Փաստ ինֆո

Հայաստան աշխարհի ամենաազգային ինստիտուտը ո՞րն է՝ Հայ առաքելական եկեղեցին, որ այսքանից հետո, դեռևս կանգուն է մնացել, չեն հաջողացրել քանդեն։ Հետևաբար, շատ օրինաչափ է, որ այս իշխանությունները, թշնամու հետ միասին, ձեռք – ձեռքի տված, պետք է թիրախավորեին այն։ Բայց մենք ռևանշիստ չենք, 5-րդ շարասյուն չենք, պատերազի հրահրիչներ կամ քարոզիչներ չենք,- «Փաստինֆո» լրատվականի հետ զրույցում ասում է Շիրակի թեմի առաջնորդ Գերշնորհ Տեր Միքայել արքեպիսկոպոս Աջապահյանը։

Հիշեցնենք՝ նախօրեին ՀՀ նախկին ՄԻՊ Արման Թաթոյանն անդրադարձել էր Ադրբեջանի կողմից Հայ առաքելական եկեղեցու նկատմամբ նկատելիորեն սրված ատելության մթնոլորտին, ահազանգելով. «Ադրբեջանի իշխանությունն ակտիվացրել է թշնամանքը Հայ Առաքելական Սուրբ Եկեղեցու նկատմամբ` այն հռչակելով 5-րդ շարասյուն, ռևանշիզմի և պատերազմի քարոզիչ, որի դեմ պետք է պայքարել։
Հատկապես թիրախավորված են Հայոց կաթողիկոսներն ու Մայր Աթոռ Սուրբ Էջմիածինը, խոշոր վանական համալիրներն ու եկեղեցիները, օրինակ՝ Նորավանքը, Հաղարծինը, Գեղարդավանքը: Նրանք անգամ փոխել են Էջմիածնի անվանումը:
Այս ամենը լայնածավալ ներկայացվում է` որպես ադրբեջանական, առավել կոնկրետ` ալբանական կամ ուդիական հուշարձաններ: Ընդ որում, խոսքը թե´ Հայաստանում, թե´ Արցախում կառուցված, գործող կամ չգործող եկեղեցիների մասին է»,- մասնավորապես ասվում է ՀՀ նախկին ՄԻՊ-ի գրառման մեջ։

Գերշնորհ Տեր Միքայել արքեպիսկոպոս Աջապահյանն ասում է՝ այն, ինչ անում է Հայ առաքելական եկեղեցին, այն քաղաքականությունը, որ որդեգրել և վարում է նա, այլ բան չէ, քան մեր ազգի, եկեղեցու և Հայրենիքի իրավունքների պաշտպանությունը. «Մի՞թե այս ամենը ռևանշիզմ կամ պատերազմ հրահրել է նշանակում։ Հիմա ռևանշիզմի մեջ, հենց, Ադրբեջանի իշխանությունն է, որ իրեն պինդ զգալով և աներևակայելի ագրեսիա կիրառելով, առաջ է գնում՝ փորձելով ձեռք բերել ավեին, քան նա դրա իրավունքն ունի։ Իրենք են ռևանշիզմի մեջ, մեզանից ի՞նչ են ուզում, մենք ի՞նչ ռևանշիստ։ Մենք, սրանից 30 տարի առաջ, մերը հետ վերադարձրինք, բայց եկավ մի իշխանություն, որ փչացրեց ամեն ինչ։ Հիմա մենք ուզում ենք մերը նորից հետ վերադարձնենք, դա ռևանշի՞զմ է, թե՞ արդար պահանջ կամ արդարության ձգտում, այն էլ՝ մասնակի արդարության, որովհետև դա, դեռևս, մեր ամբողջական պահանջը չէ, որովհետև կրկին արդարացիորեն՝ մեր պահանջները շատ ավելին են»,- ասում է սրբազանը։

Անդրադառնալով թշնամու թիրախում հայտնված, հատկապես, Արցախի թեմին, Գերշնորհ Տեր Միքայել արքեպիսկոպոս Աջապահյանն ասում է՝ Սովետական միության տարիներին Սովետական Ադրբեջանում Արցախի թեմ գոյություն չի ունեցել, այն լուծարվել է 1930 թ.-ից ի վեր, հետևաբար, այնտեղ հայկական որևէ գործող եկեղեցի այդ տարիներին չի եղել, պարզ է, որ Ադրբեջանի նախագահը պետք է ցանկանա վերադառնալ այդ ելակետին. «Պետք է Արցախի թեմը լուծարել, հայկական եկեղեցիները քանդել, փակել կամ վերածել այլ նշանակության կառույցների, զրկել Արցախում ապրող մեր հայրենակիցներին քրիստոնեական - հոգևոր գլխավոր արժեքներից, եղած հայ քրիստոնիաներին էլ հռչակել որպես ուդի, վերջացնել ու հարցը փակել։ Սա է Ալիևի գլխավոր նպատակը։ Սակայն, այստեղ ես ուզում եմ կրկին ասել՝ հայկական եկեղեցիները խոսում են մեր Հայրենիք Հայաստանի սահմանների մասին։ Մենք եկեղեցիներով գծել ենք Հայաստան աշխարհի սահմանները։ Հիմա թշնամին այդ եկեղեցիները պետք է կամ ֆիզիկապես վերացնի, կամ դարձնի այլ սեփականություն, որպեսզի ասի, որ սա Հայաստան չէ, այստեղ հայեր չեն ապրել։ Համարելով Արցախն Ադրբեջանի տարածքային ամբողջականության մի մաս, Ալիևը հիմա էլ որոշել է այնտեղ կրոնական հարցերը լուծել՝ ջնջելով և վերացնելով հայկականության մասին վկայող պատմամշակութային և կրոնական բոլոր շերտերը։ Ամեն ինչ պարզ է՝ այստեղ անհասկանալի ոչինչ չկա։ Արցախում հայ չպետք է լինի, հետևաբար՝ հայկական եկեղեցիներ այնտեղ նույնպես պիտի չլինեն»,- ամփոփելով զրույցն ասում է Շիրակի թեմի առաջնորդ Գերշնորհ Տեր Միքայել արքեպիսկոպոս Աջապահյանը։

Աղբյուր` Փաստինֆո