Փաստ ինֆո

Արցախում արդեն մի քանի օր է՝ հացի հերթերի ծայրը չի երևում։ Հերթագրման կտրոնները ձեռքներին՝ մարդիկ գիշերները լուսացնում են Ստեփանակերտում գործող եզակի փռերի առաջ։

«Մարդիկ հերթագրվում են, բայց օրերով մի հաց անգամ չեն կարողանում տուն տանել։ Գիտեմ բազմաթիվ ընտանիքներ, որտեղ հաց չի մտել արդեն 3-4 օր։ Կոնկրետ մենք երեք օրվա մեջ մեկ հաց ենք կարողացել գնել՝ այն դեպքում, երբ տանը հինգ հոգի ենք՝ չորսը չափահաս։ Վերջին մեկ ամսվա մեջ նման կրիտիկական վիճակ չէր եղել։ Կարծես՝ դիտավորյալ տանում են նրան, որ գլոբալ խնդիրը ստվերվի, ու մարդիկ հարկադրված լինել մտածել իրենց սոված երեխայի մասին միայն․․․»,-«Փաստինֆո»-ի հետ զրույցում մտահոգություն է հայտնում Ստեփանակերտի բնակիչ Աննան։

Կտրոնների համարներն արդեն 2000-րդն անցել են։ Հերթագրման փաստը չի երաշխավորում, որ մարդիկ մեկ-երկու օրվա ընթացքում հաց կկարողանան ձեռք բերել։ Մի մասն ամբողջ օրը հերթերում կանգնել ու հերթին սպասել ի վիճակի չէ, մյուսներն ուղղակի չեն կարող, քանի որ աշխատում են, մի մասն էլ հերթի երկարությունը տեսնելով՝ արդեն հույսը կորցնում է ու դատարկաձեռն հետ է գնում։

«Մարդ գիտեմ, որ հերթի երկարությունը տեսել ու հետ է գնացել արդեն 2-3 անգամ, քանի որ, իրոք, հաց ձեռք բերելու ոչ մի հնարավորություն չի եղել, ու երեխան սոված է մնացել․․․ Ահավոր վիճակ է, աննկարագրելի է»,-ասում է Աննան։

Ստեփանակերտի մեկ այլ բնակիչ՝ Անահիտը ևս անցած գիշերը հացի հերթում է անցկացրել ու երկու անչափահաս երեխաների համար մեկ հաց անգամ չի կարողացել տուն տանել։

«Գիշերը ժամը 1-ից մինչև 3-ը մի փռի մոտ կանգնեցի, բայց ինձ չհասավ։ Եկա տուն, որ մի քիչ աչքս կպցնեմ, նորից գնամ։ Ժամը 5-ից գնացի մի ուրիշ փուռ, էնտեղ էլ երկու ժամ կանգնեցի, ու մի քանի հոգի էին մնացել, որ հերթն ինձ հասներ, հացը պրծավ․․․ Դատարկաձեռք տուն եկա ու հիմա էլ գնում եմ աշխատանքի․․․»,-ասում է Անահիտը։

Հումանիտար աղետը մտել է Արցախում ապրող մարդանց տները՝ բոլորինը։ Տիկին Լիդան ասում է՝ մի որդին աշխատանքից հետո գնացել է հացի հերթ կանգնել, ամբողջ գիշերը լուսացրել այնտեղ, առավոտյան մեկ կիսահում, սև հաց ստացել ու չգիտի, թե այդ հազիվ կուլ գնացող հացը 6 հոգանոց ընտանիքը ոնց է կիսելու․․․

«Մյուս որդիս էլ կտրոն է վերցրել, բայց արդեն 1500-ն անց էր, այսինքն՝ էդքան մարդ հերթում է, չգիտեմ էլ՝ էսօր կամ վաղը կհասնի հերթը, թե չէ։ Քանի անգամ արդեն եղել է, որ ժամերով կանգնել ենք, հերթը մեզ չհասած՝ պրծել է հացը․․․ Ինքն էլ երեք անչափահաս երեխա ունի»,-ասում է տիկին Լիդան ու շարունակում՝ վիճակն ահավոր է, ճիշտ է, բայց ավելի վատ է լինելու, եթե էն կողմից՝ թշնամու կողմով ճանապարհ բացվի դեպի մեզ․․․

Հերթերում տիրող վիճակի մասին նախընտրում են լռել զրուցակիցներս․ ուժասպառ, նյարդային լարվածության գագաթնակետին հասած մարդիկ շատ լավ գիտակցում են աղետը, որի մեջ են արդեն, բայց և զգոնությունն ու սթափությունը չեն կորցնում․ շեշտում են՝ ամեն ինչ անում են իշխանությունները, որ բացեն էն անտեր ճանապարհը՝ Ակնայինը, բայց դա կլինի Արցախի վերջը․․․

Աղբյուր` Փաստինֆո