Փաստ ինֆո

Չնայած Երևանի ավագանու առաջիկա ընտրությունների մասնակցության համար 14 քաղաքական ուժ է գրանցվել, սակայն իրականանում, ինչպես և նախատեսվում էր, քարոզարշավի հիմնական երևացող ուժերն այս պահի դրությամբ 3-ն են՝ «ՔՊ»-ն և «Ապրելու երկիր» կուսակցություններն ու «Մայր Հայաստան» դաշինքը։ «Փաստինֆո»-ի հետ զրույցում այս մասին ասաց քաղտեխնոլոգ Արմեն Բադալյանը։

Հիշեցնենք, որ սեպտեմբերի 17-ին տեղի է ունենալու Երեւանի ավագանու ընտրությունները, որին մասնակցում է 13 կուսակցություն եւ մեկ դաշինք։ Քարոզարշավի պաշտոնական մեկնարկը տրվել է օգոստոսի 23-ին։

««Քաղաքացիական պայմանագիր»-ն ամբողջովին քաղաքային, համայնքային խնդիրներ է բարձրացնում իր հանդիպումների ժամանակ, «Մայր Հայաստան» դաշինքի մոտ էլ առկա են քաղաքային խնդիրներին վերաբերող կետեր, բայց հիմնական շեշտադրումը դրել են համապետական հարցերի վրա՝ փորձելով այս ընտրությունները դիտարկել որպես ո՛չ այնքան քաղաքային նշանակության, որքան Արցախյան հարցի ու այդ հիմնախնդրի վերաբերյալ հասարակության դիրքորոշման դրսևորման միջոց։ Այս առումով, իրենց քարոզարշավն ավելի շատ ԱԺ ընտրություններին է նմանվում։ Իսկ «Ապրելու երկիր» կուսակցությունն անդրադառնում է և քաղաքային և Արցախին վերաբերող հարցերին՝ գրեթե հավասարապես»,- ասաց նա։

Քաղտեխնոլոգի դիտարկմամբ, ոչ բոլոր ուժերին է հաջողվում է երևալ, դրանք հանդես չեն գալիս առանձնացող ծրագրերով և հիմնական նպատակն իրենց կամ իրենց կուսակցության մասին հիշեցնելն է, ինչը, «Փաստինֆո»-ի զրուցակցի խոսքով, նորմալ գործընթաց է։

Առանձնապես տեսանելի չէ նաեւ Երևանի նախկին քաղաքապետ Հայկ Մարությանի ներկայացրած ուժը, եթե հաշվի չառնենք լրատվական հարթակներում հայտնվող հատուկենտ հրապարակումները։

Ինչ վերաբերում է քարոզարշավի շրջանակներում օգտագործվող տեխնոլոգիաներին, ապա, ըստ փորձագետի, առավելապես գործածական են տարբեր հարթակներում թողարկվող գովազդներն ու կուսակցությունը ներկայացնող թեկնածուի շրջայցերի ընթացքում հանրության հետ հանդիպումն ու շփումը։

«Ասել, որ սա նախկինում եղած ընտրությունների տեխնոլոգիայից խիստ տարբերվում է՝ այդպես չէ։ Պարզապես, նախկինում Երևանի ավագանու ընտրություններին Արցախի ու հայ ժողովրդի անվտանգության հարց չէին բարձրացնում։ Հիմա, ելնելով Հայաստանում ստեղծված իրավիճակից, բարձրացնում են։ Բայց տեխնոլոգիապես ամեն ինչ գրեթե նույնն է, ինչ եղել է նախորդ՝ ավելի քան 30 տարիներին։ Որպես էդպիսի այդ առումով այնքան էլ առաջընթաց չկա»,- ասաց նա։

Ինչ վերաբերում է մյուս ուժերին՝ Բադալյանը հավանական համարեց, որ նրանց մի մասի կողմից որոշակի ձայներ հավաքելու դեպքում կարող է անգամ կոալիցիա կազմվել։ Այդուհանդերձ, հաշվի առնելով, որ քարոզարշավը նոր է սկսվել, քաղտեխնոլոգը հստակ կանխատեսումներ անելը վաղ համարեց։

«Հնարավոր է, որ եթե նրանցից ոմանց հաջողվի մտնել ավագանու կազմ, ապա սկսելու է քաղաքական առևտուրը՝ կոալիցիայի ու պաշտոնների բաժանման հետ կապված։ Եթե չհաջողվի, ապա այդպես էլ կմնան ուժեր, որոնք եկան, մասնակցեցին ու մոռացվեցի- գնացին։ Նախկինում՝ 2017 թվականին ու դրանից առաջ էլ 20 ուժ մասնակցում էր։ Հիմա ո՞վ է հիշում այդ ուժերին։ Ոչ ոք»,- ասաց նա։

Եթե ավելի վաղ մատնանշված քաղաքական 3 ուժերը Երևանյան ընտրություններում ինչ տոկոսային ներկայացվածություն կունենան, քաղտեխնոլոգի խոսքով, հայտնի կդառնա միայն քարոզարշավի վերջում։ Իսկ սոցիոլոգիական հարցումների արդյունքում, ըստ նրա, պատկերը կարելի է հասկանալ խիստ մոտավոր։

«Չմոռանանք նաև, որ Հայաստանում ընտրություններում մեծ ազդեցություն է թողնում նաև «նկարչական» գործընթացը։ Թե հիմա իշխանությունն ինչ աստիճանի նկարչություն կանի, կանի, թե չէ, կամ թե ինչ աստիճանի կօգտագործի այդ գործոնը՝ դեռևս որևէ մեկը չի կարող ասել։ Սպասենք՝ տեսնենք»,- ասաց նա։

Ինչ վերաբերում է ընտրություններին մեծաքանակ ուժերի մասնակցությամբ ձայների փոշիացման վերաբերյալ դիտարկմանը՝ Բադալյանն ասաց, որ դա քիչ հավանական է, քանի որ բացի հիմնական պայքարողներից, մյուս ուժերն այնքան ձայն չեն հավաքելու, որպեսզի կարողանան որևէ ազդեցություն ունենալ ընտրությունների արդյունքների փոփոխության կամ ձայների փոշիացման հարցում։

«Եթե 10 ուժերի ամեն մեկն ստանա, օրինակ՝ 1000 ձայն, ապա ստացվում է 10.000 ձայն։ Ձայների այդ քանակը Երևանում շատ բան չի կարող փոխել»,- ասաց նա։

Աղբյուր` Փաստինֆո