Փաստ ինֆո

Ակնհայտ է, որ Ադրբեջանը շարունակելու է քաղաքականությունը, ակնհայտ է, որ արդեն բացահայտ ցուցակներով մտնելու են տներ, մարդկանց առևանգելու են տներից։ Առևանգելու են բոլոր նրանց, որոնք ինչ-որ մի ժամանակ իրենց ֆեյսբուքյան էջում Ալիևի ծաղրանկար են դրել։ Քանի դեռ իշխանության է Նիկոլ Փաշինյանը, այս աղետը շարունակվելու է։ Այս մասին «Փաստինֆո»-ի հետ զրույցում ասաց ԱԺ նախկին պատգամավոր Նաիրա Զոհրաբյանը։

Հիշեցնենք, որ Լաչինի միջանցքում տեղակայված ադրբեջանական ապօրինի անցակետից ադրբեջանցիներն օգոստոսի 28-ին առևանգել են երեք երիտասարդի։ Նախ՝ հայտնի դարձավ նրանցից մեկի՝ 22-ամյա Ալեն Սարգսյանի առևանգման մասին, ապա՝ պարզվեց, որ առևանգվածներն իրականում երեքն են՝ Ալեն Սարգսյանը, Վահե Հովսեփյանը և Լևոն Գրիգորյանը, որոնք, ըստ ադրբեջանի, 10-օրյա վարչական կալանքի են ենթարկվել։ Երեկ ադրբեջանական ԶԼՄ-ներում, պաշտոնական աղյուրների հղմամբ, հրապարակվել է երիտասարդների լուսանկարը, որտեղ ակնառու էր, որ երիտասարդների նկատմամբ բռնություն է գործադրվել, առնվազն, Ալեն Սարգսյանի ձեռքին առկա էր մարմնական վնասվածք, իսկ հագուստը կեղտոտված էր։ Փաստացի Ադրբեջանն անգամ չի խուսափում ցուցադրել գերիների նկատմամբ բռնությունը։

Նաիրա Զոհրաբյանի դիտարկմամբ՝ 21-րդ դարում՝ միջազգային հանրության լուռ համաձայնության ներքո՝ Ադրբեջանն ամեն օր մարդ է առևանգում։

« Դուք պատկերացնու՞մ եք Արցախում ապրողների վիճակը, որ գալիս են ՀՀ՝ ուսանելու կամ հիվանդ են տեղափոխում, այն մարդու, որ շունչները պահած սպասում են այդ մի քանի րոպեն՝ Հակարիի կամրջի մոտ տեղակայված ապօրինի անցակետով իրենց ամուսինը, որդին, աղջիկը կկարողանա՞ անցնել, թե կգերեվարվի ադրբեջանցու կողմից։ Կրկնում եմ՝ քանի դեռ Հայաստանում իշխանության է Նիկոլ Փաշինյանը, այդ ամենը շարունակվելու է։ Վաղը մտնելու են մարդկանց տները և տներից են առևանգելու, դեռ շատ մեծ հարց է, թե որտեղից են ադրբեջանցիների ձեռքերում այդպես օպերատիվ կերպով հայտնվել բոլոր այն մարդկանց ցուցակները, որոնք տրորել են Ադրբեջանի դրոշը, ովքեր իրենց ֆեյսբուքյան էջերում տեղակայել են Ալիևի ծաղրանկարը։ Ադրբեջանցիների մոտ այդ բոլոր ցուցակները կան»,- ասաց Զոհրաբյանը։

Անդրադառնալով երիտասարդների նկատմամբ բռնությանը՝ Զոհրաբյանը նշեց. «Լանչ որոճող նախիրին՝ ի դեմս միջազգային հանրությանը, որին նստացրել են ադրբեջանական «նավթ» թմրադեղի վրա, ձեր լռությունը բզի նման վաղը մտնելու է ձեր հետևը, հասկանու՞մ եք»։ Զոհրաբյանը, զուգահեռներ անցկացնելով, նկատեց, որ եթե նման դեպք լիներ Ուկրաինայում, «CNN-ը չէր իջնի ռեգիոնի վզից», ռեպորտաժը ռեպորտաժի հետևից կլիներ, ճիշտ կանեին, բայց այս դեպքում միջազգային մամուլը հրաժարվում է անդրադառնալ անգամ նրան, որ օրը ցերեկով Ադրբեջանը մարդ է գողանում՝ կենդանի, ողջ տղաների, որոնք գալիս էին ՀՀ՝ սովորելու, բռնություն գործադրում, տղաներին ստիպում են տեսախցիկի առջև ասել, որ իրենք զղջում են իրենց արարքի համար, որ սխալ են արել՝ Ադրբեջանի դրոշը տրորելով, ինչից հետո խոստանում են 10 օրից բաց թողել։

«Մեկին բաց կթողնեն, մյուսին՝ բաց չեն թողնի, մեկ նկատմամբ ավելի դաժան հաշվեհարդար կտեսնեն։ Մյուսին, ինչպես օրինակ 68-ամյա Վագիֆ Խաչատրյանին, որին նույնպես առևանգել են նույն անցակետից՝ պատճառաբանելով, թե իբրև նա Խոջալուի դեպքերի ժամանակ անարգել է ադրբեջանցուն և այլն, առաջիկայում արդեն Ադրբեջանի դատարանը դատելու է որպես ռազմական հանցագործի, մարդու, որը սրտի բաց վիրահատության կարիք ուներ և ամեն օր կարող է մահանալ, որովհետև նրան հրատապ տեղափոխում էին Երևանի սրտաբանական՝ հրատապ վիրահատելու համար։ Ամեն օր կապի մեջ եմ Վագիֆի ընտանիքի հետ, անգամ հնարավորություն չեն տվել, որ Վագիֆը տեսակապով խոսի ընտանիքի անդամների հետ»,- նշեց Զոհրաբյանը՝ ցավով արձանագրելով, որ այսօր Հայաստանն այնքան անօգնական է, այնքան ոչ մի արժեք չունի միջազգային ակտով, որ ով չի ալարում՝ Հայաստանի վրա ոտքերը տրորում է և դա ունի մեկ մեղավոր՝ Նիկոլ Վովայի Փաշինյանը, քանի դեռ այդ մարդն է Հայաստանի անունից բանակցողը, ամեն օր առևանգելու են, մի քանի ամսից՝ առևանգելու են հենց Կասկադի կենտրոնից, ում ցանկանան՝ գալու են վզին տան և առևանգեն, քանի դեռ ունենք նման իմպոտենտ, անդամալույծ, անկարող իշխանություն։

Զոհրաբյանն ընդգծում է՝ պետք է փոխվի բանակցողը, պետք է հեռացնել Նիկոլ Փաշինյանին, որ հնարավորություն ունենանք փոխելու բանակցողին, որ նոր բանակցողը նույն Ադրբեջանի, միջազգային հանրության հետ բանակցելուց ասի՝ վերջին ստորագրած փաստաթուղթը, որին պարտավոր ենք բոլորս լինել հավատարիմ՝ նոյեմբերի 9-ի եռակողմ հայտարարությունն է, որի տակ դրված է Նիկոլ Փաշինյանի, Վլադիմիր Պուտինի, Ալիևի ստորագրությունը, այդ ստորագրությամբ հաստատված է, որ Լաչինի միջանցքով անխափան ելումուտը պետք է ապահովվի, այդ ստորագրությամբ նախատեսված չէ, որ ադրբեջանցիները պետք է ամեն մարդ գողանան, նախատեսված չէ, որ Ադրբեջանի ԶՈՒ-երը պետք է գա և ներխուժի ՀՀ սուվերեն տարածք ՝ 160-400 քառակուսի կմ գրավի ՀՀ սուվերեն տարածքը։

«Քանի դեռ բանակցողը Նիկոլն է, նոր դիվանագիտական օրակարգ չենք կարող դնել թե՛ Ադրբեջանի հետ, թե՛ միջազգային հանրության հետ երկխոսելիս։ Նիկոլն այդքանը հասկանում է, բայց նա ինքնակամ չի հեռանալու։ Եթե նա այդքանը հասկանալով, հասկանալով, որ իր թիվ մեկ բանակցող լինելը հասցնելու է այդ իրավիճակին, որ արդեն գողանալու են Սիսիանից, Կապանից, Ջերմուկից, կամովին պետք է հեռանա և հեռանար, դա կլիներ այլ խոսակցություն, բայց իրեն ճանաչելով, վստահեցնում եմ, որ ինքը դա չի անելու, ուրեմն պետք է իրեն հեռացնել։ Կամ իրեն հեռացնում ենք, կամ փակում ենք երրորդ հանրապետության էջը. Արցախի մասին այլևս խոսք չկա »,- նշեց Զոհրաբյանը։

Ինչ վերաբերում է ռուս խաղաղապահների կողմից դրսևորվող փաստացի անգործությանը և առևանգումը կանխելու համար որևէ քայլ չձեռնարկելուն, Զոհրաբյանն արձանագրեց, որ փաստ է՝ ռուս խաղաղապահներն իրենց մանդատի ամբողջ ծավալով իրենց առաքելությունը չեն իրականացնում, բայց ալտերնատիվ չկա։

«Ո՞րն է ալտերնատիվը։ Մենք հասել ենք իրավիճակին, որ ասում ենք՝ ավելի լավ է ռուս խաղաղապահները մնան, քան լինի Թուրքիան։ Ալտերնատիվ չկա։ Իսկ երբ խոսում ես ռուսաստանցի գործընկերների հետ, իրենք էլ ասում են՝ Նիկոլ Փաշինյանն Արցախը ճանաչել է Ադրբեջանի կազմ, մենք չենք կարող, մեր մանդատի մեջ չի մտնում Ադրբեջանի ներքին գործերին խառնվելը։ Հասկանում եմ, որ շատ դեպքերում փորձում են իրենց անգործությունը սվաղել դրանով, բայց պետք է հասկանանք, որ այդտեղ ճշմարտություն կա՝ Նիկոլն Արցախը ճանաչել է Ադրբեջանի մաս։ Այսինքն՝ այն, ինչ այսօր կատարվում է Լաչինում, Բերձորում, Ստեփանակերտում, դա, ըստ միջազգային հանրության, Ադրբեջանի ներքին գործն է և ոչ ոք իրավունք չունի խառնվելու երկրի ներքին գործերին»,- նշեց Զոհրաբյանը՝ հավելելով, որ ինքնապատակ չեն ասում, որ Փաշինյանը պետք է հեռանա, հակառակ դեպքում՝ յուրաքանչյուրս կարող ենք հայտնվել առևանգվածի կարգավիճակում, որովհետև չկա ՀՀ-ում որևէ քաղաքացի, որը երբևէ Ադրբեջանի դրոշի, Ալիևի մասին ոչինչ ասած կամ գրած չլինի, բոլորս պոտենցիալ գերիներ և հանցագործներ ենք՝ Ադրբեջանի քրեական օրենսգրքով, իսկ պատերազմներին մասնակիցներին, այդ թվում՝ Արցախի հերոսներին, ՀՀ երկրորդ և երրորդ նախագահներին, բոլորին դատապարտելու են որպես ահաբեկիչներ՝ 20 տարվա և ցմահ ազատազրկման։

Ի. Ս.

Աղբյուր` Փաստինֆո