Փաստ ինֆո

Էջմիածնի քիմիկների զորամասի անհետ կորած համարվող զինծառայողների և ՀՀ պաշտպանության փոխնախարար Արման Սարգսյանի միջև երեկ քաշքշուկ տեղի ունեցել է, ընդ որում՝ նախարարության շենքում։ «Փաստինֆո»-ի հետ զրույցում զինծառայողներից մեկի ծնողը՝ Կարինե Մանավազյանը, պատմեց, որ իրենց ավելի վաղ խոստացված է եղել նախարարի հետ հանդիպում դեռևս մայիսի 2-ից սկսած։ Խոստացված հանդիպումը, սակայն, ամեն անգամ ինչ-որ պատճառաբանությամբ հետաձգվել է։ Ըստ մեր զրուցակցի, երկարատև պահանջներից հետո իրենց վերջապես թույլատրել են մուտք գործել ՀՀ ՊՆ տարածք։

«Բավականին էլ ուշ ընդունեցին։ Ներս մտնելուց հետո սպասեցինք, որ պետք է Պապիկյանը գար, ինքը չեկավ։ Ուղարկեց փոխնախարար Արման Սարգսյանին։ Նա էլ եկավ, խոսեց ահագին դեսից- դենից։ Մարդկանց այն աստիճանի կատաղեցրեց, որ... մենք որ հայտարարեցինք, որ մենք մեր էրեխեքին ձեզ ենք տվել հիմա հետ ենք պահանջում՝ փոխնախարարն էսպես արեց. «Ձեր երեխեքից ոչ մեկս էլ տեղյակ չենք։ Մենք չգիտենք՝ ձեր էրեխեքն ուր են, ինչ են... իր այդ տոնը, իր այդ ասելու ձևը... այդտեղ ժողովրդին կատաղեցրեց, բավականին լուրջ քաշքշուկ եղավ, ընդհուպ մինչև անվտանգությունն եկավ խառնվեց։ Փառք Աստծո, ինքը հանգստացրեց՝ ասելով, որ հասկանում է ծնողների վրդովմունքի պատճառը։ Ինքն էլ հասկացավ իր սխալը»,- պատմեց ծնողը։

Մեր զրուցակցի խոսքով՝ հաշվի առնռելով, որ ծնողները նախարարության տարածքում սպասելիս են եղել դեռևս վաղ առավոտից՝ ինքը և մի քանի այլ ծնողներ դուրս են եկել՝ սնունդ գնելու համար։ Հետդարձի ճանապարհին, սակայն, որոշում է կայացվել նրանց ներս չթողնել նախարարության շենք։

«Մի ժամից ավելի մենք կանգնել ենք նախարարության միջանցքում, մեզ չէին թողնում ներս մտնել։ Փառք Աստծո, մեր ծնողներից մեկը, Գոռ է անունը, Էջմիածնում անհետ կորածներին նվիրված միջոցառումից հետ գալուց հանդիպեցինք։ Ինքը ծանոթ գնդապետ ուներ, իրեն զանգեց։ Ու էլի մի 10 րոպեից ավել կանգնեցնելուց հետո նոր մեզ ներս տարան։ Էդտեղ ինչքա՞ն կատաղած կլինեմ։ Գեներալներից մեկին հարցրի՝ հազիվ պրծե՞լ էիք մեզնից»,- հիշեց մեր զրուցակիցը։

Ծնողները նախարարությունում մնացել են մինչև ուշ երեկոյան ժամը 23։30-ի սահմանները։ Հայտարարել են՝ նախարարությունում մնալու են այնքան ժամանակ, մինչև իրենց հստակ պատասխան տրվի նախարարի հետ հանդիպման վերաբերյալ։

«Երբ իրենք հասկացան, որ մենք իրոք լուրջ ենք տրամադրված ու չենք գնալու, որովհետև արդեն տեղավորվում էինք, այդ գնդապետն առանձնացավ, գնաց, չգիտեմ ում հետ խոսեց, եկավ ու մեզ ասեց, որ արդեն այսօր ժամը 15։00-ից հետո, մեր ցանկացած ժամին կարող ենք հանդիպել նախարար Պապիկյանի հետ։ Մենք որոշեցինք հանդիպել ժամը 17։00-ին»,- ասաց նա։

Կարինե Մանավազյանը մեզ հետ զրույցում վստահություն հայտնեց, որ հանդիպումն այս անգամ էլ չի կայանալու՝ հաշվի առնելով գերատեսչությունների կողմից նախկինում էլ հնչեցրած ու չիրականացրած խոստումներն ու իրենց փորձը։

«Դա մեզ խաբելու հարթական ձևն էր, որ մեզ ՊՆ-ից հանեին։ Եթե մեզ հանկարծ չընդունեն, ապակիներն եմ կոտրտելու այնտեղ։ Դիմելու եմ ամեն ինչի։ Որ էդպես է՝ էդպես է։ Եթե իրենք այդ աստիճանի ստոր են, էդ աստիճանի տղամարդու ու ղեկավարի թասիբ չունեն, ուրեմն մենք ամեն ինչի էլ պատրաստ ենք։ Էս պահի դրությամբ ես այնքան կատաղած եմ, որ մտածում եմ՝ այնտեղ շուշա չեմ թողնի, ամբողջը կփշրեմ։ Իսկ թե հետո ինչ կլինի՝ չեմ կարող ասել»,- ասաց անհետ կորածի ծնողը։

Նա մեզ նաև ասաց, որ նախկինում էլ իրենք բազմաթիվ անգամներ նստացուցեր ու տարբեր ակցիաներ են իրականացրել։ Իր խոսքով, այդ ամբողջը որևէ ազդեցություն չի ունեցել գերատեսչության ներկայացուցչության գործողությունների վրա։

«Անձրևի ու ձյան տակ էլ է եղել՝ նստել ենք։ Մենք անգամ Փաշինյանի դռան դիմաց ենք նստել։ Մեր արածը ոչ մի բանի տեղ չի դրվել»,- ասաց նա։

Հ.Գ. ավելի ուշ հայտնի դարձավ, որ Սուրեն Պապիկյանի հետ հանդիպումը չեղարկվել է. Նախարարը մտադիր չէ հանդիպել անհետ կորած զինծառայողների ծնողների հետ

Աղբյուր` Փաստինֆո