Փաստ ինֆո

Երեկվանից Ակնա-Ստեփանակերտ ճանապարհահատվածի սկզբնամասում վրաններ են տեղադրված, արցախաբնակ մեր հայրենակիցները շուրջօրյա հերթապահություն են անում, որպեսզի թույլ չտան, որ ադրբեջանական երկու մեքենաները, որոնք իբր, «օգնություն» են բերում իրենց իսկ կողմից պաշարված Արցախ, ներս մտնեն։

«Եռաշերտ պաշտպանություն կա մինչև Ասկերանի մուտքը, այսինքն՝ ադրբեջանական մեքենաների անմիջապես դիմաց ռուսների, հետո մեր ոստիկանական անցակետը, դրանից ներս՝ խորքում մենք՝ բնակիչներս ենք կանգնած։ Իհարկե, ռուս խաղաղապահներին ասել ենք, որ թույլ չտան այդ մեքենաներն անցնեն, բայց շատ կարևոր է, որ որոշ թվով բնակիչներ էլ լինեն մեր ոստիկանների թիկունքում»,-«Փաստինֆո»-ի հետ զրույցում ասում է «Արցախի անվտանգության և զարգացման ճակատի» հիմնադիր անդամ Արշակ Աբրահամյանը։

Օկուպացված Ակնա-Ասկերան ճանապարհատվածում ավելի վաղ տեղադրված բետոնե արգելապատնեշները նույնպես մնում են։ Աբրահամյանի խոսքով՝ երեկ երեկոյան, երբ տեղեկացել են, որ Ադրբեջանը հերթական շոուն է ուզում բեմադրել, անմիջապես շտապել են Ակնա-Ասկերան հատված և բառացիորեն րոպեների ընթացքում մի քանի հարյուր մարդ արդեն այնտեղ էր։ Ասկերանից ու հարակից գյուղերից ոչ միսյն տղամարդիկ, այլև կանայք, ծեր ու մանուկ են շտապել՝ փակելու թշնամու կողմից ուղարկված «տրոյական ձիու» մուտքը Ասկերան։

Նշենք նաև, որ ադրբեջանական տելեգրամյան ալիքներով նյութեր են տարածվում, թե խաղաղապահներն Ակնա-Ստեփանակերտ ճանապարհի իրենց անցակետի մոտ արգելատանեշներ ու փշալարեր են տեղադրել։ Երեկոյան էլ, երբ կանգնեցվել են նրանց բեռնատարները և թույլ չի տրվել, որ մտնեն Ակնա, սկսել են վրաններ տեղադրել։

Աղբյուր` Փաստինֆո