Փաստ ինֆո

Անչափահաս դստերը կտտանքների ենթարկած Աննա Արևշատյանը տեղափոխվել է «Աբովյան» ՔԿՀ։ Այս մասին «Փաստինֆո»-ի հետ զրույցում հայտնեց ՀՀ ԱՆ Քրեակատարողական ծառայության հանրային կապերի բաժնի պետ Նոնա Նավիկյանը։

Նավիկյանի փոխանցմամբ՝ ընթացակարգով նախատեսված է, որ նրան 7 օր կպահեն կարանտինային պայմաններում, ապա 7 օր անց կտեղափոխեն մեկուսարան։

Հիշեցնենք, որ համացանցում տեսանյութ է տարածվել, համաձայն որի՝ կինը մերկացնում, ֆիզիկական և հոգեկան տառապանք է պատճառում ավագ դստերը՝ ներգրավելով մյուս երեխաներին նույնպես։

Պարզվել է, որ կինը՝ Աննա Արևշատյանը նախկինում դատապարտված եղել է՝ աշխատանքային թրաֆիքինգի ենթարկվելու մասին սուտ մատնություն կատարելու համար, մեղավոր ճանաչվել, սակայն պատիժը պայմանականորեն չի կիրառվել, իսկ նրա ամուսինը՝ Թաթուլ Մադաթյանը, կալանավորված է երկու աղջիկ երեխաներին սեռական բռնության ենթարկելու համար։

Երեխային նվաստացրած մայրը ոստիկանությունում հայտնել է, որ նկարահանել է վճարի դիմաց, իսկ թե ով է պատվիրատուն՝ չի նշել՝ ասելով, թե չի ճանաչում։ Անչափահաս երեխայի նկատմամբ բռնություն և սեռական ոտնձգություն կատարելու վերաբերյալ համացանցում տարածված տեսանյութի կապակցությամբ, Ոստիկանությունից ստացված հաղորդման առթիվ, 2023թ օգոստոսի 18-ին ՀՀ Քննչական Կոմիտեի Գեղարքունիքի մարզային քննչական վարչությունում նախաձեռնվել է քրեական վարույթ ՀՀ քրեական օրենսգրքի 196-րդ հոդվածի 2-րդ մասի 3-րդ, 4-րդ և 6-րդ կետերի ( ֆիզիկական ուժեղ ցավ և հոգեկան տառապանք պատճառելը, որն իրականացվել է հանցավորից նյութական կամ այլ կախվածության մեջ գտնվողի անչափահասի նկատմամբ՝ առանձին դաժանությամբ ) 198-րդ հոդվածի 3-րդ մասի 1-ին և 2-րդ կետերի (սեքսուալ բնույթի բռնի գործողությունը, որն իրականացվել է 12-14 տարին չլրացած անձի նկատմամբ՝ վերընթաց ազգականի կամ այն անձի կողմից, որի վրա դրված է երեխայի դաստիարակության, խնամքի կամ բուժման պարտականություն), 239-րդ հոդվածի 2-րդ մասի 1-ին և 2-րդ կետերի (Երեխային պոռնկության կամ պոռնկագրական բնույթի նյութեր կամ առարկաներ պատրաստելու կամ տարածելու հետ կապված գործողություններ կատարելուն հակելը կամ ներգրավելը, որն իրականացվել է այն անձի կողմից, որի վրա դրված է երեխայի դաստիարակության, խնամքի կամ բուժման պարտականություն և տեղեկատվական կամ հաղորդակցական տեխնոլոգիաներն օգտագործելով) և 300-րդ հոդվածի 3-րդ մասի 1-ին և 2-րդ կետերի (պոռնկագրական նյութեր կամ առարկաներ պատրաստելը, տարածելը կամ պահպանելը, որն իրականացվել է մերձավոր ազգականի կամ այն անձի կողմից, որի վրա դրված է եղել երեխայի դաստիարակության, խնամքի կամ բուժման պարտականություն և զուգորդվել է անչափահասի նկատմամբ դաժան վերաբերմունքով) հատկանիշներով։ Առաջադրված մեղադրանքում կինն իրեն մեղավոր է ճանաչել։ Նրա նկատմամբ որպես խափանման միջոց է կիրառվել կալանավորումը։

Հեղինակ՝ Իզաբել Սահակյան

Աղբյուր` Փաստինֆո