Փաստ ինֆո

Երևանի քաղաքապետարանի մեդիառեսուրսները և Հանրային ՀԸ-ն ոչ ինստիտուցիոնալ, այլ՝ քարոզչական բնույթի լուսաբանումներ են իրականացրել Տիգրան Ավինյանի օգտին, ինչը հանրային ռեսուրսներով մրցակցային առավելության ստեղծումն է և վարչական ռեսուրսի չարաշահում։ Այս մասին «Փաստինֆո»-ի հետ զրույցում ասաց Դանիել Իոաննիսյանը՝ անդրադառնալով քարոզարշավին նախորդող ժամանակահատվածում խնդիրներին։

Հիշեցնենք, որ Երևանի փոխքաղաքապետ Տիգրան Ավինյանը առաջադրվել է որպես իշխող ուժի քաղաքապետի թեկնածու ու քարոզարշավն իրականացնում է վարչական շրջանի ղեկավարների և աշխատակազմի վարչության աշխատակիցների հետ՝ պնդելով, թե ինքն ու իր թիմի անդամներն արձակուրդ են վերցրել՝ քարոզարշավն իրականացնելու համար։ Մինչդեռ, ականատես ենք լինում, որ Ավինյանը քարոզարշավի ընթացքում հանձնարարականներ է տալիս իրեն ուղեկցող աշխատակիցներին՝ փաստացի դրսևորելով իրեն ի պաշտոնե, քանի որ քաղաքապետի թեկնածուն չի կարող հանձնարարականներ տալ, փոխքաղաքապետը՝ կարող է։

Դանիել Իոաննիսյանը «Փաստինֆո»-ի հետ զրույցում արձանագրեց, որ քարոզարշավը դեռևս նոր է սկսել և ամփոփ տեղեկություններ դեռ չկան, սակայն մեր մատնանշած օրինակը խնդրահարույց գնահատեց։

«Մենք խնդիր ենք տեսնում, երբ ինստիտուցիոնալ գործունեությունը և քարոզչությունը միախառնվում են։ Այսինքն՝ երբ հստակ տարանջատված չէ քարոզչության իրականացումը և ինստիտուցիոնալ գործունեությունը։ Ձեր նկարագրած օրինակը, որը չգիտեմ՝ եղել է, թե ոչ, եթե ասում եք՝ ենթադրում եմ, որ եղել է, հենց այդ խնդրի դրսևորումներից է, որը, այո, խնդրահարույց է»,- նշեց Իոաննիսյանը՝ հավելելով, որ նախկինում էլ են նման դեպքերի ականտես եղել, սակայն այժմ դեռևս ամփոփ տվյալներ չկան, ըստ այդմ, չի կարող ասել՝ դիտորդները տեսել են, թե ոչ, ամենայն հավանականությամբ՝ տեսել են։ Նրա խոսքով՝ քարոզարշավի ընթացքը նոր է սկսվել, ամփոփ տեղեկություններ չկան, սովորաբար, երկու շաբաթը մեկ են ամփոփում, եթե չեն լինում լուրջ էքսցեզներ, որոնք այս պահին չեն արձանագրվել։

Անդրադառնալով «Փաստերի ստուգման հարթակի» և «Անկախ դիտորդի» կողմից հրապարակված ձայնագրությանը, համաձայն որի՝ համայնքապետերի միջոցով «ՔՊ»-ն փորձում է ցուցակագրել մարզերում բնակվող, սակայն Երևանի գրանցում ունեցող քաղաքացիներին, որոնք, ըստ ամենայնի, պետք է քվեարկեին Ավինյանի օգտին՝ Իոաննիսյանը նշեց, որ դա վարչական ռեսուրսի չարաշահում է, այդուհանդերձ, արձանագրեց, որ ընտրողների վրա ապօրինի ճնշման դրսևորումներ չեն հայտնաբերվել։ Հարցին՝ ԿԸՀ-ն այդտեղ անելի՞ք չունի, Իոաննիսյանը պատասխանեց. «ԿԸՀ-ն անելիք ունի և շատ խնդրահարույց է, որ ԿԸՀ նախագահն այս հարցի հետ կապված դիրքորոշում է հայտնել՝ դեռևս հարցը չքննած»։

Ի. Ս.

Աղբյուր` Փաստինֆո