Փաստ ինֆո

Այն, ինչ կատարվում է հիմա, միայն սկիզբն է։ Սա ցույց է տալիս, թե ինչ է լինելու առաջիկա ապագայում 120.000 մարդու, մանավանդ՝ տղամարդկանց և տղաների հետ՝ Արցախում։ Նրանց խոշտանգելու, առևանգելու, բանտ են նետելու, իսկ շատերին նաև ոչնչացնելու են՝ ֆիզիկապես կյանքից զրկելով։ Բոլոր այն մարդիկ, ովքեր ուսումնասիրել են 1915 թ. տեղի ունեցած Հայոց Ցեղասպանության պատմությունը, տեղյակ են, որ Ցեղասպանության բուն ընթացքը սկսվել է հենց արական սեռի հավաքագրումով, նրանց մասսայական ձերբակալություններով և սպասնություններով,- «Փաստինֆո» լրատվականի հետ զրույցում ասում է Սթենֆորդի համալսարանի քաղաքագիտության դոտկոր Արթուր Խաչիկյանը, խոսելով այսօր Բերձորի միջանցքում տեղի ունեցած հերթական միջադեպի մասին։

Հիշեցնենք՝ ադրբեջանցիները Բերձորի միջանցքից այսօր երեք արցախցու են առեւանգել, նրանք երիտասարդ ֆուտբոլիստներ են։ Ադրբեջանական լրատվամիջոցները հայտնում են, թե արցախցիներին վերագրվում է Ադրբեջանի դրոշը վիրավորելու մեղադրանք։ Ենթադրյալ դեպքը, իբր, տեղի է ունեցել 2021 թվականին։

Արթուր Խաչիկյանն ասում է՝ բոլորովին պատահական չէ, որ ադրբեջանական կողմի թիրախում են հայտնվել, հատկապես, արցախցի տղամարդիկ, որովհետև Ադրբեջանը նրանց համարում է ռազմական հանցագործներ և ահաբեկիչներ, որոնց նկատմամբ այդ երկրի օրենսդրությամբ խիստ պատիժներ են սահմանված, որոնք, ահա գործի են դրվել.«Այս ամենը մեկ անգամ ևս ցույց է տալիս, որ մեր կողմից Ալիևից, այսպես կոչված, Խաղաղության դարաշրջան աղերսելը ճակատագրական սխալմունք էր։ Մենք տարիներ շարունակ զգուշացնում էինք՝ պետք է այնպես անել, որպեսզի հակառակորդը ձեզ հարգի, ոչ թե անդադար զիջումների գնալով, իրավիճակը հասցնենք ահա, այսպիսի փակուղու, որից ելք, կարծես թե, այլևս չի երևում։ Այս վարքը ցույց է տալիս, որ Ադրբեջանը, ինչպես և սպասվում էր, չի պատրաստվում խաղաղ համակեցությամբ ապրել հայ ժողովրդի հետ, որ նրանց նպատակն է՝ նախ ոչնչացնել Արցախը, հետո նաև՝ Հայաստանը»։

Արթուր Խաչիկյանն ասում է՝ հենց հիմա ինքը գտնվում է այստեղ՝ Երևանում, օգտվում է ինտերնետ ծառայությունից, սակայն, չգիտես ինչու, բոլոր միջազգային կայքերը, որից ինքը օգտվում է՝ իր աշխարհագրական դիրքը նշում են որպես Ադրբեջան. «Ես Երևանում նստած, օգտվում եմ YouTube, Google կամ Amazon կայքերից, սակայն, բոլոր նշածս միջազգային կայքերն իմ գտնվելու վայրը նշում են՝ որպես Ադրբեջան։ Ի՞նչ է սա նշանակում…այն, որ արդեն Ադրբեջան է ոչ միայն Արցախը, այլ նաև՝ Հայաստանն ու նրա մայրաքաղաքը։ Հայաստանն ու Երևանն, արդեն, Ադրբեջանի տարածքային ամբողջականության մա՞ս են դարձել, բայց մենք տեղյակ չե՞նք…Այսինքն, մեր «հիանալի» ղեկավարներն «Ապագա կա»-ով և մուրճերը ձեռքներին շրջելով, իրենց խոստացած Խաղաղության դարաշրջանը հասցրել են արդեն Երևա՞ն…»։

Մենք շատ համբերատար բացատրում էինք, որ չի կարելի հույս դնել թշնամու «մեծահոգության», ՄԱԿ-ի, Արևմուտքի, ինչպես նաև՝ մասամբ Ռուսաստանի Դաշնության վրա, այլ մտածված և բազմավեկտոր քաղաքականություն վարել, ասում է Արթուր Խաչիկյանն ու հավելում.«Պետք էր ռեալ դաշնակիցներ գտնել, սակայն մեզ համառորեն տարան այս էժանագին PR-ի ճանապարհով, թե, այսպես կոչված, միջազգային հանրությունը կամ «ժողովրդավար» Արևմուտքը մեզ կփրկի, չի թողնի մեզ ոչնչացնեն և այլն և այլն, և այլն…Իսկ հիմա, մենք ունենք այն, ինչ ունենք՝ 21-րդ դարում Արցախում տեղի ունեցող փաստացի նոր Ցեղասպանություն, որը շարունակվելու է նաև Հայաստանում, ունենք մերժված և անպաշտպան Հայրենիք՝ ահա այսպիսի ղեկավար կազմով, ովքեր, անկասկած, սպասարկում են ում ասես, բայց ոչ Հայաստանի Հանրապետության պետական և ազգային շահը։ Ի՞նչ է սպասվում մեզ այսքանից հետո՝ իհարկե ոչնչացում։

Մեզ սպասվում է քրդերի ճակատագիրը, մենք դառնալու ենք նոր քրդեր, բայց քանի - որ մենք քրդերից թվաքանակով զգալիորեն քիչ ենք, նրանք՝ 30- 35 մլն. են, մենք՝ մոտ 3 մլն., ինչպես նաև՝ չունենք նրանց ունեցած արժանապատվության գոնե կեսը, ապա քրդերի վերածվելուց հետո, մեզ անխուսափելի ոչնչացում է սպասվում, այնպես, ինչպես, օրինակ, Ասորեստանը վերացավ։ Եվ, եթե մենք շարունակենք հանդուրժել հայաստանյան օրվա այս իշխանություններին, լռենք նրանց կայացրած որոշումների վերաբերյալ, ապա կարող ենք գրել համաշխարհային ողջ պատմության մեջ նախադեպը չունեցող մի պատմություն, երբ մի ողջ ազգ ու ժողովուրդ, արդեն երկրորդ անգամ Ցեղասպանության է ենթարկվում, սակայն, ի տարբերություն առաջին անգամվա, այս անգամ Ցեղասպանվում է Կասկադում պարելով և ուրախ և անհոգ պարեր կազմակերպելով…»,- ամփոփելով զրույցն ասում է Սթենֆորդի համալսարանի քաղաքագիտության դոտկոր Արթուր Խաչիկյանը։

Աղբյուր` Փաստինֆո