Փաստ ինֆո

Երևանի ավագանու առաջիկա ընտրություններին ընդառաջ քաղաքական յուրաքանչյուր ուժ իր գաղափարախոսությամբ է կարգախոս ընտրել։ «Ասե՛ք, կանենք»-ը «ՔՊ»-ականների հերթական պոպուլիստական կարգախոսն է։ Կարծում եմ, որ իշխանությունը զուտ տեխնոլոգիա է կիրառել՝ իմանալով սպասվող արձագանքը՝ հանրության կողմից։ «Փաստինֆո»-ի հետ զրույցում այսպիսի տեսակետ հայտնեց քաղտեխնոլոգ Կարեն Քոչարյանը՝ անդրադառնալով առաջիկա ընտրություններին ընդառաջ, ընտրությունների մասնակցության հայտ ներկայացրած իշխանական քաղաքական ուժի կարգախոսին։

«Իրենք դա արել են՝ իմանալով, որ իրենց «ձեռք են առնելու», որ իրենց հայհոյելու են, որ «խփելու են տարբեր տեղերից»։ Բայց, այնուամենայնիվ, գնացել են դրան՝ հասկանալով՝ ինչ են անում։ Իրենց չի հետաքրքրում, թե իրենց մասին ինչ կասեն։ Իրենք, միևնույնն է, թքած ունեն ցանկացած կարծիքի վրա։ Իրենց միայն պետք է որ իրենց մասին շատ խոսեն»,- ասաց նա։

Երեւանի ավագանու ընտրություններին մասնակցում մյուս հիմնական ուժերից մեկի՝ «Ապրելու երկիր» կուսակցության կարգախոսն է՝ «Փոխենք ապագան», ինչը քաղտեխնոլոգի գնահատմամբ, առավելապես ուղղված է ՀՀ ներկա իշխանությունների հայտարարությունների դեմ, թե «ապագա կա»։

«Այսօրվա ապագան տեսնում ենք՝ առևանգված ուսանողներ, մահացած զինվորներ ու զինվորականներ, հանձնված հողեր։ Դա է։ Այս կարգախոսը զուտ քաղաքական բնույթի է։ Իսկ քանի որ իրենք ասոցացվում են Ռուբեն Վարդանյանի հետ, իսկ նա շատ գործեր է արել, ենթադրում եմ, որ «Մենք գիտենք՝ ինչպես անել»-ով էլ ակնարկում են իրականացվածն ու հայտարարում են, որ գիտեն՝ ինչպես անել դա»,- ասաց նա։

Ընտրություններին մասնակցող միայկ դաշինքը՝ «Մայր Հայաստանը, քարոզարշավն իրականացնում է «Միացիր, որ փոխենք» կարգախոսով։ Քաղտեխնոլոգի գնահատմամբ՝ «Մայր Հայաստան» դաշինքը չի թաքցրել, որ ուղղակի քաղաքապետի ընտրության չեն գնում։

«Այս մասին իրենք հայտարարում են անընդհատ։ Սա զուտ քաղաքական լոզունգ է՝ ելնելով իրենց գաղափարախոսությունից»,- ասաց նա։

«Փաստինֆո»-ն նաև հետաքրքրվեց, թե առաջիկա ընտրություններում ինչպես է գնահատում մյուս ուժերի մասնակցության ու հաղթանակ տանելու հնարավորությունն ու արդյո՞ք Երևանյան ընտրություններում կարող է, այսպես կոչված, «կինդեր- սյուրպրիզ» հայտնվել։

««Կինդեր- սյուրպրիզ» չի լինի։ Ես գտնում եմ, որ բավականին լուրջ ձայներ կստանա նաև Մարության Հայկը։ Բայց դա «կինդեր- սյուրպրիզ» չէ»,- եզրափակեց նա։

Աղբյուր` Փաստինֆո