Փաստ ինֆո

Մեզ մոտ դիրքային կրակոցներն արդեն այնքան սովորական են դարձել, որ ուշադրություն էլ չենք դարձնում։ Գրեթե ամեն օր էլ կրակում են դիրքերի ուղղությամբ։ «Փաստինֆո»-ի հետ զրույցում այս մասին ասաց Գեղամասար համայնքի նախկին ղեկավար Հակոբ Ավետյանը։

Ինչ վերաբերում է սահմանին թշնամական ԶՈւ կուտակումների վերաբերյալ լուրերին՝ մեր զրուցակիցը հայտնեց, որ դրանք բնակավայրից տեսանելի չեն, սակայն, որոշակի կուտակումներ, հատկապես Սոթքի սահմանային հատվածում, առկա են դեռևս ավելի վաղ ժամանակներից։

«Հենց սեպտեմբերի 13-ից հետո էլ միանգամից լուրջ կուտակումներ են եղել։ Դիրքային առաջխաղացումներ ունեցել են (նկատի ունի թշնամական կողմին- խմբ.)։ Կուտակումներ կան ու այդ նույն հատվածում մնում են»,- ասաց մեր զրուցակիցը։

Հակոբ Ավետյանի խոսքով՝ հենց այդ դիրքային առաջխաղացման ժամանակ է, որ թշնամական կողմը կրակ էր բացել մեր հայրենակից հովվի ուղղությամբ։ Այս ընթացքում և՛ս տեղի բնակիչները փորձում են հնարավորության սահմաններում խուսափել թշնամու դիրքերից դիտարկվող հանդեր գնալ։ Որոշ արոտավայրեր անցել են թշնամու ձեռքը, մի հատվածն էլ մշտական դիտարկման ներքո է։

«Հիմա մեր սահմանամերձ գյուղերով անասնապահությունը, կարելի է ասել, 60-70 տոկոսով կրճատվել է։ Ժողովուրդն ավելի զգույշ է։ Եղած անասուններին շատ առաջ չի տանում՝ կրակի տակ չհայտնվելու համար»,- ասաց նա։

Հենց սրանով էլ պայմանավորված, գյուղում առաջանում են նաև մյուս խնդիրները։ Ավետյանի խոսքով՝ գյուղացին զրկվում է ապրուստի միակ միջոցը՝ հողագործությունն ու անասնապահությունը լիարժեք իրացնելուց։

«Գյուղից որոշակի արտահոսք եղավ՝ սեպտեմբերյան իրադարձությունների ժամանակ։ Բայց հիմա, քանի որ բերքահավաքի շրջան է, շատերը վերադառնում են այգեգործությամբ զբաղվելու։ Մեկ էլ հնարավոր է՝ բերքահավաքից հետո մարդիկ դուրս գան գյուղից։ Նաև կախված է նրանից, թե այս ընթացքում ինչ զարգացումներ կարող են լինել»,- ասաց նա։

Աղբյուր` Փաստինֆո