Փաստ ինֆո

ՀՀ և Բելգիայի արտգործնախարարների միջև կայացած հանդիպմանը քննարկվել է ԼՂ-ում ահագնացող հումանիտար ճգնաժամը, որն ստեղծվել է Ադրբեջանի կողմից Լաչինի միջանցքի՝ արդեն 8 ամսից ավել շարունակվող ապօրինի արգելափակման հետևանքով։ Այս մասին հայտարարեց ՀՀ ԱԳՆ Արարատ Միրզոյանը՝ Բելգիայի արտգործնախարարի հետ համատեղ մամուլիս ասուլիսում։

«Թե՛ նախորդ քննարկումների, թե՛ այսօրվա հանդիպման ընթացքում, մանրամասն անդրադարձել ենք ԼՂ-ում իրավիճակի ծայրահեղ բացասական, անդառնալի հետևանքներին։ Անդրադարձել ենք ՄԱԿ-ի ԱԽ հրատապ նիստին։ Դրա շրջանակներում, ինչպես նաև 2022 թվականի դեկտեմբերից, Ադրբեջանի կողմից, Լաչինի միջանցքի արգելափակումից ի վեր, միջազգային գործընկերների, այդ թվում՝ Բելգիայի ու մյուս անդամ երիշկրների հասցեական ուղերձներին, որոնք խիստ կարևորում ենք»,- ասաց նա։

Միևնույն ժամանակ, ՀՀ արտաքին գերատեսչության ղեկավարն արձանագրեց, որ, ի հեճուկս տեղի ունեցած բոլոր գործընթացների, և հակառակ Միջազգային Արդարադատության դատարանի փետրվարի 22-ի և հուլիսի 6-ի որոշումներին, Ադրբեջանը շարունակում է փակ պահել Լաչինի միջանցքը։ Նրա խոսքով՝ հայկական կողմը շարունակաբար ահազանգում է ադրբեջանական գործողությունների հիմքում՝ ԼՂ-ում էթնիկ զտումների ենթարկելու բացահայտ քաղաքականության մասին։

«Գործընկերոջս հետ քննարկումներին ընդգծել եմ նաև, որ վերջին օրերին Ադրբեջանը պարբերաբար խախտում է զինադադարը՝ ԼՂ-ում, ինչպես նաև թիրախավորում Հայաստանի և Ադրբեջանի միջև պետական սահմանին հայկական դիրքերը»,- հայտարարեց Միրզոյանը՝ հավելելով, որ այս մասին հայտնել է նաև ՀՀ-ում ԵՄ մշտադիտարկման առաքելությունը։

Միրզոյանը հերթական անգամ արձանագրեց, որ Ադրբեջանը շարունակաբար խախտում է 2020 թվականի նոյեմբերի 9-ին, իր իսկ ստորագրած եռակողմ հայտարարության՝ գրեթե բոլոր դրույթները։ Այս առումով, Միրզոյանը բարձրացրեց հայ ռազմագերիներին և պահվող քաղաքացիական անձանց վերադարձնելու, ինչպես նաև անհետ կորած քաղաքացիների ճակատագրերի պարզաբանման վերաբերյալ ձեռք բերված պայմանավորվածության՝ Ադրբեջանի կողմից չկատարելու փաստը։

«Այսօր արդեն Ադրբեջանը փաստացի պատանդառության մեջ է պահում ԼՂ ողջ՝ 120.000 բնակչությանը։ Այս գործելաոճով Ադրբեջանը մարտահրավեր է նետում տարածաշրջանում իրական խաղաղության ու կայունության վերահաստատմանն ուղղված՝ միջազգային հանրության, բայց նաև առաջին հերթին ՀՀ ջանքերին։ Կարծում ենք ու ակնկալում ենք, որ մեր միջազգային գործընկերները քաղաքական կամք կդրսևորեն՝ ձեռնարկելու գործուն քայլեր՝ Ադրբեջանի ապակառուցողական, հակամարդկային ու ռազմատենչ գործելաոճը փոխելու ուղղությամբ»,- ասաց նա՝ կրկին վերահաստատելով ՀՀ կառավարության դիրքորոշումն ու պատրաստակամությունը՝ բանակցությունների միջոցով հասնելու տարածաշրջանում երկարատև խաղաղության հաստատմանը։

Աղբյուր` Փաստինֆո