Փաստ ինֆո

Այսօրվա դրությամբ, մեզ ասֆալտ պետք չէ։ Մեզ ավելի շատ զենք է պետք։ «Փաստինֆո»-ի հետ զրույցում այս մասին ասաց ԱՏԱՆ ՌՀՀԿ-ի շտաբի պետ, մահապարտ Եփրեմ Մարգարյանը՝ հավելելով, որ ադրբեջանական սադրանքներն ու ռազմական գործողությունները շարունակվելու են այնքան ժամանակ, քանի դեռ բավարար քայլեր չեն կատարվել՝ երկրի պաշտպանունակությունը բարձրացնելու համար։

«Բնականաբար անելու են։ Եթե ամեն ինչ մեր կողմից թույլ է, իրենք էլ, այսպես ասած, «հաղթողի» մոտեցմամբ «թելադրողներ» պիտի լինեն։ Այս դեպքում, ամենաառաջին քայլը, որ պետք է արվի ոչ թե բանակը քանդելն է, այլ այն ուժեղացնելը։ Այսինքն, այն պետական ռեսուրսները, որոնք ծախսվում են չգիտես՝ ինչերի վրա... մեզ հիմա ավելի շատ զենք է պետք, ոչ թե ասֆալտ»,- ասաց նա։

Այդուհանդերձ, այս պահին էլ Սյունիքի սահմանային հատվածում գտնվող մեր զրուցակիցն, անդրադառնալով վերջին շրջանում պարբերաբար շրջանառվող՝ թշնամու ԶՈւ սահմանային կուտակումների վերաբերյալ լուրերին, վստահեցրեց, որ իր գտնվելու վայրում այժմ հանգիստ իրավիճակ է։ Ինչ վերաբերում է հայկական ԶՈւ սահմանային ամրացումներին՝ Մարգարյանն ասաց, որ հնարավորության սահմաններում այդ աշխատանքը տարվում է։ Իր խոսքով, սակայն, առկա է մի կարևորագույն խնդիր, որը հրատապ լուծման կարիք ունի։

«Պետք է արվի կադրերի ճիշտ ընտրություն։ Ծառայող հրամանատարներին պետք է դնել ավելի բարձր և ղեկավար օղակներում, որովհետև նրանք ծառայող հրամանատարներ են։ Իսկ թիկունքայիններին, առհասարակ, պետք չէ տալ մարտական զորամասերում պաշտոններ։ Որովհետև թիկունքայինը, բացի թղթից ուրիշ ոչինչ չգիտի։ Բայց այսօր զենք բռնող հրամանատարները ենթարկվում են թիկունքային ինչ-որ հրամանատարի»,- ասաց նա։

Ինչ վերաբերում է ադրբեջանական ագրեսիվ հռետորաբանության ու գործողությունների շարունակականության պայմաններում խաղաղության մասին քննարկումներին՝ Մարգարյանն ասաց, որ Հայաստանը բավարար ռեսուրս չունի՝ ռազմական գործողությունների վերսկսման պարագայում դիմագրավելու թշնամուն, չնայած, իր խոսքով, անցած 3 տարիներին, Հայաստանը, այդ ռեսուրսը վերականգնելու նպատակով, պետական մակարդակով արել է հնարավորը։

«Դա ի՞նչ ռեսուրսներով պետք է արվի։ Մեր այս ազգաբնակչությա՞մբ, որը բացի սեփական շահից, ուիշ ոչ մի բան չի տեսնում։ որն իր սեփական շահը գերադասում է պետական շահի՞ն, կոմերսանտի մտածելակերպով ազգաբնակչությունի՞ց։ Կամ ինչ-որ մի քանի հոգի հարբած ֆիդայիների՞ց։ Ես շատ հեռու չեմ գնում։ Նայեք Երևանի բոլոր շենքերի առաջին հարկերը։ Ամբողջը խանութ է, ճի՞շտ է, ու բոլորն առևտուր են անում։ Առևտրականի մտածելակերպ ունեցող ազգը կարո՞ղ է պետականամետ մտածելակերպ ունենալ։ Նրա արյան մեջ արդեն իսկ մտած է անձնական շահը։ Կամ, որ մի քանի հոգի հարբած գոռգոռում են պատերազմ, գնանք, գնանք... կասե՞ք՝ ինչ ռեսուրսներով են գնալու պատերազմ։ Պետք է ռեսուրսները հաշվի առնել, ոչ թե անհատներին ու անձերին։ Մեր հակառակորդն իր ռազմական ծախսերը հասցրել 3.5 մլրդ»,- կարծում է նա։

Ավելին, նրա կարծիքով բացվել է մեր հարևան պետության ախորժակը։ Պատկերացրեք, որ երկուսս էլ ունենք հողակտոր։ Ես էլ հնարավորություն ունեմ հարևանի հողակտորից 1 մետր գողանալու, կամ, քանի որ ես ուժեղ եմ, ասեմ՝ հետ գնա։ Ու ինքը որևէ ճար չունի։ Մենք քաղում ենք այն, ինչ ցանել ենք տարիներ առաջ։ Եթե օրինակ՝ գեներալն իր կորտեժով չգնար, եթե ամեն մի պաշտոնյայի հետևից օճառը չվերցնեին՝ վազեին, եթե մարտական ծառայություն իրականացնող սպային չկոտրեին ու առաջ տային իրենց քրոջ, հորքուրի կամ էլ սիրուհիների տղաներին, ապա այսօրվա դրությամբ մեր բանակի վիճակը սա չէր լինի։ Իսկ քանի որ արել են, ապա ինչ ցանել ենք, այն էլ հնձել ենք»,- ասաց նա։

Անդրադառնալով Կապանի օդանավակայանի տարածքում, Բերձորի սցենարի կրկնության հնարավորության վերաբերյալ հարցին՝ մեր զրուցակիցը հայտնեց, որ տարածքում հսկողություն իրականացնող զինվորականներն իրենց ծառայությունն իրականացնում են լիարժեքորեն։ Պետական որևէ խոչընդոտ, ըստ նրա, առկա չէ։

«Նրանք ծառայում են։ Այսօրվա դրությամբ, անում են այն, ինչ իրենց ռեսուրսների ու իրավասությունների սահմաններում է։ Դա իմ աչքի տեսածն է ու ես տվյալ պահին հենց այդ տարածքում եմ»,- ասաց նա։

Աղբյուր` Փաստինֆո