Փաստ ինֆո

Ստեփանակերտում օգոստոսի 15-ից գործող բարեգործական ճաշարանում արդեն օրական ավելի քան 350 մարդ մեկանգամյա սնունդ է ստանում։ Եվս առնվազն 60 հոգու բաժին էլ առաքվում է։

Ինչպես և նախատեսված էր, ճաշարանում սնվում են Արցախի պաշարման հետևանքով սոցիալական ծանր վիճակում հայտնված բազմազավակ ընտանիքի անդամներ, ծերեր։ Ըստ այդմ՝ այցելուների մեծ մասը մինչև 7 տարեկան երեխաներ են ու տարեցներ։ Այն տարեցները, ովքեր ի վիճկաի չեն հասնել ճաշարան, բայց նաև սնունդ հայթայթելու հնարավորություն չունեն, առաքում ենք։ Կամավորները հեծանիվներով, որտեղ հնարավոր է՝ ոտքով, հասցնում են սնունդը»,- «Փաստինֆո»-ի հետ զրույցում ասում է «Արցախի անվտանգության և զարգացման ճակատ»-ի հիմնադիր անդամ Արշակ Աբրահամյանը։

Սնունդը տրվում է ժամը 13-ից 16-ն ընկած ժամանակահատվածում և նշված ավելի 350 հոգին հենց այդ ընթացքում են լինում «Պարկ հոթել»-ում, որտեղ «Արցախի անվտանգության և զարգացման ճակատ»-ը բացել է բարեգործական ճաշարանը։

Սոցիալական վիճակը շատ ավելի ծանր է, քան հնարավոր է պատկերացնել։ Ինքս եմ ճաշարանի այցելուներից լսել, որ մի քանի օր գրեթե չեն սնվել, քանի որ ոչինչ չունեին ուտելու․․․․ Շահառուները, իրոք, սոցիալական ծանր վիճակում գտնվողներն են և դա հասկացվում է նրանց հագուկապից, հազիվ տեղաշարժվելուց․․․ Հաճախ գալիս են մարդիկ, որ պարբերաբար նորմալ սնունդ չստանալուց, հյուծվել ու հազիվ են ոտքի վրա կանգնում․․․Տեսարանն այնքան ծանր է, որ 15 րոպե չես կարողանում կանգնել ու նայել․․․»,-ասում է Աբրահամյանը։

Պաշարման պայմաններում հատկապես սոցիալապես խոցելի խմբերի մասին հոգալու պարտավորությունը, ինչպես զրուցակիցս է նկատում, պետությանն է, բայց քանի որ վերջինս թերանում է, «Արցախի անվտանգության և զարգացման ճակատ»-ն է նախաձեռնել։

Սննդամթերքի հայթայթումն ամենաբարդն է այստեղ, բայց, ըստ Աբրահամյանի խոսքով, շատ դեպքերում անհատ ձեռնարկատերերը, հողօգտագործողներն են առաջարկում իրենց օգնությունը։

Գաղտնիք չէ, որ , «Արցախի անվտանգության և զարգացման ճակատ»-ը վստահություն է վայելում Արցախի բնակչության շրջանում, ուստի և մարդիկ, ովքեր կարող են առաքել, պատրաստակամորեն աջակցում են, ովքեր ունեն գյուղմթերք, սիրով տրամադրում են, մենք էլ մթերումն ենք կազմակերպում։ Կան մատակարարներ, որոնց հետ պայմանագրեր ունենք կնքած, որպեսզի վստահ լինենք, որ ամեն օր սնունդ կհասցվի ու տանը սնվելու հնարավորություն չունեցողները գոնե ճաշարանում օր մեկ անգամ սնունդ կստանան»,-նշում է Աբրահամյանը։

Հիշեցնենք, որ «Արցախի անվտանգության և զարգացման ճակատ»-ի նախաձեռնությամբ արդեն երկու շաբաթ է՝ Ստեփանակերտում գործում է բարեգործական ճաշարան՝ շրջափակման հետեւանքով ստեղծված սոցիալական վիճակը մեղմելու եւ բնակչության առավել տուժած խմբերին սննդով ապահովելու նպատակով:

Աղբյուր` Փաստինֆո