Փաստ ինֆո

«Եթե ինչ-որ մեկը Հայկ Մարությանին տեսանյութից հանել է, դա ամոթալի է»։ Երևանի ավագանու ընտրություններին ընդառաջ իրականացվող քարոզարշավի ժամանակ այս մասին ասաց «Քաղաքացիական պայմանագիր» կուսակցության՝ Երևանի քաղաքապետի թեկնածու Տիգրան Ավինյանը՝ անդրադառնալով «Ազգային առաջընթաց» կուսակցության քաղաքապետի թեկնածու, Երևանի նախկին քաղաքապետ Հայկ Մարությանի՝ ՔՊ-ականներին ուղղված մեղադրանքին։

Հիշեցնենք, որ Մարությանը ֆեյսբուքյան գրառմամբ հայտնել էր, որ ՔՊ կուսակցության վարչության նախագահի տեղակալը իր ֆեյսբուքյան էջում տարածել է գողացված նախընտրական հոլովակ:

«Դա էլ քիչ է՝ կադրում, որտեղ ես ստորագրում եմ եվրոպական ավտոբուսների համաձայնագիրը, ինձ ջնջել են, իմ խոսքը փոխարինել են ուրիշի խոսքով, կեղծված հոլովակի վերջում էլ «ճպպցրել են» ՔՊ-ի լոգոն»,- մասնավորապես գրել էր նա։

«Ես չեմ ուզում մեկնաբանել կոնկրետ, որովհետև չգիտեմ ով ինչ տեսանյութ է նկարահանել։ Եթե ինչ-որ մեկն իրեն տեսանյութից հանել է, դա ամոթալի է: Վահագն Ալեքսանյանը կարող է հրապարակել է տեսանյութը, բայց, չեմ կարծում, թե նա որևէ մեկին անձամբ որևէ տեսանյութից հանել է։

Մյուս կողմից այն, ինչն իրականացրել է կառավարությունը, Երևանի ավագանին, կներեք անհամեստությանս համար, բայց այն, ինչ նախաձեռնել էր փոխվարչապետ Տիգրան Ավինյանը, վերագրել մեկ հոգու, որն իրականացրել է մի ամբողջ քաղաքական թիմ»,- ասել է Ավինյանը ՝ հավելելով, որ այդ վարկի պատասխանատուն Կառավարությունն է, և հենց կառավարությունն է մարում այդ վարկը։
Ավինյանը համոզմունք հայտնեց, որ նման խոշոր որևէ ծրագիր մեկ մարդը չի կարող անել։

Աղբյուր` Փաստինֆո