Փաստ ինֆո

Ալիևին պետք է պայմաններ առաջ քաշել, որովհետև առանց պայմանների՝ կնշանակի, որ նա պարտվել է։ Նրան պետք է Ադրբեջանին ցույց տալ, որ ինքը հասել է իր նպատակակետերին։ Միաժամանակ, ֆրանսիական կողմին նա չի մերժել, որովհետև, եթե կան հումանիտար խնդիրներ և դրանք, արդեն, ակնհայտ են, ապա մերժումը որոշակի ձևակերպում է պահանջելու։ Հետևաբար, Ալիևն այսօր Մակրոնին ասել է՝ այո, բայց…իսկ այսպիսի ձևակերպումը միջազգային քաղաքականության մեջ ընդունված տարբերակ է, - «Փաստինֆո» լրատվականի հետ զրույցում ասում է քաղաքագետ Ստեփան Դանիելյանը՝ վերլուծելով Մակրոն – Ալիև հեռախոսազրույցը։

Հիշեցնենք՝ Ֆրանսիայի նախագահ Էմանուել Մակրոնի նախաձեռնությամբ երեկ հեռախոսազրույց է տեղի ունեցել Ադրբեջանի նախագահ Իլհամ Ալիևի հետ։ Ադրբեջանական կողմը հայտնում է, որ քննարկվել են տարածաշրջանում տիրող իրավիճակը, Ակնա-Ստեփանակերտ և Լաչին-Ստեփանակերտ (Լաչինի միջանցք) ճանապարհների բացման հարցերը:Արհեստածին պետության ղեկավարը հայտարարել է, թե Լաչինի միջանցքը կարող է օգտագործվել միայն Ակնա- Ստեփանակերտ ճանապարհի բացվելուց հետո՝ Ադրբեջանի մաքսային և սահմանային ռեժիմի կանոնների պահպանմամբ:

Իսկ այսօր Կոռնիձոր են հասել Ֆրանսիայից Արցախի համար ուղարկված 10 բեռնատարները՝ բեռնված ոչ միայն սննդով, այլև մանկական կերով, գեներատորներով և արևային մարտկոցներով։ Բեռնատարները մինչև Կոռնիձոր ուղեկցել է Փարիզի քաղաքապետ Անն Իդալգոն, ում խոսքով՝ մարդասիրական օգնությունը նախատեսված է Արցախի վեց քաղաքների համար, որոնք դեկտեմբերից շրջափակման մեջ են։

Ստեփան Դանիելյանը հավելում է՝ Ալիևն, իհարկե, նպատակ է հետապնդում բացել Աղդամի ճանապարհը, որն, իրենց պլաններում Արցախի ինտեգրման հերթական քայլը պետք է լինի, իսկ, ինչ վերաբերում է Մակրոն - Ալիև հեռախոսազանգի արդյունքներին, ապա սա, ըստ բանախոսի, հստակ տարվող քաղաքական գործընթաց է, որի ընթացքում յուրաքանչյուր կողմ իր պայմաններն ու առաջակություններն է թելադրում։

Հարցին՝ արդյո՞ք այս հեռախոսզանագը պայմանավորված չէ՞ նաև ֆրանսիական կողմի ավելի վաղ տարածած հայտարարությամբ, թե այդ երկիրը, նոր բանաձևի ընդունմամբ, պատրաստվում է խստացնել Ադրբեջանի վրա պատժամիջոցները, քաղաքագետ Ստեփան Դանիելյանը պատասխանում է՝ այդպիսի հայտարարությամբ Ֆրանսիան զանգից առաջ ադրբեջանական կողմին իր զգուշացումն է արել, որ հումանիտար բեռի ընդունման կտրուկ մերժումն անպայման ունենալու է իր հետանքները։ Բանաձևի ընդունման վերաբերյալ լուրը, նույնպես, հստակ հաշվարկված քաղաքական քայլ էր, այսինքն՝ բանակցության գնալուց առաջ Ֆրանսիան սեղանին է դրել իր հնարավոր քայլերը, որին էլ Ալիևը պատասխանել է՝ Լաչինի միջանցքը կբացվի, եթե… պայմանական ձևակերպմամբ։
Հարցին՝ արդյո՞ք Ֆրանսիայից դեպի Արցախ ուղևորվող 10 բեռնատարները չե՞ն համալրելու Կոռնիձորում արդեն՝ ավելի քան մեկ ամիս հարկադիր պարապուրդի մատնված հայկական կողմի բեռնատարների թիվը, Ստեփան Դանիելյանը պատասխանում է՝ մի բան է հայկական բեռնատարների հանգամանքը, բոլորովին այլ՝ ԵՄ առաջատար երկրի համբավ ունեցող Ֆրանսիայի բեռնատարների հարկադիր պարապուդը, որի պարագայում, դրան կարող են հաջորդել այլ տեսակի քայլեր՝ ինչպես քաղաքական, այնպես նաև բարոյական բնույթի, որն Ադրբեջանի համար, արդեն, լրջագույն զգուշացում կարող է լինել և, որն, արդեն, պետք է մեկնաբանել ոչ թե հեռախոսազրույցի, այլ առավել լուրջ և ընդգրկուն համատեքստում։

Աղբյուր` Փաստինֆո