Փաստ ինֆո

Ռուսաստանում Ադրբեջանի դեսպանատունը բողոքի նոտա է հղել ՌԴ ԱԳՆ-ին։

Ինչպես АПА -ին հայտնել են դեսպանատնից, ս.թ. օգոստոսի 7-ին Եկատերինբուրգ քաղաքում տեղի է ունեցել «Թալիշ-Մուղանի ինքնավար հանրապետության կազմավորման 30-ամյակին» նվիրված միջոցառում:

«Ադրբեջանի Հանրապետության տարածքային ամբողջականության և ինքնիշխանության դեմ ուղղված այս միջոցառման կապակցությամբ Ադրբեջանի դեսպանությունը բողոքի նոտա է հղել Ռուսաստանի արտգործնախարարությանը, իսկ դեսպան Փոլադ Բյուլբյուլօղլուն նամակ է հղել Սվերդլովսկի մարզի նահանգապետ Եվգենի Կույվաշևին՝ արտացոլելով Ադրբեջանի սկզբունքային դիրքորոշումն ու վճռական բողոքը:

Եկատերինբուրգում գործող «Ադրբեջան-Ուրալ» ազգային-մշակութային հասարակական կազմակերպության նախագահ Շահին Շիհլինսկին ուղերձներ է հղել քաղաքի համապատասխան վարչական կառույցներին: Ռուսական կողմին տեղեկացվել է, որ նման սադրիչ միջոցառման կազմակերպումն ու դրան Եկատերինբուրգի քաղաքային դումայի նախագահ Իգոր Վոլոդինի՝ հյուրի կարգավիճակով մասնակցությունն անթույլատրելի են, իսկ երկրի իշխող կուսակցության ներկայացուցչի այս քայլը քարոզում է անջատողականություն, սկզբունքորեն չի համապատասխանում Ադրբեջանի և Ռուսաստանի միջև դաշնակցային հարաբերությունների էությանը, հարված է հասցնում երկկողմ համագործակցությանը։

Հակառակ կողմին կոչ է արվել անհապաղ միջոցներ ձեռնարկել Իգոր Վոլոդինի և միջոցառման կազմակերպիչների նկատմամբ, ինչպես նաև վճռականորեն կանխել նման սադրիչ քայլերը, որոնք կարող են ձեռնարկվել ապագայում Ադրբեջանի տարածքային ամբողջականության և ինքնիշխանության դեմ.»,- ասված է հաղորդագության մեջ:

Աղբյուր` Փաստինֆո