Փաստ ինֆո

Երևան-Գյումրի ավտոճանապարհին ողբերգական ավտովթարի գործով գիշերը կալանավորվել է «Զիլ»-ի վարորդը։ Այս մասին «Փաստինֆո»-ի հետ զրույցում հայտնեցին ՀՀ Քննչական կոմիտեից։

Հիշեցնենք, օգոստոսի 14-ին՝ ժամը 00։20-ի սահմաններում, Երևան-Գյումրի ավտոճանապարհի 90-րդ կիլոմետր հատվածում միմյանց են բախվել «Զիլ» և «Վոլկսվագեն» մակնիշի տրանսպորտային միջոցները, որի հետևանքով վերջինիս վարորդը և 10 ուղևոր մահացել են, իսկ «Զիլ» մակնիշի ավտոմեքենայի վարորդը և «Վոլկսվագեն» մակնիշի ավտոմեքենայի 5 ուղևոր, մարմնական վնասվածքներով, տեղափոխվել են բժշկական կենտրոն։ Դեպքի առթիվ ՀՀ քրեական օրենսգրքի 342-րդ հոդվածի 3-րդ մասով նախաձեռնվել է քրեական վարույթ: Քրեական վարույթի շրջանակներում 16 անձ տուժող է ճանաչվել։ Օգոստոսի 24-ին հիվանդանոցում ծայրահեղ ծանր վիճակում գտնվող ուղևորներից մեկը ևս մահացել է։ Քննությամբ պարզվել է՝ հոծ գծի առկայության պայմաններում, որը բաժանել է հանդիպակաց ուղղությունների տրանսպորտային հոսքերը, նշել՝ ճանապարհի վտանգավոր վայրերում երթևեկության գոտիների սահմանները և ցույց տվել երթևեկելի մասի սահմանները, Հ.Պ.-ն՝ «Զիլ»-ի վարորդը, չի իրականացրել իր վարած տրանսպորտային միջոցի աջակողմյան երթևեկություն, հատել է հոծ գիծը՝ դուրս է եկել հանդիպակաց երթևեկության ուղեմաս, որի արդյունքում ճանապարհահատվածի հանդիպակաց ուղեմասում բախվել է հանդիպակաց երթևեկելի ուղեմասով ուղիղ երթևեկող Մառլեն Միխաիլի Մարգարյանի վարած «Վոլկսվագեն Քրաֆթեր» մակնիշի ավտոմեքենային:

Հ.Պ.-ի նկատմամբ քրեական հետապնդում է հարուցվել՝ Քրեական օրենսգրքի 342-րդ հոդվածի 3-րդ մասով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը, որն անզգուշությամբ առաջացրել է երկու կամ ավելի մարդու մահ):

Դատարանը «Զիլ»-ի վարորդի նկատմամբ որպես խափանման միջոց է կիրառել կալանավորումը։ Թեև Հ. Պ.-ն գտնվում էր բժիշկների հսկողության ներքո, ՔԿ-ից «Փաստինֆո»-ի հետ զրույցում հայտնեցին, որ նա արդեն տեղափոխվել է ՔԿՀ՝ պարզաբանելով, որ բուժհաստատությունից ստացված առողջական վիճակի մասին տեղեկանքը հիմք ընդունելով է վարույթն իրականացնող մարմինը միջնորդությունը ներկայացրել։

Հեղինակ՝ Իզաբել Սահակյան

Աղբյուր` Փաստինֆո