Փաստ ինֆո

ՌԴ վարչապետ Միխայիլ Միշուստինի հայաստանյան այցի ընթացքում հարցերի լայն շրջանակ է քննարկվել, հիմնականում տնտեսական բնույթի, մեզ հետ կապված՝ տարածաշրջանային տնտեսական, ճանապարհային ապաշրջափակումը վերացնելու առնչությամբ, ինչպես նաև՝ տարածաշրջանը, մեծ հաշվով, ինտեգրելու Հյուսիս - Հարավ միջանցքով բեռների և էներգակիրների տեղափոխման համար։ ՌԴ-ի համար սա ռազմավարական նշանակության հարց է՝ հաշվի առնելով այն, որ ԱՄՆ-ն և Մեծ Բրիտանիան ամեն ինչ արեցին, որպեսզի, փաստացիորեն, կտրվի ՌԴ- Եվրոպա տնտեսական կապը,- «Փաստինֆո» լրատվականի հետ զրույցում ասել է պահեստազորի գնդապետ, ռազմական փորձագետ Հայկ Նահապետյանը ։

Հիշեցնենք՝ Ռուսաստանի վարչապետ Միխայիլ Միշուստինը օգոստոսի 24-25-ին այցելեց Հայաստան՝ մասնակցելու Եվրասիական միջկառավարական խորհրդի նիստին։ Այցի ընթացքում Ռուսաստանի կառավարության ղեկավարը քննարկել է Եվրասիական տնտեսական միության շրջանակներում ինտեգրման գործընթացի հետագա զարգացման հարցերը։ Նիստն անցկացվել է Ծաղկաձորում։

Հայկ Նահապետյանը հավելում է՝ ՌԴ-ի համար կենսական նշանակության՝ լինել – չլինելու հարց է՝ կկարողանա արդյո՞ք ինքը գործարկել Հյուսիս – Հարավ ճանապարհահատվածը. «Հյուսիս – Հարավ ճանապարհի 4 ճյուղերից մեկն անցնում է Հայաստանի, մյուսն՝ Ադրբեջանի տարածքով։ Խոսքը ՌԴ-ից Իրան ցամաքային կապի մասին է, որտեղ Հայաստանով անցնող այդ կապը Գորիս – Կապան 21 կմ -անոց հատվածով փակվեց։ Տաթևով շրջանցող ճանապարհի թողունակությունը շատ փոքր է, իսկ բնակլիմայական պայմանները ազդում են նաև տեղափոխման վրա»,- ասում է բանախոսը։

Կա նաև մեկ այլ վտանգ, որ ՌԴ-ից Հայաստան կատարվող բեռնափոխադրումները, որոնք պետք է անցնեն Վրաստանով, ընդգրկում է երկու միջպետական ճանապարհներ՝ Հայաստանի և Վրաստանի, եւ այս երկուսից մեկն անցնում է այն անկլավներով, որոնք ադրբեջանական կողմը հավակնություններ ունի վերցնել, ասում է Հայկ Նահապետյանն ու հավելում՝ խոսքը Տավուշի, այսպես կոչված, անկլավների մասին է.«Հիմա ցամաքային ճանապարհի այս գիծը փակ է իսկ, եթե անգամ հիմա փակ չէ, ապա վաղը գործնականում այն կարող է փակվել։ Հյուսիս – Հարավ մյուս ճանապարհն, ինչպես արդեն ասացի, անցնում է Ադրբեջանով, ինչն այդ երկրին լրացուցիչ դիվիդենտներ է տալիս՝ ինչպես տարածաշրջանային, այնպես նաև աշխարհաքաղաքական առումով՝ սեփական դերակատարության և կշռի մեծացման առումով»։

Մեր տարածաշրջանը, մասնավորապես՝ Արցախն ու Սյունիքը, հիմա աշխարհի ուժային կենտրոնների համար ահռելի նշանակություն ունեցող տարածքի է վերածվել. «Բոլորովին պատահական չէ, որ Կապանում Իրանի Իսլամական Հանրապետությունը գլխավոր հյուպատոսություն բացեց, ՌԴ-ն, նույնպես, այնտեղ պատրաստվում է բացել։ Գլխավոր հյուպատոսության և սովորական հյուպատոսության տարբերությունն այն է, որ գլխավոր հյուպատությունը փոքր դեսպանություն է՝ իր բոլոր ծառայություններով։ Էլ չասենք այն մասին, որ խոսակցություններ են ընթանում այնտեղ նաև Ֆրանսիայի Հանրապետության հյուպատոսություն բացելու մասին։ ԵՄ, այսպես կոչված, դիտորդների թվաքանական են պատրաստվում ավելացնել, ովքեր իրականում, ոչ թե դիտորդ են, այլ հետախույզներ։ Այլ կերպ ասած Հայաստանն ու մասնավորապես Սյունիքն ու Արցախը, ինչպես արդեն ասացի, այսօր աշխարհաքաղաքական ուժային կենտրոնների համար շահերի բախման հսկայական նշանակություն ունեցող տարածքի են վերածվել, որտեղ ՌԴ-ն իր պետական շահերով առաջնորդվելու հավակնություններ նույնպես պետք է ունենար և ունի։ ՌԴ վարչապետի վերջին այցը ՀՀ նաև այս հանգամանքով էր պայմանավորված և իր օրակարգում ներառում էր նաև այս հարցերը»,- ամփոփելով զրույցն ասել է պահեստազորի գնդապետ, ռազմական փորձագետ Հայկ Նահապետյանը։

Աղբյուր` Փաստինֆո