Փաստ ինֆո

Էլինան հղիության 29-րդ շաբաթում է․ մի քանի օր է, ինչ Ստեփանակերտի Մոր և մանկան առողջության պահպանման կենտրոնում է պառկած։

«Մինչև վերջերս լավ էի զգում ինձ, բայց մի քանի օր առաջ կտրուկ պասիվացավ երեխայի խաղը, գրեթե չէի զգում, մինչդեռ այդ ժամկետում արդեն բավականին ակտիվ խաղ պետք է լինի։ Շատ անհանգստացա, զգացի, որ երեխայի հետ մի բան այն չէ։ Քանի որ վառելիք չկար, ամբողջ օրը փնտրում էինք քաղաք եկող մեքենա, որ հասնեի ծծնդատուն։ Օրվա վերջում միայն հնարավոր եղավ պատահական մեքենայով հասնել Ստեփանակերտ։ Հենց հասա, բժիշկս զննեց ու պարզվեց, որ իրոք երեխայի կյանքին վտանգ է սպառնում։ Անմիջապես պառկեցրեցին, ասացին, որ երկար չեն կարող պահել, բայց հնարավորինս պետք է ձգենք, քանի որ երեխայի քաշը շատ քիչ է»,- «Փաստինֆո»-ի հետ զրույցում պատմում է 21-ամյա Էլինան։

Մյուս խնդիրը, որ անհանգստացնում է թե՛ ապագա մայրիկին, թե՛ բժիշկներին, Էլինայի արյան խտությունն է․ ասում է՝ արյունը թանձրացնող դեղ շատ դժվար, գրեթե անհնար է գտնել։ Մի կերպ գտել են, բայց դա էլ արդեն չի օգնում․․․

Էլինան ու ամուսինը՝ Էրիկը, Ասկերանի շրջանի Լուսաձոր գյուղում են ապրում։ Ամեն օր ամուսինը կամ հարազատներից մեկը գյուղից ոտքով սնունդ է բերում Էլինայի համար։ Սննդակարգը, բնականաբար, շատ աղքատիկ ու շատ հեռու է այն սննդակարգից, ինչ անհրաժեշտ է հղիին։

«Թեկուզ գյուղում ենք ապրում, բայց ոչ ձու, ոչ կաթնամթերք չենք կարողանում ձեռք բերել։ Մենք չենք հասցրել ոչինչ ցանել, առնում ենք՝ ինչ հնարավոր է լինում»,-ասում է ապագա մայրիկը։

Էլինան ու Էրիկն իրենց առաջնեկին են սպասում։ Չէին պատկերացնում, որ կարող է նման պայմաններում հայտնվեն ու հիմա Աստծուն աղոթում է, որ առողջ բալիկ ծնվի։ Երիտասարդ կինն ասում է՝ այնքան վատ լուրեր է լսել հղիների հետ կապված, որ վախենում է ու այս պահին միակ ցանկությունն այն է, որ երեխան առողջ ծնվի։

«Դեղերն ու վիտամին C-ն մի կերպ ենք գտել․ հիվանդանոցում շատ քիչ դեղ կա։ Իսկ երեխայի հագուստ, հիգիենայի պարագաներ ընդհանրապես չկա։ Չգիտեմ՝ ինչ եմ անելու․․․»,-մտամոլոր ասում է Էլինան ու ավելացնում՝ ամեն դեպքում, հույսս չեմ կորցնում, որ մի լույս բացվելու է․․․

Աղբյուր` Փաստինֆո