Փաստ ինֆո

Հետզհետե ավելի ակնհայտ է դառնում, որ ՀՀ և Արցախի իշխանությունները  ժողովրդին ճնշելով՝ փորձում են արդարացնել իրենց կողմից արվող զիջումները։ Այդպես եղավ Բերձորը, Աղավնոն հանձնելու ժամանակ, այդպես եղավ դեկտեմբերի 12-ին, երբ սկզբում հակադրվեցին, բայց հետո կատարեցին Ադրբեջանի բոլոր նախապայմանները։ Հիմա էլ գրեթե վստահ եմ, որ ժողովրդին այսքան զրկանքների միջով անցկացնում են, բայց գալու է մի պահ, որ վախեցնելով այդ նույն ժողովրդին , մեղքը նրա վրա բարդելով՝ ասելու են, թե ստիպված ենք բացել Ակնայի ճանապարհը, քանի որ ժողովուրդը սովամահ է լինում։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը։

«Երբ ուզում էին Բերձորը հանձնել, պնդում էինք, որ դա անընդունելի է՝ առավելևս քանի դեռ չկա նոր եռակողմ փաստաթուղթ առ այն, որ միջանցքը տեղափոխվում է այսինչ կոորդինատներով հատվածը։ Այն ժամանակ Արցախի իշխանությունները մեզ մեղադրեցին արկածախնդրության մեջ և հակադարձեցին, թե եթե դա չանեն, Ադրբեջանը ճանապարհը փակելու է ու Արցախի կապը ՀՀ հետ կտրվելու է։ Հիմա տեսանք, թե ինչպես Ադրբեջանը մեր այդ զիջումներից հետո փակեց ճանապարհը։ Երբ Ադրբեջանն անցակետ դրեց Լաչինի միջանցքում, հորդորեցինք, որ այդտեղով ոչ ոքի թույլ չտրվի անցնել՝ բացառությամբ ծայրահեղ ծանր վիճակում գտնվող հիվանդների, բայց չլսեցին մեզ»,-նկատում է պատգամավորը։

Ըստ Գալստյանի՝ Լաչինի միջանցքի փակ պահելը Նիկոլ Փաշինյանի օրակարգի մաս է կազմում և գրեթե վստահ է, որ Ակնայի ճանապարհի բացվելուց հետ էլ էական ոչինչ չի փոխվելու Լաչինի միջանցքի մասով, հակառակը՝ Արցախի 120 հազար բնակչությունը կանգնելու է ֆիզիկական բնաջնջման ռեալ սպառնալիքի տակ՝ ներառյալ քրեական հետապնդումները, բանտարկությունները, առևանգումները, սպանությունները․․․

«Փաշինյանին ձեռնտու չէ, որ բացվի Լաչինի միջանցքը։ Նա լուրջ մտավախություն ունի, որ եթե Արցախը սկսի հայաթափվել, ապա տուն ու տեղ կորցրած տասնյակ հազարավոր արցախցիներ գալու են Հայաստան ու ուզի, թե չուզի ստիպված է լինելու զբաղվել նրանց խնդիրներով, պատասխան տալ իր արածների համար։ Այդ ամենը շատ լավ հասկանալով՝ նրան շատ հարմար է, որ Լաչինի միջանցքը փակ մնա, իր իշխանությանն էլ վտանգ չսպառնա։ Իսկ, Աստված մի արասցե, եթե Ակնայով ճանապարհ բացվի, ապա Լաչինի միջանցքով ազատ տեղաշարժը չի վերականգնվելու։ Այնտեղով շարունակելու են բացառապես հումանիտար բեռներ տեղափոխվել՝ սահմանափակ քանակությամբ ու խիստ վերահսկողությամբ։ Մարդկանց տեղաշարժը շարունակելու է արգելված մնալ․ միան հիվանդներ, հազվագյուտ դեպքերում՝ որոշ մարդիկ կկարողանան տեղափոխվել ՀՀ»,-ասում է պատգամավորը։

Թե ինչ է սպասվում արցախահայությանը՝ մասնավորապես պատերազմի միջով անցած մարդկանց, պարզից էլ պարզ է։ Գալստյանը նկատում է՝ քաղաքական այն գործիչները, անհատները, որոնք դեմ են տարվող քաղաքականությանը, ընդվզում ու իրենց բողոքի ձայնն են բարձրացնում, այսօր էլ նրանց լռեցնում են, ճնշում հնարավոր մեթոդներով։  

Այլ ուժերին՝ մասնավորապես ընդդիմադիր գործիչների առաջարկներին ականջալուր չլինելու Արցախի իշխանությունների գործելաոճը, ինչպես պատգամավորն է ասում, շարունակվում է։

«Իրավիճակից դուրս գալու տարբերակներ կան։ Դրանց մասին պարբերաբար խոսել ենք մինչև հիմա եղած քննարկումների ժամանակ, անգամ գրավոր առաջարկություններ էինք ներկայացրել ժամանակին ԱԽ-ին, բայց դրանց ականջալուր չեն եղել ու չեն էլ ուզում լինել։ Անում են այն, ինչ իրենք են հարմար գտնում։ Արայիկ Հարությունյանը փակ դռների հետևում մեղադրում է Փաշինյանին, բայց հրապարակային դա չի անում, հետո ամեն ինչ կապում է աշխարհաքաղաքական իրավիճակի հետ։ Իրականում, եթե Արցախի իշխանություններն անկեղծ ցանկություն ունենան ժողովրդին համախմբելու, ապա իրավիճակը լրիվ կփոխվի։ Համախմբումն է, որ կփրկի մեզ, բայց չեն անում, քանի որ աթոռ պահելու խնդիր են դրել»,-նշեց Գալստյանը՝ հավելելով՝ ամեն ինչ անում են, որ իրենք լինեն Արցախի վերջին իշխանությունները։

Անդրադառնալով տարածված լուրերին, որ Արայիկ Հարությունյանը հրաժարական տալու ցանկություն էր հայտնել՝ պատգամավորը նշեց․

«Կա հստակ ինֆորմացիա, որ Արայիկ Հարությունյանն ունեցել է փակ հանդիպում, որի ժամանակ ներկայացրել է նախագահի պաշտոնից հեռանալու որոշում։ Այդ որոշումը քննարկման ենթակա չէր։ Եվ  չգիտես, թե ինչու է հետո փոխել իր իսկ որոշումը՝ առանց հիմնավորումների, բայց հնարավոր հրաժարականի մասին  լուրը լսելուն պես՝ ասել եմ, որ դա հերթական շոուն է և, ցավոք, էլի ճիշտ էի»։

Աղբյուր` Փաստինֆո