Փաստ ինֆո

Ես այստեղ եմ աջակցելու և քաջալերելու՝ այն կարգավորման համար, որը հարյուր տարի ի վեր լուծում չի գտնում, և արդեն չափազանց շատ զոհեր է տվել։ Ես արդեն ձեզ ասել եմ, թե որքան մտահոգված է Բելգիան՝ Լեռնային Ղարաբաղի լարվածության կապակցությամբ։ Այս մասին հայտարարեց Բելգիայի ԱԳ նախարար Հաջա Լահբիբը՝ ՀՀ արտգործնախարար Արարատ Միրզոյանի հետ համատեղ մամուլի ասուլիսի ժամանակ։

Նա նշեց, որ այս պատմական հակամարտությունից դուրս գալ հնարավոր է միայն բանակցությունների և փոխզիջումների ճանապարհով՝ որքան էլ դրան դժվար է հասնել։

«Երկու երկրների ղեկավարները հաստատել են երկրների սուվերունությունը և տարածքային ամբողջականությունը։ Ես ողջունում ենք ձեր վարչապետի համարձակ հայտարարությունները, որոնք խաղաղության ուղին են բռնել։

Յուրաքանչյուր պետության պարտավորությունն է պահպանել իր բնակչության իրավունքը։ Հայ բնակչության իրավունքն ու անվտանգությունը պետք է պահպանվի։ Եվ ես ադրբեջանցի գործընկերոջս կհիշեցնեմ այդ մասին»,- ասաց Հաջա Լահբիբը։

Նրա փոխանցմամբ՝ առաջիկայում նոր խորհրդակցություններ են նախատեսվում Բրյուսելում, Երևանում և Բաքվում։ Նա հույս հայտնեց, որ դրանք պատմական շրջադարձի կհասնեն՝ վստահեցնելով, որ այդ ճանապարհին հույսը կարող են դնել ԵՄ վրա։

«Բելգիան խորապես մտահոգված է հումանիտար իրավիճակով և դրա վատթարացմամբ։ Լաչինի միջանցքով երթևեկության սահմանափակումը լուրջ հետևանքներ է ունենում և հիվանդությունների ու սովահարության սպառնալիք է առաջացնում։ ԼՂ բնակիչների կյանքը վտանգի մեջ է գտնվում և դա անընդունելի է։ Բելգիան ամբողջապես ընդունում է ԵՄ դիրքորոշումը, ըստ որի, Ադրբեջանի պարտավորությունն է ապահովել ԼՂ-ի բնակչության անվտանգությունը և Լաչինի միջանցքով ազատ տեղաշարժը»,- ասաց բելգիացի պաշտոնյան։

Աղբյուր` Փաստինֆո