Փաստ ինֆո

Երևանի ավագանու այս ընտրություններում ներկա իշխանության հաղթանակը կասեցնելը շատ կարևոր է, որքան էլ նրանք վարչական ռեսուրս օգտագործեն։

Ըստ այդմ, կարծում եմ՝ բարձրացվող քաղաքային թեմաները պիտի ընտրովի լինեն։ Առաջին պլան պիտի մղվեն անվտանգային խնդիրները։ Քաղաքաշինությունը քաղաքականություն է ՝ բազմիցս ասված միտքն այսօր առավել քան օրախնդիր է։ Տեսեք՝ մեր քաղաքի շենքերի ո՞ր մասն են հագեցած ապաստարաններով, ընդ որում, նաև այսօր կառուցվողներն էլ, անցած տարիներինն էլ...ի մասնավորի 44-օրյայից հետո իշխանությունն ի՞նչ է արել այս ուղղությամբ։ Մեկ այլ հարց՝ օրինակ, երևանցի զինվորը /բնականաբար՝ոչ միայն, երևանցին/՝ ժամկետային թե՝ պայմանագրային՝ ինչպի՞սի զորանոցներում է անցկացնում իր զինվորական ծառայությունը, որքանո՞վ են դրանք համապատասխանում նորմերին։ Նույնը վերաբերվում է դիրքերին, խրամատներին, ի վերջո, զինվորների՝ անհրաժեշտ զինտեխնիկայով ապահովվածությանը:

Համատարած շինարարական բումը, որով ներկա իշխանությունը շատ է հպարտանում՝ հաճախ՝ կոմունիկացիաների բացակայությամբ է սկսվում և ավարտվում՝ տեղի բնակիչների՝ ճանապարհի կամ՝ հանրային տարածքի, եղած շենքերին՝ մոտեցումների գրավմամբ, իսկ այս ամենը դարձյալ անվտանգության հետ կապ ունեն։

Բնականաբար, անընկալելի է լինելու հայրենակիցներիդ գոյաբանական խնդիրներին զուգահեռ, սովից ուշագնաց լինող և թերսնվող արցախահայության հանդեպ ազարբայջանի իրականացվող ցեղասպանության խնդիրը թողած՝ քաղաքային՝ խաղաղ ժամանակի խնդիրներն առաջին պլան բերելը: Ըստ իս:

Բայց, օրինակ, այն, որ քաղաքային /նաև՝ քաղաքական/ աղբն իբրև կենսապատկեր Երևանից չի հեռացել ու վերացել, ավելին, դեռ մի բան էլ՝ շատացել է՝ հինգ տարվա չմաքրված տերևներ է քամին բերում ու տանում պարբերաբար, փաստ է․․․

Կարծում եմ՝ այս ընտրություններում ճիշտը վրեժի, «Նեմեսիսի» թեման ակտուալ դարձնելն է՝ որի պայմանական ասած՝ քաղաքական դրսևորույթը մայրաքաղաքային «բարիկադներն» են լինելու, որտեղ 591-602 թվակիր՝ Ավանի տաճարն էլ, պարսկական Կապույտ մզկիթն էլ, Պասկևիչի բլուրն էլ իրենց տեղն ու դերն ունեն, անտարակույս․․․

Ի դեպ, ադրբեջանցիների մասին փաստող ոչ մի գրություն չկա Երևանում, գոյություն չունի, որքան էլ՝ Ֆիրդուսի թաղամասում դրամաշնորհային ծրագրեր հովանավորվեն, նման բան չի գտնվելու։ Ի վերջո, ինչ անհեթեթություն էլ հորինեն ազերիները, Բաքվի լավագույն շենքերը հայ ճարտարապետներն են կառուցել։ Հետաքրքիր կլինի նաև այս փաստի շուրջ լսել քպական՝ հին և նոր թեկնածուներին, նաև՝ իշխանությունների աջակից ուժերին...

Այլ խոսքով, այս ընտրության ամենակարևոր մոտիվը պետք է դառնա ՝ «Նեմեսիսը»՝ պետականակործաններից և Հաղթանակը...
Հակառակ դեպքում՝ պարտվողականությունը ծանրումեծ նստելու է Երևանում։

Հեղինակ՝ Ա. Ե

Աղբյուր` Փաստինֆո