ծանոթ լինելով Արցախի անցած ողջ ճանապարհին, ինչպես նաև պայքարի ու պատերազմական գործողությունների բոլոր փուլերին՝ Ս. Օհանյանը նկատում է, որ Արցախի ժողովուրդը բոլոր առումներով անելանելի իրավիճակում է գտնվում՝ ոչ միայն հումանիտար ճգնաժամի, այլ նաև՝ անվտանգային խնդիրների և միջազգային երաշխիքների ձևավորման առումով. «Սակայն, ես գտնում եմ, որ Արցախում պետք է գործի՝ երբեք ուշ չէ սկզբունքը, իսկ ակնկալիքների առումով՝ հույս ունեմ, որ այսօր այնտեղ կձավորվի կառավարման այնպիսի մի կուռ թիմ, ինչպես նաև՝ քաղաքական և ռազմավարական գնահատականներ տվող այնպիսի էլիտա, որ երկիրն այս իրավիճակից դուրս կբերի, սակայն բոլորս պետք է հասկանանք, որ առանց հայաստանյան առողջ ուժերի հետ սերտ համագործակցության և առանց Հայաստանի Հանրապետության աջակցության, Արցախի համար չափազանց դժվար կլինի»։

Հարցին՝ արդյո՞ք Արցախի պետական կառավարման համակարգում տեղի ունեցող վերջին զարգացումները կարո՞ղ են թշնամու համար առիթ հանդիսանալ նոր և լայնածավալ ռազմական գործողություններ վերսկսելու, Սեյրան Օհանյանը պատասխանում է՝ թշնամին մշտապես պատրաստ է լայնամասշտաբ պատերազմի գնալ, սակայն միայն այն պարագայում, երբ կտեսնի որ մենք թույլ ենք. «Այս առումով՝ որևէ նշանակություն չունի, թե ի՞նչ է կատարվում այս կամ այն պահին Արցախի կամ Հայաստանի ներքաղաքական կյանքում։ Որ պահին թշնամին հասկացավ, որ ատամը կտրում է՝ նա կտրուկ գործողությունների է գնալու։ Եթե մեզ թվում է, թե հայաստանյան օրվա իշխանութունների կողմից այսօր առաջ տարվող, այսպես կոչված, Խաղաղության օրակարգն առանց հստակ երաշխիքների իրականություն է դառնալու, ապա մենք չարաչար սխալվում ենք։ Դա երբևիցե չի իրականանալու։ Երբ ասում են, թե խաղաղությունը մեր անվտնագության երաշխքին է, ապա պետք է հասկանալ, որ խաղաղությունն, ինքնին, չի կարող երաշխիք լինել, որովհետև խաղաղությունն ազգային անվտանգության ռազմավարության մեջ նշվում է որպես հիմնարար արժեք։ Այսինքն՝ խաղաղությունը վերոհիշյալ երաշխիքների, ընդ որում՝ ազգային և միջազգային երաշխքիների, գործածության արդյունքում ձևավորվող արժեք է։ Հետևաբար, այդ արժեքին հասնելու համար պետք է, նախ և առաջ, կայուն երաշխիքներ ձեռք բերել, որոնցից ամենաառաջնայինն ազգայինն է՝ մեր անվտանգությունը, մեր մարտունակ բանակն ու ներքին ամրությունը, որին մենք դեռ պետք է հասնենք»,- ասում է բանախոսը։

Ամփոփելով զրույցը՝ ՀՀ ԱԺ ընդդիմադիր «Հայաստան» խմբակցության ղեկավար Սեյրան Օհանյանն ասում է՝ ելնելով մեզանում ստեղծված ներկա իրավիճակից, տարածաշրջանայնին զարգացումներից, ինչպես նաև՝ հաշվի առնելով աշխարահաքաղաքական վերադասավորումները, պետք է հստակ գիտակցել, որ պատերազմի վտանգը մեզանում ոչ մի վայրկյան չի չեզոքացվել, այն միշտ կա, առկա է, սակայն մենք պետք է պատրաստ լինենք ընդունելու այդ պատերազմն ու հարվածը, ցույց տալու համար մեզ և աշխարհին, որ, չնայած ողջ կատարվածին, մեր մեջքն ամուր է, մենք պատրաստ ենք և չենք նահանջել մեր Հայրենիքի սահմաններն ու անվտանգությունը պաշտպանելու գործից։ Աակայն, այս մարտահրավերը ընդունելու և դրանից պատվով դուրս գալու համար մեզ ներքին ամրություն է պետք։ Հետևաբար, ինչքան էլ որ մեզ կողքից հարվածեն, մենք պետք է մեր դիմադրողականության մակարդակը ոչ միայն կայուն պահենք, այլ նաև բարձրացնենք։ Դիմադրության շարժման բոլոր ծրագրերն ու ուղղությունները հենց դրանում էին կայանում, որպեսզի մենք մեզ, միջազգային հանրությանն, ինչպես նաև՝ մեր հարևան երկրներին ցույց տանք մեր ամուր կամքն ու աննահանջ միասնականությունը»։

Աղբյուր` Փաստինֆո