Փաստ ինֆո

Մեծաթիվ կամավոր ադրբեջանցիներ, իսկ ես, ավելի քան համոզված եմ, պետական հովանավորչության տակ գտնվող զինծառայողներ, մարտական փորձ են ձեռք բերել Ուկրաինայում, որի կիրառման լավագույն վայրը լինելու է Արցախը։ Սրա նպատակն՝ հնարավորինս քիչ զոհեր տալով և առավել արդյունավետ Արցախի քաղաքներն ու գյուղերը գրավելն է, ինչը ոչ հեռու ապագայում կարող է իրականություն դառնալ: «Փաստինֆո»-ի հետ զրույցում ասել է պահեստազորի գնդապետ, ռազմական փորձագետ Հայկ Նահապետյանը և հավելել՝ տեղեկությունը օդից չի, անգամ, վերլուծություն չի, նման գնահատական տալու համար ինքը որոշակի հիմքեր ունի։

Ալիևն օրակարգից չի հանել Արցախն ուժով գրավելու ծրագիրը, ասում է ռազմական փորձագետը և հավելում՝ այստեղ էական նշանակություն է ունենալու ռուս խաղապահների հանգամանքը. «Եթե վերոնկարագրված գործողություններն Արցախում կատարվեն այնպես, որ ռուս խաղաղապահները հարձակման ենթարկվեն, ապա Ադրբեջանը լրջագույն խնդիրների առաջ կարող է կանգնել, հաշվի առնելով, որ դա, արդեն, փաստացի հարձակում է լինելու Ռուսաստանի Դաշնության վրա, իր բոլոր պատճառահետևանքային կապերով»։

Անդրադառնալով Արցախում, հատկապես, վերջին օրերին տիրող ներքաղաքական լարվածությանը` Հայկ Նահապետյանն ասում է. «Արայիկ Հարությունյանի կողմից ստեղծված, այսպես կոչված, աշխարհազորը, ինձ, ավելի շուտ հիշեցնում է՝ Երևանում իրենց Խաչակիր և մահապարտ հռչակած ամպագոռգոռ երևույթներին կամ մարդկանց, ովքեր որևէ պատերազմի չեն մասնակցել, իսկ եթե բանակում էլ ծառայել են, ասում են, թե կոչում չունեն, չիմանալով, որ բանակում, անգամ, շարքայինը կոչում է համարվում, հետևաբար, եթե բանակում ծառայել են և շարքային են եղել, ուրեմն, արդեն իսկ, շարքայինի կոչում ունեն։ Ահա այսպիսի գիտելիքներով փայլող մեկի գլխավորությամբ, Արայիկ Հարությունյանի նախաձեռնությամբ Արցախում զինված մի օղակ է պատրաստվել, որը փաստացի, ուժի կիրառման սպառնալիքով մտել է Արցախի ԱԺ և օրենսդրի ղեկավարին, խմբակցության անդամներին, պատգամավորներին, ինչպես նաև՝ Արցախի նախկին ղեկավարների նկատմամբ ուժային հավակնություններ կիրառելով, հայտարարել, թե կարող է նույնիսկ իշխանություն զավթել։ Հետաքրքիր է, որ այս դեպքերից անմիջապես հետ հայտարարվեց, թե Արցախում Անվտնագության խորհրդի ընդլայնված նիստ է տեղի ունեցել, ավելին՝ որոշում է կայացվել, ըստ որի՝ Ակնայով (Աղդամով) բեռնափոխադրումներ պետք է իրականացվեն դեպի Ստեփանակերտ։ Իսկապես, Արցախում Անվտանգության խորհրդի ընդլայնված նիստ եղել է, որից հետո, մեզ համար անհայտ պատճառներով, Արցախի նախագահի մամուլի քարտուղարը հերքել է դա, ասելով, թե որևէ Անվտանգության խորհրդի նիստ չի եղել, քննարկումներ չեն եղել, որևէ որոշում չի կայացվել։ Իսկ իրականությունն այն է, որ ընդամենը մեկ օրվա ընթացքում, Արցախում էապես ինչ որ բան է փոխվել։ Թե ի՞նչ՝ ես կարող եմ ենթադրել, սակայն, այս պահին, ենթադրություններ հրապարակելը ճիշտ չեմ համարում։ Ինձ համար փաստ է, սակայն, որ Արայիկ Հարությունյանը հետքայլ է կատարել և սա անհերքելի է»,- ասում է Հայկ Նահապետյանը։

Խոսելով նախօրեից մամուլում լայն տարածում ստացած թեմայի մասին, ըստ որի՝ Արցախի նախագահ Արայիկ Հարությունյանը պատրաստվում է լքել Արցախի տարածքը և պատասխանելով հարցին՝ հնարավո՞ր է, որ Արայիկ Հարությունյանը ևս տեղյակ է առաջիկայում Արցախում սպասվելիք լայնամասշտաբ հարձակման մասին, Հայկ Նահապատեյանն ասում է՝ ինքը հստակ տեղեկությունների չի տիրապետում, թե Արցախի նախագահը պատրաստվում է լքել երկիրը, սակայն, որպես երկրի գործող նախագահ, նա դա անելու իրավական իրավունք չունի. «Լաչինի միջանցքով նա չի կարող դուրս գալ Արցախից, հետևաբար, հարց է ծագում՝ իսկ ինչպե՞ս կամ ի՞նչ ճանապարհով է նա լքելու Արցախը, եթե, իհարկե, նման մտադրություններ ունի։ Այս պահի դրությամբ, նա Արցախի ընտրված և գործող նախագահն է, անկախ նրանից՝ ինչքանո՞վ է բարեխիղճ կատարում ղեկավարի իր պարտականությունները, սա հարցի մի կողմն է, սակայն, ինքն ունի հստակ կարգավիճակ։ Որպեսզի նա հրաժարական ներկայացնի, սա իրենից իրավական պրոցեդուրա է ենթադրում, որը պետք է ամոբղջությամբ ի կատար ածվի։ Եթե տեսականորեն օրենքով նախատեսված որևէ պրոցեդուրա չիրականացվի, և պարզվի, որ նա Արցախը լքել է անհայտ ուղղությամբ, ապա Արցախի իրավապահ համակարգը շատ արագ հետախուզում պետք է հայտարարի նրա նկատմամբ, որովհոտև Արցախի նախագահը պետական, ծառայողական և ռազմական գաղտնիքների կրող է։ Իսկ, եթե հանկարծ պարզվի, որ իրեն ուղղակի առևանգել են, ընդ որում, հայտարարվի, թե դա արել են Ադրբեջանի հատուկ ծառայությունները, ապա այս դեպքում, համապատասխան միջոցառումներն ավելի ինտենսիվ պետք է իրականացվեն, որովհետև նա, ի վերջո, ոչ թե Արցախի ժեկի պետն է, այլ պատերազմական և տոտալ շրջափակման մեջ գտնող երկրի նախագահ։ Ի վերջո, ինձ համար անհասկանալի է մնում՝ եթե անգամ նա պատրաստվում է լքել Արցախը, ապա ի՞նչ է նա ասելու Արցախի իր հայրենակիցներին, իրավապահ համակարգին, իրեն ընտրողներին և վերջին հաշվով՝ հայությանը, հայ ժողովրդին»,- ամփոփելով զրույցն ասում է պահետաստազորի գնդապետ, ռազմական փորձագետ Հայկ Նահապետյանը։

Աղբյուր` Փաստինֆո