Փաստ ինֆո

Չեմ ընդունում Ակնայի ճանապարհի բացումը, դա ինտեգրմանն ուղղված գործողություն է։ Այս մասին «Փաստինֆո»-ի հետ զրույցում ասաց արցախցի փաստաբան Ռաֆայել Մարտիրոսյանը ։

«Հարցը միայն մեկ պատասխան ունի։ Պետք է ապրենք բնության օրինաչափության կանոններով, ինչը ենթադրում է հակամարտությունների վրա հիմնված կեցության ձև և պետք է ապրենք այդ հակամարտության փիլիսոփայությամբ։ Մեր գոյաբանության պահպանման համար պետք է ապրենք պատերազմի փիլիսոփայության առաջնահերությունը լուծելու խնդրով։ Միայն այդ տարբերակն է։ Մենք պարտավոր ենք ամեն ինչ անել, որ այն տղաները, որոնք արդեն մեզ հետ չեն, իրենց պատգամներն իրականացնենք»,- ասաց Մարտիրոսյանը։

Հիշեցնենք, որ շուրջ 9 ամիս բլոկադայի պայմաններում գտնվող Արցախում հումանիտար աղետից զատ նաև ներքաղաքական խմորումներ են։ Հատկանշական է, որ Արայիկ Հարությունյանի կամ Արցախի իշխանությունների գործողությունները քննադատած քաղաքացիներին հեռախոսով սպառնում են, անգամ՝ բռնության ենթարկում, ինչի մասին ահազանգում են հենց արցախցիները։ «Փաստինֆո»-ին մոտ կանգնած աղբյուրները նշել են՝ երկրում երկու ելք են տեսնում՝ կա՛մ Արայիկ Հարությունյանը պետք է շտապ հրաժարական տա, կա՛մ Արցախ Աղդամով սնունդ կմտնի։ Մեր աղբյուրը հավելել է՝ Հարությունյանը հրաժարական տալու միտք չունի, հետեւապես հիմա իշխանությունների օրակակարգում Աղդամով Արցախ սննդի ներկրման հարցն է։

Ավելին, «աշխարհազորայինները»՝ Կարեն Մաթևոսյանի ղեկավարությամբ, մի քանի համազգեստով անձանց հետ ներխուժել են Արցախի ԱԺ շենք ու հաշիվ պահանջել ԱԺ նորընտիր ղեկավար Դավիթ Իշխանյանից՝ նախագահ Արայիկ Հարությունյանին իբր թե հայհոյելու համար:

Ֆեյսբուքյան ուղիղ եթերում Մաթևոսյանն անգամ բարձրաձայնել է Արցախի ԱԺ-ն լուծարելու հարց, ինչն առերևույթ սպասարկում է թշնամի պետության շահերը, քանզի առանց այն էլ աղետալի վիճակում գտնվող երկրում կխարխլվի պետականության վերջին հիմքերը՝ պետական կառույցները։

Ի. Ս.

Աղբյուր` Փաստինֆո